EMHUOGHAẠPH ITUUGHẠ PHỌ 40
“Maạr Aseere Ipẹ Oḅọgh Bọ Olọgh Ḍighaạgh Phọ Anạ”
“Timoti, maạr aseere ipẹ oḅọgh bọ oIọgh ḍighaạgh phọ anạ ophạm mọ.”—1 TIM. 6:20.
AḌUỌR PHỌ 29 Living Up to Our Name
OGHAẠPH OOKARAGH *
1-2. Odaphạn 1 Timoti 6:20, eeghe kụ edị oḅọgh ongọ Timoti?
YIRA rogbor ghan ni koḅọgh iphigh araraạr ayira ongọ bunhọn awe mọ uphamhanhaạn iyira. Esi omaạm, yira rolọgh ghan ni ikpoki bạnk, mem dị yira oḍighi iduọn phọ, yira rowạ ghan m’omhaạr oseere ikpoki phọ dị ke/pe obobọ oye ka/mi. Kụ iḍighi kụ iphẹn phọ eegholhomhi ni iyaạr phọ remạ ghan bọ oḅọgh iphigh araraạr ongọ abunhọn.
2 Bạl 1 Timoti 6:20. Otelhedom mọ aPọl aatughianhạm ni Timoti mọ ongọ ni nyodị iyaạr dị emhạn maạr—ogey olhegheri iyaạr ogbi phọ Enhaạn ilọ omhạr awe. Ubilhẹ kẹn oḅọgh ongọ Timoti eepoogh “oḍighi oye dị rakaạph ghan ooḅi oghaạph phọ.” (2 Tim. 4:2, 5) APọl aroma Timoti omhaạr ophạm ipẹ moḅọgh bọ ongọ nyodị. Idiphọ aTimoti, oḅọgh ni raraạr dị emhạn maạr ungọ aani iyira. Eeghe kụ araraạr phọ iphẹn phọ? Eeghe kụ iḍighi kụ yira komaạr bọ ni opạm raraạr phọ iphẹn aZihova maḅọgh bọ ungọ iyira?
UNGỌ IYIRA IGEY DỊ EMHẠN MAẠR
3-4. Ighẹn kụ iniin ariphigh phọ eḍighi bọ kụ igey aBaibul phọ emhạn bọ maạr?
3 AZihova m’unmoom iyira olhegheri iyaạr igey dị emhạn ni maạr iboom, dị edi siphẹ Ekpo Onhụ phọ odị, aBaibul phọ. Igey phọ iphẹn phọ emạn ni maạr, loor esi dị itughemhị iyira ilọ omhoọgh mugey amasian r’aZihova, ḅilhẹ kẹn ekaạph ilọ araraạr dị ketue ingọ iyira ogey oḅaạl olhoghi siẹn aghuḍum mọ ayira. Mem dị yira osighẹ igey phọ ipẹ phọ kụ orolhọm, kitagharạn iyira esighẹ esi oḍighi ebenhẹ ongọ ikarạph itughemhị ḅilhẹ r’aroozọ dị i/ḅaạl.—1 Kọr. 6:9-11.
4 Enhọn ephigh phọ eḍighi bọ kụ igey phọ edi bọ siphẹ Ekpo Onhụ phọ Enhaạn emhạn bọ maạr pọ, aZihova agananami aḍeenhaan ogina abuphẹ osooromhi bọ loor, odị “[masaḅạr] bọ.” (Iiḍighi 13:48) Awe phọ abuẹn phọ omeeraam odaphạn okol phọ ophọn Enhaạn asighẹ bọ ratughemhiọm igey phọ ḍio arodon. (Mat. 11:25; 24:45) Yira bịn ko/tue onaghanhạn Baibul phọ dị olhoghonhaạn aḍighaạgh u/lo, kụ iyaạr i/lo dị emhạn maạr epelhom otuughạ onhaghanhạn aBaibul phọ.—Prov. 3:13, 15.
