IGON GHAN!
Abugbaanhaạn AZihova r’Abuọ AJu Phọ ANazi Ozeeghị Bọ—ABaibul Phọ Akaạph Aani Ika?
Ibadị areelhe siẹn aḅirinhi phọ, January 27, 2023, awe kookpomhoghan ni ootughiạn ibadị awe phọ aNazi ozẹ bọ. Igbogh ikarạph phọ iphẹn emite bọ 75 asiạ epẹ omhạn etue ni eḍighi idị nạ kaakia iyaạr phọ eḍighi bọ kụ Enhaạn amheera bọ mọ ozẹ ibadị awe iduọn.
Orue omhiịn idị aBaibul phọ aghaạph, bạl emhuoghaạph phọ “Uḍighi Ika Kụ ANazi Ozeeghị Bọ Buọ AJu Epẹ Omhạn? Uḍighi Ika Kụ Enhaạn O/sophoghom Bọ?”
Abuọ aJu phọ kụ uḍighi we dị okạr omhiinhọm iboom mem mọ aNazi ozeeghị bọ we. Ukạr ri olhegheri kụ ozẹ irubal abuọ aJu phọ. Abuọ aNazi phọ uḅilhẹ ni ozeeghị bunhọn awe epel buọ aJu phọ. Abuniin abudị oḅilhẹ ozeeghị pọ Abugbaanhaạn aZihova, umiinhẹ bidị loor esi omheeraam mọ abidị okpasị bọ siphẹ aBaibul phọ.
Olhegheri obughẹ, bạl emhuoghaạph phọ “What Happened to Jehovah’s Witnesses During the Time of the Holocaust?”
“Ogey aghisigh ḅilhẹ r’oḍuom olhoghi”
Ibadị awe rokiilhaan ghan ni mọ araraạr phọ ipẹ emite bọ mem mọ aNazi ozeeghị bọ buọ aJu phọ keḅilhẹ ni emite. Toroboiperolbọ, aBaibul phọ aguanhaan ni mọ epẹ ghisigh, idọ iiḅaghamhị phọ iphẹn phọ ke/mite ghan mun.
“‘Mị alegheri ni igbiighi dị mị imhooghaạn inyinha,’ ipẹ kụ idị aZihova aḅẹm, ‘igbiighi eephọ ki/lọ iiḅaghamhị, ongọ anyinha ogey aghisigh ḅilhẹ r’oḍuom olhoghi.’”—Jeremiah 29:11. a
Oḍuom olhoghi phọ ophọn phọ kamunhughan mem di aZihova Enhaạn phọ asiemhi eekunha oomo ekarạph eḍighinhom araraạr kụ aḅilhẹ aḍighi idị iiḅaghamhị phọ araraạr phọ iphẹn phọ ekọm bọ ke/tọl mun. Moọny amem Odị:
Kapiemhi ni oomo abuẹn rokọm ghan bọ iiḅaghamhị kongọ bunhọn.—Proverbs 2:22.
Kasiemhi eekunha oomo imhinhimhiịn.—Ogananami 21:4.
Kaḅerion angọ ghuḍum buphẹ momhuughu bọ dị kotọl siẹn ade phọ.—Jọn 5:28, 29.
Nạ katue ni aḍuom olhoghi oguan phọ ophọn aḍighi bọ olọ iidereghị, odi bọ siphẹ aBaibul phọ. Orue olhegheri iyaạr phọ eḍighi bọ, yoor romhạgh ni nyinhạ otuughạ aBaibul phọ r’olhoghonhaạn aḍighaạgh otughemhiạ, dị ikpoki ro/boor.
a Aḍikaraghị aḍien Enhaạn okol mọ aZihova.—Psalm 83:18.