Ekpịgh phọ ephẹn phọ eḍighi bọ ni elọ aḍiḅeraạn eḅẹm mọ: “ki/ḍighi iikia esi anạ omhiịn dị buọ itooghị phọ rogbiphoghọm rukulhom mọ, kụ oḅilhẹ robiririom bidị esi iiruẹn r’elhiom abidị. Torobọ oye oḍighi amoọgh ni uwo emhụ dị rapogh nyodị, kụ iyạl phọ abidị abunhọn abugbogh kụ ropogh.”—Eccl. 5:8.

Odaphạn ephoghom oye, yira kotue ni oḅẹm mọ ekpịgh phọ ephẹn phọ rekaạph ghan ilọ abutooghiạ awe. Kuolọ yira okiririom ophogh, yira komiịn ni mọ ekaạph ni igey ilọ aZihova dị eḍighi iyaạr iidereghị r’okparamhị.

Ecclesiastes 5:8 ekaạph ilọ otooghiạ dị ragilaạm ghan rukulom mọ kaḅilhẹ asophonhaan ekeeny ooruẹn. Ewạ dị otooghiạ phọ kalegheri mọ oye dị apu nyodị obobọ amhoọgh iikpọ itooghị apu nyodị ramiịn ni ipẹ odị raḍighi bọ. Epel siphẹ, abunhọn odi ni dị omhoọgh iikpọ dị epelheghiom ipẹ abidị. Mem dị rokaạph ilọ itooghị awe, dị eeph ni iboom, oomo phọ abidị oopuạn ni, kụ iḍighi kụ awe phọ romiinọm ghan ni ḍighaạgh oomo phọ abidị loor esi dị itooghị phọ abidị eepuạn ni.

Etigheri iduọn yira ko/tue bọ oḍuomolhoghi butooghiạ phọ abuẹn phọ, riidereghị ghan ni iyira olhegheri mọ aZihova ‘ramiịn ni bugbogh abutooghiạ’ isiẹn ade phọ. Yira kotue ni olọm olhoghonhaạn aḍighaạgh aZihova, bịn yira osighẹ dool eemọr phọ ayira onyaarị nyodị. (Ps. 55:22; Fil. 4:6, 7) Yira olegheri ni mọ “aZihova anaan kụ rapogh oomo aḅirinhi phọ, ongọ inyaạm buphẹ ilhoghi phọ emheeraam bọ nyodị.”—2 Chron. 16:9.

Esi iduọn phọ, Ecclesiastes 5:8 ighiọm iyira olhoghi ilọ aḅirinhi phọ yira odi bọ; mọ iikpọ repu ghan ni iikpọ. Kuolọ idị ekạr emhạn maạr epelheghiom, ekpịgh phọ ilhoghonhaạn iyira ḍighaạgh olhegheri mọ aZihova kụ apelheghiom, ii, odị kụ Iikpọ Itooghị Dị Epelheghiom. Odị ratooghị ni nyiidiphọ dị eego esi Oọny phọ odị, Zizọs Kraist, Uw-emhạ Omhạr phọ. AZihova opọ Apelheghiom bọ, anhaan bọ rapogh oomo awe, ra/soph ghan ekeeny ooruẹn, kụ idiphọ kụ idị Oọny phọ odị arọl aani.