5. Eeghe kụ edị aZihova aḅilhẹ aḅọgh ungọ iyira?
5 AZihova aḅilhẹ kẹn ungọ iyira eepoogh otughemhị aani abunhọn igey phọ ilọ odị ḅilhẹ r’arigbiom mọ odị. (Mat. 24:14) Adom mọ yira rogbeelhom bọ emạn ni maạr iboom loor esi dị reloghonhaạn ghan ḍighaạgh we oḍighom aani apakirị eghunotu phọ aZihova, keḅilhẹ engọ bidị eepoogh omhoọgh aani aghuḍum k’agee-pọ. (1 Tim. 4:16) Mughumọ arukumuan phọ ayira ebụgh obobọ ekom, yira robakị aani ghan oḍighi phọ ophọn amhạn bọ maạr roḍighi bọ nyiidiphọ. (1 Tim. 2:3, 4) P’eeghe idị eḍighi eghuan oḅọph oḍighi r’Enhaạn!—1 Kọr. 3:9.
MAẠR APHẠM IPẸ MOḄỌGH BỌ ONGỌ NYINHẠ!
ATimoti amhaạr rị aphạm igey phọ akparamhị, ghalhamọ r’amem dị abunhọn osopha ni owilhẹ igey phọ (Miịn ekpịgh phọ 6)
6. Eeghe kụ iḍighi kụ abuniin owilhẹ bọ omhaạr ophạm ipẹ ongọ bọ bidị?
6 Abuniin abudị orọl aani mem mọ aTimoti u/maghamhị maạr eepoogh phọ bidị omhoọgh bọ oḅophoghạn okumuan r’Enhaạn. Esi omaạm, aDemạs aphomhoghiạn aḅirinhi phọ bịn awilhẹ eepoogh phọ odị amhoọgh bọ okumuan r’aPọl. (2 Tim. 4:10) Eeni aFijelọs r’aHemojenis uwilhẹ rukumuan phọ abidị loor esi dị bidị ughiilhaan osoman aani igbiphoghọm mọ aPọl asoman bọ. (2 Tim. 1:15) Haimenios r’Aleksandạ, ḅilhẹ r’aFaiIitos umheel bịn oḍighanhaan buẹn momheel bọ oḍuạ siẹn igey phọ bịn owilhẹ aani igey phọ. (1 Tim. 1:19, 20; 2 Tim. 2:16-18) Iphẹn phọ eḍeenhaan mọ oomo phọ awe phọ abuẹn phọ ukpạr ghan ni siẹn igey phọ, kuolọ bidị uwilhẹ ootughiạn ghan idị eepoogh phọ aZihova angọ bọ bidị emhạn maạr.
7. Ighẹn kụ ikeḍi dị aSetan rakparaghạ ghan oḍighinhom pidị yira oḅilhẹ igey phọ?
7 Ika kụ idị aSetan rakparaghạ ghan oḍighi idị yira ko/maạr opạm ruphua phọ iphẹn aZihova mungọ bọ iyira? Lọgh elhegh iniin ikeḍi odị. Odị rasighẹ ghan kaḍighinhom umoore, r’asifim dị repophe ghan iḍighinhom araraạr r’iitughiạn, ḅilhẹ r’aroozọ dị odị alhegheri mọ ketue ni eḍighi idị yira kobilhẹ u/maạr upạm igey phọ. Odị rakparaghạ ghan osighẹ ikpaarioghọm iigbo obobọ ikpuuroghọm ookperemhiom ayira obọ yira owilhẹ oghaạph ghan iiḅi iinhaghạn phọ. Odị aḅilhẹ kẹn rakparaghạ ghan oḍighi idị yira koler rurụ ongọ “eepua oghaạph r’oogbaghanaạn elologhi phọ buniin awe rokol ghan bọ mọ ‘ogbogh ologhi’ ”. Ophọn phọ pọ oghaạph abuẹn momheel bọ oḍuạ siẹn igey phọ.—1 Tim. 6:20, 21.
