IGON GHAN!
Itạph Dị Emite Otu Askul—ABaibul Phọ Akaạph Aani Eeghe?
Unwanyụ aMay 24, 2022, eepoghomhinheẹn iyaạr imite ni ebạm emhạ Uvalde, Texas, U.S.A. Odaphạn idị anewspaper dị oghol mọ The New York Times, aghaạph, “oye iinhian dị u/legheri azẹ ni 19 ibạm anmụny r’iyạl abutughemhiạ . . . epẹ Robb Elementary School.”
R’okururu ni, idọ phọ araraạr aḍiigu phọ iphẹn phọ egbor ri remite ghan. Anewspaper dị oghol mọ USA Today akaạph aani mọ ogina aUnited States bịn, “itạph dị emite otu askul iḍighi 249 lhạ phọ aḍiphẹ eten bọ—dị k”erọl ghan inhọn asiạ egbi kạ 1970.”
Uḍighi ika kụ araraạr dị eeph onhaghạn remiteghu ghan bọ? Yira kodaluạn ika iḍighinhom araraạr asipioghọm mọ iphẹn phọ? Oḍuom olhoghi odi ni mọ iigamhanhiạn kesi ni eekunha? ABaibul phọ angọ ni ophanyanhaạn asipuru phọ iphẹn phọ.
Uḍighi ika kụ iigamhanhiạn rebụgh bọ iboom aḅirinhi phọ?
ABaibul phọ aḅẹm mọ asiḍio phọ iphẹn yira odi bọ asiḍio “aruukuna” dị ibadị awe “ko/moọgh ghan igbiririph”, kuolọ komoọgh ghụn “igbagbaar,” kụ oḍighi yogh ghan raraạr eten iigamhanhiạn. Awe dị omhoọgh idọ araagharạ phọ iphẹn phọ “kologhorị ghan ni bịn okiọm ghisigh.” (2 Timoti 3:1-5, 13) Olhegheri obughẹ, bạl emhuoghaạph phọ “ABaibul Phọ Aghaạph Ni Ipẹ Awe Kootughiạn Ghan Bọ Oḅilhẹ Kozọ Rodon Ḍughụm?”
Ibadị ropuru ghan ni mọ, ‘Eeghe kụ iḍighi kụ Enhaạn re/sophoghom ghan bọ ikarạph araraạr idiphọ oraḅạl awe otu askul ozẹ?’ Omhiịn ophagharanhaạn aBaibul phọ, pọ bạl emhuoghaạph phọ “Eeghe Kụ Iḍighi Kụ Ikarạph Araraạr Remitenhaan Ghan Bọ Igey Awe?”
Ika kụ idị yira kodaluạn ikarạph iḍighinhom araraạr phọ iphẹn phọ?
“Torobọ iyaạr Iọ ogẹ siphẹ aḍinyạ iigbia phọ, ugẹ otughemiọm ghan ayira, pidị yira otuạn . . . akpọ olhoghi phọ oghaạph aḍinyạ iigbia phọ rungọ ghan bọ iyira omoọgh oