IGON GHAN!
2022: Alhạ Iiḅaghamhị—ABaibul phọ akaạph aani eeghe?
Lhạ phọ 2022, ilọ araaghạm, aḍikparamhinheẹn, r’ophueghị amarugh phọ ukitonhom bọ iyira kụ imuza siphẹ iinhaghạn phọ. ABaibul phọ bịn kụ agbạ aagelhemhị emhụ araraạr phọ remite bọ.
Emhụ araraạr phọ emiteghu bọ 2022
Araraạr phọ emiteghu bọ lhạ phọ eten bọ ekạr kụ eḍeenhaan mọ yira odi mem dị aBaibul phọ aghol mọ “aruukuna phọ.” (2 Timoti 3:1) Amem mọ amuphẹ phọ imhiigh 1914. Miịn idị araraạr dị remiteghu nyiidiphọ phọ etuụgh bịn ekasiạn r’idị aBaibul phọ aghaạph ilọ amem mọ yira odi bọ:
“Araaghạm.”—Matiu 24:6.
“2022 Kụ Alhạ Dị Oḅilhẹ Omhiịn Etirom Aḍuugh Aḍuugh Phọ Eghạm Emhoọgh Bọ Epẹ Europe.” a
Miịn emhuoghaạph phọ “Russia Invades Ukraine.”
“Igbakurọ.”—Matiu 24:7.
“2022: Alhạ igbakurọ dị k”omiịn ghan.” b
Miịn emhuoghaạph phọ “Eghạm Mọ Edi Bọ Ukraine Mebughẹ Ekuom Eḍien Phọ Edi Bọ Oomo Aḅirinhi Phọ.”
“Areezẹgh ogogo.”—Luk 21:11.
“Ezẹgh agbensẹ [polio] iḅilhẹ ni emite, edị oghol mọ omheel uke [monkeypox] aapaany ḅilhẹ aCOVID-19 aghiọm ghisigh aguulhemhi we, kụ iphẹn phọ eḍeenhaan idị areezẹgh dị reeteneghian ghan reekperemhi we eḅilhẹ eḍighi ooto r’osooromineen.” c
Miịn emhuoghaạph phọ “6 Irubal Awe Phọ ACOVID Phọ Azẹ Bọ.”
Araraạr aruugu.”—Luk 21:11.
“Eboom eghologhọl, onhuughị iizuphạ, aniạn onuzạ, r’amuụm aḍigho. Yira ko/tue obulha 2022 loor esi dị mekọm muphe dị ko/tue ogbi omuneni, ḍuugh asimuunịr awe, eḅilhẹ eḍighi idị irubal awe moroḅologhi ruutu abidị.” d
Miịn emhuoghaạph phọ “ Oomo Isiẹn Aḅirinhi Phọ Okuaḍio Phọ Akolhoghọl li Apu Idị Erọl Ghan.”
“Igbaragbarạ.”—Luk 21:9.
“Oboom ophinolhoghi awe phọ loor aḍikparaminheẹn adọl phọ, ekạr ekpaariọm loor iduọn asiḍighi araraạr eghị bọ anyụ, iḍighi idị awe osarạgh iboom igiri e”meeraam oghị esi abuọ itooghị phọ lhạ phọ 2022.” e
Miịn emhuoghaạph phọ “ Oomo Aḅirinhi Phọ Asiḍighi Araraạr Rekị Ghan Bịn Anyụ.”
Alhạ phọ aḍiẹn retu bọ ketọl ika?
Onyọ ayira o/lo dị katue akaạph idị kemite lhạ phọ 2023. Kuolọ yira olegheri mọ moọny amem Omhạr phọ k’Enhaạn itooghị k’akẹ phọ kenmeeghi ni raraạr siẹn ade phọ. (Daniel 2:44) Itooghị phọ ipẹ phọ kekunughi ni raraạr phọ ipẹ phọ rekọm ghan bọ iminimiịn kengọ omạr awe kụ eḍighi idị ogbi phọ Enhaạn kụ kasighẹ dọl siẹn ade phọ.—Matiu 6:9, 10.
Yoor rilọm ni inyinha kokpaariọm mọ idaphạn oroma phọ aZizọs Kraist aḅẹm bọ mọ “ogona ni loor” iduọn araraạr phọ remiteghu bọ aḅirinhi phọ remuneni bọ imiịn aBaibul phọ. (Mạk 13:37) Ka/lẹ, nạ atue ni uteẹny iyoor ilọ otuughạ obughẹ idị aBaibul phọ katue aloghonhaạn nyinhạ ḍighaạgh nyiidiphọ ḅilhẹ r’idị katue aloghonhaạn ḍighaạgh eghunotu anạ omhoọgh ogey oḍuomolhoghi ilọ imạ aghisigh.
a AP News, “2022 Alhạ Dị Oḅilhẹ Omhiịn Etirom Aḍuugh Aḍuugh Phọ Eghạm Emhoọgh Bọ Epẹ Europe,” Jill Lawless, kụ aghaạph, December 8, 2022.
b World Food Programme, “Ekuom Eḍien Phọ Edi Bọ Oomo Aḅirinhi Phọ.”
c JAMA Health Forum, “Yira Odị Mem Areezẹgh—Emhiigh COVID-19 kụ esi Monkeypox, Polio, r’Ezẹgh X,” Lawrence O. Gostin, JD, kụ aghaạph, September 22, 2022.
d Earth.Org, “Eeghe Kụ Ikọm Bọ Okuaḍio Phọ Agholhoghọl Bọ Apu Idị Erọl Ghan Oomo Isiẹn Aḅirinhi Phọ 2022?” Martina Igini, kụ aghaạph, October 24, 2022.
e Carnegie Endowment for International Peace, “Ophinolhoghi Esi Iduọn Asiḍighi Araraạr Rekị Ghan Bịn Anyụ Oomo Aḅirinhi phọ Mekọm Igiri e”meeraam 2022,” Thomas Carothers r’aBenjamin Feldman, kụ ughaạph, December 8, 2022.