8. Nạ atuughạ eeghe esi eḍeenhaan onyọ umor phọ oghol bọ mọ Daniel?
8 Eḍighi maạr dị yira u/gona loor, pọ enụm enụm yira kotue ni bịn oḅilhẹ igey phọ. Ooḅeghiọn eḍeenhaan aDaniel, * dị aphomhoghiạn ophegh ghan avidio gem. Odị aḅẹm mọ: “Mị umhiigh ophegh avidio gem mem dị mị amhạn ḍioph asiạ bịn, eḅẹl amem mọ, mị uphegh ghan sigem dị i/kạr ibeeph, kuolọ enụm enụm bịn mị amhiigh ophegh ghan idị eḅarạm iigamaniạn r’iiḍighi ikarạph aruwaloor.” Esighẹ rekị bịn odị amhiigh ophegh ghan agem mọ esi 15 awạ torobọ aḍio. ADaniel aḅilhẹ aḅẹm mọ: “Siẹn olhoghi phọ amhị, mị ulhegheri ni mọ idọ phọ asigem mọ iphẹn mị rapegh ghan bọ, ḅilhẹ r’amem mọ mị ralọgh ghan bọ miḍur imhị resighẹ esi aZihova. Toroboiperolbọ, ekpom amhị mekpạr esi esi dị mị aatughiạn ghan mọ asinhị iilhogh aBaibul phọ imhị i/gbolhomaam”. Kụ iḍighi kụ eḍighi maạr dị yira u/gona loor, enụm enụm umoore phọ katue ni aḍighi idị yira kobilhẹ u/pạm igey phọ ukparamhị. Kụ eḍighi iduọn phọ, pọ yira kotue ni obilhẹ ophạm iphigh araraạr phọ ipẹ aZihova maḅọgh bọ ungọ iyira.
IPẸ YIRA KOTUE BỌ OMAẠR OPẠM IGEY PHỌ
9. Odaphạn 1 Timoti 1:18, 19, aPọl atomaạm Timoti eeghe?
9 Bạl 1 Timoti 1:18, 19. APọl atomaạm Timoti onyọ eghạm kụ aḅenhị nyodị mọ nyaaghiạn “iinyạ phọ nạ kabeanam bọ eghạm” mọ. APọl o/ghaạph ghan ilọ okạr awe eghạm. Ighẹn areten kụ edị otomaạm bọ Kristẹn we dị odi eghạm? Ighẹn araagharạ kụ edị ewạ mọ yira omhoọgh idiphọ awe eghạm aKraist? Uguạ ooḅeghiọn oogh araraạr dị yira kotue otuughạ siẹn oghaạph omaaniọm mọ aPọl. Araraạr ituughạ phọ iphẹn phọ ketue ni ilhoghonhaạn iyira ḍighaạgh omhaạr ophạm igey phọ okparamhị.
10. Okuọm aloor Enhaạn p’eeghe, kụ eeghe kụ iḍighi kụ ewạ bọ ni mọ yira okuọm loor Enhaạn?
10 Kuọm loor Enhaạn. Ogey onyọ eghạm raḅạr ghan. Odị ree ghan oghoph oye dị odị aphomhoghiạn, obobọ iyaạr dị odị amhaghamhị maạr. APọl aroma Timoti oḅọgh aloor ongọ Enhaạn—iduọn phọ pọ, oḅạr kụ olhọgh eegu Enhaạn. (1 Tim. 4:7) Idiphọ ephomhoghiạn phọ r’okuọm aloor phọ ayira rabụgh bọ, ipẹ kụ idị aḍiḅeraạn phọ ayira ophạm igey phọ kebụgh.—1 Tim. 4:8-10; 6:6.
Mem dị yira moghị ni okumuan oomo emhụ aḍio phọ origheel, eeni kemoghi ni olhọgh inyaạm orue oghị ituughạ. Kuolọ yira komooghọm ni suọ oḍighi iduọn phọ! (Miịn ekpịgh phọ 11)
11. Eeghe kụ iḍighi kụ emhoghi bọ ni olhiọm ghan aloor?
11 Liọm ghan loor. Onyọ eghạm amoọgh olhiọm aloor orue onyaaghiạn oomo amem ilọ eghạm mọ. ATimoti arue ni aakolhobian omherenyạn ikạ aḅirinhi phọ aSetan, loor esi dị odị adaphạn oroma phọ ophooghu bọ ongọ Pọl kụ agẹ bọ mọ, ḍuạ esi ikarạph aruuphuạ, aphorogh omhoọgh araagharạ Enhaạn, ḅilhẹ aaḍikuan ghan buphẹ r’anạ eḅọph bọ omheeraam mọ. (2 Tim. 2:22) Ipẹ phọ ewạ ni olhiọm ghan aloor, ewạ kẹn dị yira koliọm ghan loor orue okpạr opu ruuphuạ iphulhupul phọ ayira. ( Rom. 7:21-25) Opumom isiẹn, ewạ ni mọ yira oliọm ghạn loor orue oghiọm aghisigh onme ghan ogbaany oye phọ, okpologhiạn ghan omhoom mọ. (Efẹ. 4:22, 24) Ḅilhẹ mem dị yira mokumuan oomo emhụ aḍio phọ kụ aloor ayira medugh, kemoghi ni dị yira kokparaghạ oghị aani ituughạ phọ.—Hib. 10:24, 25.
12. Ighẹn areten kụ idị yira kotue osilor osighẹ aBaibul phọ oḍighinhom?
12 Ewạ ni dị onyọ eghạm katuughạ ghan ilọ osighẹ oḍighinhom araraạr eghạm mọ odị. Orue okạr osilor, ewạ ni dị kagbor ghan aḍighi iduọn phọ. Iniin phọ kẹn ni, ewạ ni dị yira kokạr osilor ilọ osighẹ oḍighinhom Ekpo Onhụ phọ Enhaạn. (2 Tim. 2:15) Yira kotue ni otuughạ sighalhanyạ osighẹ oḍighinhom epẹ otu ituughạ phọ. Kuolọ orue olhoghonhaạn aḍighaạgh bunhọn dị komeeraam mọ igey aBaibul phọ emạn ni maạr, pọ ewạ ni dị yira kopamanhạm edeọm ituughạ aBaibul ogina ayira dị emhoon. Ewạ ni dị yira kosighẹ Ekpo Onhụ phọ Enhaạn okparamhiọm omheeraam mọ ayira. Iphẹn phọ epelhom ni oḅẹm m’aạl ghan aBaibul phọ bịn. Ewạ mọ yira ogbirima ghan ipẹ yira aạl bọ, owaaghị ghan raraạr siphẹ arinyạ phọ ayira, pidị yira otue onaghanhạn igey aBaibul phọ ḅilhẹ osighẹ oḍighinhom. (1 Tim. 4:13-15) Bịn yira morue osighẹ Ekpo Onhụ phọ Enhaạn otughemhiọm aani bunhọn. Oḅilhẹ oghaạph, iphẹn phọ epelhom oḅẹm m’aạl esi aBaibul bịn oḅenhị oye. Ewạ dị yira kologhonhaạn ḍighaạgh we phọ onhaghanhạn esi aBaibul phọ, ḅilhẹ r’ilọ oḍighinhom. Yira ophamhanhạm edeọm ituughạ aBaibul dị emhoon, yira kotue ni obughẹ sighalhanyạ phọ ayira ilọ osighẹ Ekpo Onhụ phọ Enhaạn otughemhiọm aani bunhọn.—2 Tim. 3:16, 17.
