1. Eeghe kụ iḍighi kụ ibadị ro/tue gham bọ kotuughạ ḍinyạ?

ḌIO arodon, ibadị awe rokumuan ghan ni iboom omhoọgh aani ikpoki orolhọm. Ibadị abumor ayira rokumuan ghan ni iboom awạ orue omiteom ipẹ rewạ bọ ongọ arughunotu abidị. Resighẹ ghan ni erubal abunhọn iboom awạ oḍuạ oghị r’origheel aruutu iiḍighi abidị. Ologhonaạn aḍighaạgh siloor, ibadị roḍighiyogh ghan igbagarạ iiḍighi. Eekuna aḍio phọ, asiloor abumor r’abumarani phọ abuẹn phọ redugh ghan ni! Ibadị ro/moọgh ghan mun r’eẹny inyaạm otuughaạm aḍinyạ.

2. Apụr amem kụ edị nạ ratuughạ ghan Baibul phọ?

² Toroboiperolbọ, yira omoọgh omiteom amem otuughạ ghan aḍinyạ,—okuamị otuughạ—Ekpo onhụ phọ Enaạn ḅilhẹ r’arinyạ phọ ayira. Asiya phọ ayira r’aZihova ḅilhẹ r’aghuḍum k’agee-pọ phọ ekpasị esi ituughạ phọ ayira! (1 Tim. 4:15) Abuniin roḅetenu ghan eḅon aḍiroọr torobọ aḍio kụ otuughạ mem dị ariisi mephooghị ḅilhẹ bidị mosereghian, iduọn bidị monaanị bọ osumạ. Abunhọn omoọgh mem dị ephọ dị oseerean siphẹ eekuna aḍio phọ aạl ḅilhẹ rogbiran Ekpo onhụ phọ Enaạn.

3-4. Ika kụ edị mooḅenion onhụ arinyạ phọ ḅilhẹ r’asividio ookpomoghan phọ, kụ eeghe kụ iḍighi?

³ Dị iikia i/lo nạ ameeraam aani ni mọ emạn ni maạr owạ amem otuughạ ghan aBaibul phọ. Kuolọ eeghe kụ edị yira kotuughạ bọ? ‘Ibadị araraạr aạl emuza ni,’ eeni nạ ghụn kụ kaḅẹm mọ. ‘Mị ra/tue ghan k’aạl amadạn.’ Abuniin rokparaghạ ghan ni k’aạl oḅilhẹ ophogh oomo asividio phọ, kuolọ ibadị abumor ayira ko/rue oḍighi aani iduọn phọ. Aloor Phọ Repogh Bọ olegheri ni iphẹn phọ. Kụ iḍighi kụ, ungọ ni iiḅakiọm mem dị ke/bia iboom ilọ ophụr oghome araraạr ituughạ phọ ayira idị ogẹ r’idị edi intanẹt.

 ⁴ Esi omaạm, ro/miteom ghan mun Yearbook phọ, loor esi dị yira kotue ni omiịn imạ iinaghạn awe dị eḍighi ilọ okparamị siphẹ jw.org^® ḅilhẹ r’isiphẹ JW Broadcasting^®. Kụ aWatchtower r’Awake! phọ opọ rokimọm ghan bọ epẹ erugh phọ romiteom ghan nyiidiphọ iraạr amem lhạ phọ. Uu/ḅenion raraạr phọ iphẹn phọ ilọ ongọ ayira mem osighẹ oḍighinom araraạr dị i/moọgh muḅọph r’iiḅereghị phọ aZihova. Uuḅenion ghụn pidị idughanhaan iyira omhoọgh amem ozuumaam ongọ araraạr phọ “ipẹ esooran bọ.” (Fil. 1:10) Uguạ ooḅeghiọn ophogh ipẹ nạ katue bọ alegheri ipẹ esooran bọ ḅilhẹ r’ipẹ nạ katue bọ akạr akelhọm Ituughạ ABaibul ogina anạ.

5-6. Ighẹn odọ arinyạ kụ edị ewạ mọ yira omiigha ni loor otuughạ?

⁵ Asiigbu phọ ayira keḅaramaạm eeghe? Olhọgh amem otuughạ ghan Ekpo onhụ phọ Enaạn ḍio etum ḍio. Moghome onhụ asiikpịgh phọ rongọ ghan bọ ilọ ibạl aBaibul awiki awiki phọ, pidị yira omoọgh muboom amem ogbirima ghan ipẹ yira m’aạl bọ oḅilhẹ owaaghiọm araraạr ilọ ipẹ yira aạl bọ. Aḍiigbu phọ ayira ki/ḍighi oopho aạl oomo asiikpịgh awiki phọ bịn, kuolọ omheera adom aBaibul phọ eḅọgh ekpom ayira eḅilhẹ etir ipẹ yira rologhoma ghan bọ, iḍur iyira egbiemị aZihova.—Ps. 19:14.

⁶ Eeghe kụ edị yira koḅilhẹ omiigha loor otuughạ? Ii, ewạ ni dị yira komiigha loor ookolobian Ituughạ Otu Okoriom mọ r’Ituughạ aBaibul Ookpomoghan phọ, oḅilhẹ aalạgh ipherị phọ ariisi ituughạ ogboku awiki phọ. Omhiịn ni mọ yira obạl li torobọ aWatchtower r’Awake!

7. Ewạ ni mọ yira oghiigha loor ayira ḍughụm, eḍighi maạr dị yira u/tue usighẹ uḍighinom oomo imạ araraạr phọ edi bọ siphẹ osoph intanẹt phọ ḅilẹ r’aJW Brokastịn phọ ḍughụm?

⁷ Eeni nạ kaḅẹm mọ: ‘iduọn phọ ni,’ ‘kuolọ kokaạph ikạ ilọ arumhuoghaạph phọ r’asividio phọ edi ghan bọ siphẹ osoph intanẹt phọ ayira, jw.org, ḅilhẹ r’araghaạph phọ retọl ghan bọ siphẹ JW Brokastịn? Emuza!’ Ooḅeghiọn oghaạph omaaniọm: Idọ kirokirọ ariiḍien dị redụgh kụ edi esi dị robool ghan riiḍien. Abuphẹ roko bọ ko/kị ogho oomo ariiḍien phọ edi bọ esi phọ. Bidị kotuụgh epẹ bidị kole bọ bịn kụ oko. Igina phọ kẹn ni, eḍighi maạr dị nạ ka/tue asighẹ aḍighinhom oomo araraạr phọ edi bọ siphẹ intanẹt phọ, pọ kaa/kiigha loor anạ. Sighẹ aḍighinhom rinyạ obobọ sividio phọ, ipẹ nạ katue bọ. Siẹn mesi bọ, ooḅeghiọn omhiịn ipẹ yira kotuughạ ghan bọ eten dị yira komooghọm suọ.