13. Odaphạn Hibru 5:14, eeghe kụ iḍighi kụ ewạ bọ mọ yira orọph ghan omhiịn?
13 Moọgh orọph omhiịn. Ewạ ni dị onyọ eghạm katọph ghan amiịn iiḅaghamhị dị retu kụ agbalhaghạ. Yira phọ kẹn ni ewạ ni dị yira kotọph ghan omiịn sidọl dị ketue ni ekọm iiḅaghamhị ingọ iyira. (Prov. 22:3; bạl Hibru 5:14.) Esi omaạm, ewạ mọ osighẹ osụ-olhoghi kụ osaḅarạm ghan reephegh r’umoore phọ ayira. ATV r’asifim regbor ghan k’eḍeenhaan roozọ dị i/ḅaạl, kụ aroozọ phọ iphẹn phọ ebeeph ni esi Enhaạn kụ ketue ni ingọ iyira iiḅaghamhị. Kụ iḍighi kụ oghel umoore dị katue ni adughe ephomhoghiạn phọ yira omhoọgh bọ oghị esi Enhaạn.—Efẹ. 5:5, 6.
14. Ika kụ idị orọph omhiịn alhoghonhaạn ḍighaạgh Daniel?
14 ADaniel phọ oghaạph bọ oghol epẹ omhạn, arọph ni amhiịn mọ ophegh ghan avidio gem dị eḅaramaạm iigamaniạn r’iiḍighi ikarạph aruwaloor eḍighi ni iiḅaghamhị. Odị awaaghị ni siphẹ aWatchtower Library phọ kụ amhiịn raraạr dị elhoghonhaạn nyodị ḍighaạgh okaran iiḅaghamhị phọ odị. Iphẹn phọ itir ika nyodị? Odị awilhẹ ophegh ghan asigem dị i/kpeanhạn, kụ agbuurogh sigem mọ ipẹ odị aphegh ghan bọ siphẹ intanẹt phọ, kụ asoph oḍigh arighirị abuphẹ r’odị ophegh ghan bọ. ADaniel aḅẹm mọ, “Kparipẹ roḅilhẹ ophegh avidio gem mọ, mị umhiigh olhọgh amem orolhạn ghan r’arighirị amhị dị oḍighi buọ ookpomhoghan phọ.” Nyiidiphọ aDaniel maḍighi okumor oye ookpomhoghan, aḅilhẹ r’akọy ghan eten oomo amem.
15. Eeghe kụ iḍighi kụ okpẹ abuphẹ momheel bọ oḅuạ siẹn igey phọ aḍighi bọ ni ootor’osooromineen?
15 Idiphọ aTimoti, ewạ dị yira kotọph ghan omiịn iiḅaghamhị dị iinhaghạn abuẹn momheel bọ oḅuạ siẹn igey phọ kekọm. (1 Tim. 4:1, 7; 2 Tim. 2:16) Esi omaạm, bidị otue ni ogbaaghiọm onyọ umor okpẹ obobọ oḍighi idị yira komoọgh iikia ilọ oḍighom mọ aZihova. Odọ iinhaghạn phọ iphẹn phọ ketue ni edughe omheeraam mọ ayira, yira omoọgh oghel okpẹ iikelheghian phọ iphẹn phọ. Eeghe kụ iḍighi? Loor esi dị odọ iinhaghạn phọ iphẹn phọ, “awe dị iloghi abidị meḅaaghaph, igey phọ kẹn bidị i/Ioonaan mun” kụ rogbaaghị ghan. Aḍiigbu phọ abidị pọ okọm ‘ogbaragbarạ r’iikonoghiạn.’ (1 Tim. 6:4, 5) Bidị rowạ dị yira komeeraam iboroghom mọ abidị, ḅilhẹ r’oḍighi idị yira ko/ḍuom olhoghi bumor phọ ayira.
16. Ighẹn araraạr dị ketue ni igbaragbaramhị iyira kụ edị ewạ mọ oghel?
16 Ka/meera iyaạr egbaragbaramhị nyinhạ. “Idiphọ ogey onyọ eghạm k’aJizọs Kraist”, aTimoti agbon rukumuan phọ odị, kparipẹ r’araraạr obobọ ophorogh asiigbu dị ketue ni egbaragbaramhị nyodị. (2 Tim. 2:3, 4) Idiphọ aTimoti, ku/meera aḍiḅeraạn omheel eelạ eru igbaragbaramhị iyira. “Ogbiriḅa ilọ aḅirini phọ, r’aḍidụgh eeIạ” ketue ni eponhomaam ephomhoghiạn phọ yira omhoọgh bọ oghị esi aZihova, r’eten phọ epẹ yira osereghiạn bọ Ekpo Onhụ phọ Enhaạn, ḅilhẹ r’aḍiḅeraạn phọ ayira otughemhị abunhọn. (Mat. 13:22) Ewạ dị yira kodughe dọl aghuḍum mọ ayira, kụ olọgh mem r’inyaạm mọ ayira, esi ophụr ghan owạ “omạr phọ k’Enaạn.”—Mat. 6:22-25, 33.
17-18. Eeghe kụ edị yira koḍighi orue oghoph asiya phọ ayira r’aZihova?
17 Nuụn ghan aakolhobian ilọ oḍighi iyaạr omiteom. Ewạ ni dị onyọ eghạm kanuụn ghan agbiighi ipẹ odị katue bọ akoph loor odị. Eḍighi maạr dị yira rowạ ni omhaạr ophạm araraạr phọ aZihova aḅọgh bọ alhọgh ḍighaạgh ayira, pọ ewạ dị yira konuụn ghan oḍighi iyaạr omiteom mem dị yira omhiịn iiḅaghamhị. Eeghe kụ ketue ilhoghonhaạn iyira ḍighaạgh oḍighi iduọn phọ? Ewạ dị yira kopụr ghan ogbiighi ghan ipẹ yira koḍighi bọ, eḍighi maạr dị yira osoman iyaạr dị riikperemhi iyira.
18 Esi omaạm, mem dị ropạm ookpomhoghan esi, roḅenhị ghan ni buphẹ oghị bọ, mọ owaaghị olhegheri esi lọ kedughanhaan bidị onhuụn oḍuạ omite kụ ogbi omhiigh ookpomhoghan phọ. Eeghe kụ iḍighi? Pidị edughanhaan torobọ oye onhuụn oḍuạ omite eḍighi maạr dị ekperenhom iyaạr emite. Eniin phọ eten phọ kẹn, yira kotue ni ookolhobian ilọ oḍighi mem dị yira ozuan iyaạr dị i/ḅaạl siphẹ intanẹt phọ, idiphọ asifoto iigamaniạn, obobọ iyaạr dị egbolhomaam buẹn momheel bọ oḍuạ siẹn igey phọ, mem lọ yira ropogh TV obobọ afim. Eḍighi maạr dị yira ookolhobian ni ilọ ipẹ ketue bọ ni emite, yira kotue ni oogboronhom okiil oḍuạ esi iyaạr dị ketue engọ iiḅaghamhị siya phọ ayira r’aZihova, bịn yira oḅaạl ghisigh aZihova.—Ps. 101:3; 1 Tim. 4:12.
19. Eeghe aḍisẹph kirokirọ kụ edị yira komoọgh eḍighi maạr dị yira omhaạr ophạm iphigh araraạr phọ aZihova mungọ bọ iyira?
19 Yira omoọgh omhaạr oseere ikpanhạ araraạr phọ ipẹ aZihova mungọ bọ iyira—igey aBaibul phọ emhạn bọ maạr, ḅilhẹ r’eepoogh otughemhị aani abunhọn Baibul phọ. Yira oḍighi iduọn phọ, yira komoọgh ooruẹn olhoghi dị asererẹ, ghuḍum dị amhoọgh emhụ, oḅilhẹ okelhọm ibo olhoghonhaạn aani aḍighaạgh bunhọn oru olhegheri aZihova. R’olhoghonhaạn aḍighaạgh aZihova, yira kotue ni omaạr opạm raraạr phọ iphẹn odị mungọ bọ iyira.—1 Tim. 6:12, 19.
AḌUỌR PHỌ 127 The Sort of Person I Should Be