8. Ika kụ idị ewạ mọ yira otuughạ ghan Otu Okoriom mọ, kụ ika kụ idị oḍighi iduọn phọ k’engọ nyinạ suọ?

⁸ Ituughạ phọ pọ amem dị oye phọ amaạr alher rurụ obọ anaghanạn iyaạr phọ atuạn bọ kụ rabạl esi phọ. I/ḍighi oopho aạl ghan bịn ogonyị ariisi phọ ophanyanaạn phọ odi bọ. Esi omaạm, mem dị nạ raakolobian ituughạ Otu Okoriom mọ, pụr ghan aạl anaghanạn oghaạph ookaragh emhuoghaạph phọ. Ipẹ reten, kụ amaạr aaḅeghiọn aphogh emhuoghaạph ekpịgh ituughạ phọ, ibạm arumhuoghaạph phọ ḅilhẹ r’asipuru ooḅula phọ. Kụ amaạr amiigha loor aạl oomo emhuoghaạph phọ. Kikiriom ghan ni aphogh esi phọ eghaạph bọ ilọ iyaạr phọ rotuughạ bọ, egbor retọl ghan siphẹ iḅẹl egu ikpo onhụ phọ edi bọ torobọ eḅẹl ekpịgh phọ. Esi phọ eghaạph bọ ilọ iyaạr phọ rotuughạ bọ keloghonaạn nyinạ ḍighaạgh olhegheri ipẹ ekpịgh phọ rekaạph bọ. Mem dị nạ rabạl emhuoghaạph phọ, maạr ghan aḅiila aphogh ipẹ torobọ ekpịgh ebakị bọ ibạm arumhuoghaạph phọ r’ipẹ ekomọm bọ ekạr emhuoghaạph phọ. Lọgh ni elhegh torobọ ekpo onhụ obobọ esi dị ewạ mọ kiạ awaaghị aphogh obobọ emhaạr eegholaan.

9. (a) Eeghe kụ iḍighi kụ ewạ bọ ni mọ yira omhaạr ghan ni oḅiila ophogh riisi aBaibul phọ mem dị yira rotuughạ Otu Okoriom mọ, kụ ika kụ idị yira kotue oḍighi iduọn phọ? (b) Odaphạn ipẹ yira aạl bọ siphẹ Joshua 1:8, eeghe kụ edị ewạ mọ yira oḍighi ghan, mem dị yira aạl esi aBaibul?

⁹ Ituughạ Otu Okoriom mọ riloghonaạn ghan  iyira ḍighaạgh onaghanạn aBaibul phọ. Esi iduọn phọ, kạr ghan alher rurụ angọ riisi aBaibul phọ, ekạr ekpaariọm ipẹ oḅẹm bọ m’aạl phọ mem dị rotuughạ siphẹ ookpomoghan phọ. Maạr ghan akiririom aphogh ipẹ ikpanạ ikpo onhụ phọ obobọ iphedị phọ ikpo onhụ phọ edi bọ siphẹ esi aBaibul phọ aạl bọ, ebakị ephigh iyaạr phọ ekpịgh phọ rekaạph bọ. Dị epelom siẹn, lọgh ghan mem agbirima esi aBaibul phọ nạ aạl bọ, kụ aatughiạn ipẹ nạ katue bọ asighẹ aḍighinhom siphẹ aghuḍum mọ anạ.—Bạl Joshua 1:8.

10. Odaphạn ipẹ yira aạl bọ siphẹ Hibru 5:14, eeghe kụ iḍighi kụ ewạ bọ ni mọ aburudẹ r’aburunhiin olhọgh ghan ni mem otughemị ibạm anmụny phọ abidị ilọ owaaghị ghan araraạr ophogh, mem iiseeny eghunotu?

¹⁰ Eten dị eegholaan ni, aburudẹ r’aburunhiin okạr kụ rowạ ghan dị ibạm anmụny phọ abidị kokelọm ghan Ituughạ Eghunotu phọ abidị torobọ awiki. Esi iduọn phọ, aburudẹ r’aburunhiin oomo amem okparaghạ ghan ni oḍighi idị ibạm anmụny phọ abidị kokelhọm iiseeny eghunotu phọ, kuolọ iduọn phọ pọ u/ḅẹm mọ bidị komoọgh ghan raraạr dị bidị koḅarạm ghan torobọ amem oḍạ aḍiḅeraạn ibạm anmụny ph’abidị. Kotue ni opogh JW Brokastịn olọ unwanyụ phọ bịn, obobọ omoọgh iyaạr dị kokạ siphẹ IIseeny Eghunotu phọ, idiphọ oghuugh phọ aNoa, emạn kẹn ni maạr dị kotughemị ghan ibạm anmụny phọ idị bidị kotuughạ ghan. Esi omaạm, ewạ mọ bidị olhegheri idị bidị kookolobian ghan kụ ogbi oghị ituughạ, obobọ idị bidị kotue owaaghị omiịn ophanyanaạn asipuru dị opuru bidị epẹ otu askul phọ. (Bạl Hibru 5:14.) Eḍighi maạr dị bidị olhọgh ghan mem otuughạ epẹ iloghi aruutu phọ abidị, kedughanaan ni bidị olher arurụ ongọ ipẹ rotuughạ bọ epẹ otu ituughạ, ookpomoghan eghir, ḅilẹ r’arookpomoghan eephugh phọ, ghalamọ i/ḍighi ni edị koḍeenaan vidio. Onhụ amem mọ kosighẹ ghan bọ otughemiọm obumoọny phọ ekasiạn ghan r’asiạ phọ obobọ aroozọ obumoọny phọ.

11. Eeghe kụ iḍighi kụ emạn bọ ni maạr dị yira kotughemị ghan nmụny askul aBaibul phọ yira, ilọ ophạm ghan ituughạ ilọ aloor abidị dị emoon?

¹¹ Emoghi kẹn ni dị buphẹ yira rotughemhị ghan bọ Baibul phọ kolegheri ilọ otuughạ ghan. Mem dị purukụ yira omhiigh otughemị abidị, reḅaạl ghan ologhi ayira omhiịn dị bidị ogonyị riisi phọ ophanyanaạn phọ odi bọ, mem dị yira oghị otughemị abidị r’amem dị bidị oru ituughạ. Kuolọ ewạ ni dị yira kotughemị aani bidị ilọ owaaghị ghan araraạr ophogh r’idị bidị kotue ghan opạm ituughạ ilọ aloor abidị dị emoon. Yira oḍighi iduọn phọ, pọ mem dị iiḅaghamị emite, kparipẹ roogboriom oghị owạ oye dị kaloghonaạn bidị ḍighaạgh, bidị kolegheri ni ilọ oghị owaaghị ophanyanaạn phọ ophogh ḍiọ abidị.

12. Yira utụ eeghe kụ rotuughạ ghan bọ?

¹² Eḍighi maạr dị rekparanaạn ghan nyinhạ otuughạ aḍinyạ, nạ ka/miịn odọ idị otuughạ aḍinyạ redụgh ghan. Kuolọ nạ katue ni. Miighom aạl ghan eẹny enụm bịn, esighẹ rekị kụ amhiigh obughẹ amem mọ nạ ralọgh ghan bọ. Legheri ni iyaạr phọ nạ atụ bọ kụ ratuughạ. Ekpanạ iyaạr phọ yira otụ bọ kụ rotuughạ pọ oḍuraan okpulạn aZihova. Enhọn iyaạr dị k’inyu iyira otuughạ pọ, ophagharanaạn aḍipuru oye obobọ owaaghị omhiịn ilọ iiḅaghamị dị yira osoman.

13. (a) Kaạph aghol radạ dị onyọ iḍoọgh kagbariọn orue ogbạ omeremị omeeraam mọ odị epẹ askul phọ abidị. (b) Ika kụ idị nạ katue asighẹ aḍighinhom oroma phọ odi bọ siphẹ Kolosị 4:6?

¹³ Esi omaạm, nạ aḍighi ni onyọ iḍoọgh dị rakị ghan askul ḍughụm? Eeni oomo abuọ ekụ anyina omeeraam mọ iyaạr iḅuạ iyaạr kụ eten iyaạr. Keḅeraạn ni nyinạ oghaạph iyaạr phọ nạ atụ bọ kụ ameeraam m’ulhẹm ni iyira, idiphọ aBaibul phọ aghaạph bọ, kuolọ eeni nạ aloghoma mọ nạ o/legheri iyaạr oghaạph. Bịn m’ewạ mọ kiạ atuughạ! Eeni nạ atuạn iyạl araraạr kụ ratuughạ bọ: (1) okparamị omeeraam mọ anạ mọ Enaạn kụ ikạr ri elhẹm oomo araraạr (2) obọ nạ atue agbạ ameremhị igey phọ. (Rom. 1:20; 1 Pit. 3:15) Kụ iḍighi kụ ewạ mọ puruan loor mọ, ‘Eeghe kụ iḍighi kụ abuọ ekụ phọ ayoor omeeraam bọ mọ iyaạr iḅuạ iyaạr kụ eten iyaạr?’ Kụ amiigha loor awaaghị raraạr aphogh siphẹ arinyạ phọ ayira. Bịn kedughanaan ni nyinạ ogbạ omeremị omheeraam mọ anạ eten dị nạ u/sere olhoghi. Ibadị umeeraam mọ iyaạr iḅuạ iyaạr kụ eten iyaạr loor esi dị oye dị bidị olọgh eegu iboom kụ aghaạph. Nạ katue ni asighẹ iyạl ikpo ariphigh phọ ipẹ nạ awaaghị bọ amiịn angoọm ophagharanaạn dị agbaanyạn, oye dị akạr rawạ olegheri igey phọ.—Bạl Kolosị 4:6.

14-16. (a) Ika kụ idị nạ katue akạr atuughạ alegheri ilọ aḍinyạ aBaibul dị nạ u/kạr ulegheri? (b) Esi osighẹ oḍighinhom ariisi aBaibul phọ edi bọ siẹn phọ, kaạph aageliọn ipẹ nạ katue bọ anaghanạn ḍinyạ phọ Emos eten dị eegholaan. (Miịn kẹn igbe phọ “Ḍighi idị Ikpo Onhụ phọ Enaạn K’eḅạ Eye.”)

¹⁴ Oḅẹm mọ wiki phọ opọ ratu bọ yira kotuughạ ilọ aḍiniin aḍibạm aḍinyạ imiịn phọ otu ituughạ, eeni aḍidị nạ u/kạr ulegheri. Eeni eḅẹl edạ phọ pọ obughẹ eephuạ phọ anạ olegheri ilọ ipẹ oyil phọ agẹ bọ. Ika kụ idị nạ katue bọ aḍighi iduọn phọ?

¹⁵ Eḅẹl phọ, puruan loor mọ: ‘Mị alegheri eeghe ilọ ogeọm aḍinyạ phọ? Odị aḍighi ghan eeghe oye, arọl ghan eghẹn, aḍighi ghan eeghe odọ oḍighi?’ Olhegheri ilọ oye phọ agẹ bọ ḍinyạ phọ keloghonaạn nyinạ ḍighaạgh onaghanạn ikpo onhụ phọ r’oghaạph omaamiọm mọ odị aḍighinhom bọ. Mem dị nạ rabạl Baibul phọ, gon ghan omhiịn ikpo onhụ dị eeghironaan raagharạ ogeọm mọ.

¹⁶ Edị etum siphẹ, olhegheri amem mọ ogẹ bọ ḍinyạ phọ keloghonaạn kẹn nyinạ ḍighaạgh. Nạ katue ni aḍighi iduọn phọ esi ophogh ghan “Edeọm Arinyạ ABaibul phọ” edi bọ ipoḍi phọ 1662-1663 siphẹ aNew World Translation of the Holy Scriptures phọ. Oḅarạm isiẹn, nạ atue ni apogh igbe phọ eḍeenhaan bọ riil phọ r’araalạ phọ siphe Apendịs A6 ipoḍi phọ 1744-1747. Eḍighi maạr dị aḍinyạ phọ nạ ratuughạ bọ eḍighi ḍiọ imiịn, pọ kenighẹ ni dị nạ kalegheri ipẹ asidọl awe phọ erọl bọ mem mọ ogẹ bọ ḍinyạ phọ. Eeghe ikarạph aroozọ r’iḍighinhom araraạr kụ edị Enaạn erom bọ oyil phọ mọ aalemi? Abuọ anhiạn r’odị kụ urọl bọ eniin phọ amem mọ? Okạr olegheri oomo ipẹ emite bọ, pọ ewạ mọ balạm inhọn arinyạ aBaibul phọ. Esi omaạm, eḍighi maạr dị nạ rawạ okạr olegheri ipẹ emite bọ mem mọ oyil phọ Emos arọl bọ, pọ nạ kamooghọm ni suọ esi aalạm inhọn arinyạ aBaibul idiphọ, 2 Kings r’2 Chronicles, ipẹ ogeeghị bọ siphẹ ogbo aḍinyạ phọ Amos 1:1. Oḅarạm isiẹn,  nạ atue ni apoghom ḍinyạ phọ aHosia, opọ eeni arọl aani ni bọ mem mọ Emos. Oomo phọ iphẹn phọ keloghonaạn nyinạ ḍighaạgh olhegheri ipẹ asidọl phọ erọl ghan bọ mem mọ Emos.—2 Ki. 14:25-28; 2 Chron. 26:1-15; Hos. 1:1-11; Amos 1:1.

17-18. Esi osighẹ oḍighinom areḍeenhaan phọ ogọ bọ siẹn phọ obobọ eḍeenhaan elọ anạ, kaạph amaaniọm idị ozuumaam ongọ araraạr dị eghịgh mudị ekom ni iboom, ketue eloghonaạn nyinạ ḍighaạgh oghelọm ituughạ aBaibul phọ anạ.

¹⁷ Enighẹ ni otuughạ ghan aBaibul phọ r’eephuạ olegheri obughẹ. Esi omaạm, oḅẹm mọ nạ rabạl ghan ḍinyạ imiịn phọ aZekarayạ, emhụ phọ eḍighi bọ 12, eghaạph bo ilọ aḍuugh aMezaya phọ. (Zech. 12:10) Mem dị nạ aạl asi ekpịgh phọ 12, eḅẹm bọ mọ “eghun otu k’aNetan” kokạr kụ omoghi mem mọ aMezaya phọ kamugh bọ. kparipẹ r’oogborion aạl ikpo onhụ phọ ipẹ bịn, nạ katue ni akoriom kụ apuruan loor mọ: ‘Eeghe kụ igbolomaam otọ k’aNetan r’aMezaya phọ? Eten edi ni olegheri abughẹ ḍughụm?’ Nạ atue ni awaaghị iịny araraạr amiịn. Siphẹ ogbo aBaibul phọ ephạm bọ inhọn ariisi aBaibul phọ, nạ kamiịn ni 2 Samuel 5:13, 14, dị eghaạph mọ aNetan aḍighi oniin oọny aDevid. Enhọn esi dị edi siphẹ phọ pọ, aLuk 3:23, 31, siphẹ phọ eḍeenaan mọ aNetan ogbogh odẹ aZizọs dị eego esi aMeri. (Miịn riisi oghị omiịn ophanyanaạn asipuru aḍinyạ ituughạ adọl aghuḍum mọ opọ aJune 2018, opoḍi phọ 5 Anhiạn kụ odẹ aJosef?) Kụ iphẹn phọ eḅeraạn nyinạ! Nạ alegheri ni mọ imiịn phọ ighaạph ni mọ aZizọs aḍighi eemarạ eemarạ aDevid. (Mat. 22:42) Kuolọ aDevid amhạr ri nmụny dị opel li 20. Eḍighi ni iikia iduọn aZekarayạ amạ bọ iyaạr phọ eḍighi bọ kụ otọ k’aNetan komoghi bọ ḍuugh phọ aZizọs ḍughụm?

 ¹⁸ Ḅeeḅeghiọn enhọn eḍeenhaan. Siphẹ eḅẹl emhuoghaạph phọ aLuk, yira aạl mọ okpaạny phọ aGebriel ateẹny ni Meri kụ aḅenị idị egbolomaam oọny dị odị k’amạr mọ: “Odị kaḍighi ni ogbogh. Egbogh Enaạn phọ kekol nyodị mọ Oọny onọ, kụ Enaạn Omoọgh-we phọ kengọ ni nyodị agadạ odaạm emạ, idiphọ aDevid ogbogh odẹ phọ odị. Odị kụ kadạ eemarạ aJekọb k’agee-pọ. Edaạm emạ phọ odị eekuna ke/tọl.” (Luk 1:32, 33) Etue ni inyu iyira ogbon oḅẹl apakirị adom mọ aGebriel eḅẹm bọ mọ, “Egbogh Enaạn phọ kekol [Zizọs] mọ Oọny onọ.” Kuolọ aGebriel aḅilhẹ ni aḅarạm siphẹ imiịn phọ mọ aZizọs “kadạ” idiphọ Uw-emhạ. Kụ iḍighi kụ yira otue ni opuruan loor mọ aMeri phọ aatughiạn ghan ika mem mọ aGebriel aghaạph bọ iduọn phọ? Odị aatughiạn ghan mọ aGebriel raḅẹm ghan mọ aZizọs kasighẹ esi Uw-emhạ phọ Herọd—obobọ esi oniin oolạ siphẹ Izrạl ḍughụm? Eḍighi maạr dị aZizọs aḍighi uw-emhạ, p’iduọn phọ aMeri kụ kaḍighi ukueni anhịr, kụ eghun otu abidị otọl ghan siphẹ ogiga uw-emhạ phọ. Ghalamọ r’iduọn phọ ni, igẹ i/lo esi dị eḍeenhaan mọ iitughiạn dị erọl idiphọ irọl li olhoghi aMeri; obobọ mọ aMeri apuru ni Gebriel ilọ aḍigbogh adọl epẹ Omhạr phọ idiphọ iyạl abutelhedom aZizọs oḍighi bọ. (Mat. 20:20-23) Iphẹn phọ egananami iḍeenhaan iyira mọ aMeri akạr kụ aḍighi anhịr osooromi aloor!

19-20. Idiphọ oghaạph bọ siphẹ Jems 1:22-25 r’4:8, yira otuạn eeghe kụ rotuughạ ghan bọ?

¹⁹ Ka/bula mọ ekpanạ iyaạr phọ yira otuạn bọ kụ rotuughạ Baibul phọ r’arinyạ phọ ayira, pọ oḍuraan otuman aZihova. Yira oḅilhẹ kẹn rowạ olhegheri odọ phọ “ipẹ [yira] orọl bọ” ḅilhẹ r’araraạr dị ewạ m’onmeeghi siphẹ adọl aghuḍum mọ ayira, obọ yira oḅeraạn Enaạn. (Bạl Jems 1:22-25; 4:8.) Tutụ yira komiigh ituughạ phọ, ophụr ghan olọm mọ aZihova ungọ iyira uwaloor phọ odị. Yira olọm ghan mọ odị uloghonaạn iyira ḍighaạgh omooghọm asuọ ipẹ yira kotuughạ bọ, ḅilhẹ omiinạ siloor ayira eten phọ epẹ odị umiịn bọ iyira.

²⁰ Eḍighi idị oomo ayira kotọl idiphọ oye Enaạn phọ opọ okọ suọr phọ aghaạph bọ ilọ odị mọ: “Aḍiḅeraạn odị edi ghan siphẹ olhogh phọ aZihova, kụ Odị rabalạm ghan olhogh phọ eḍọgh ude ḍughul r’ootaany. . . . Torobọ iyaạr dị odị aḍighi kemoọgh ni ekol.”—Ps. 1:2, 3.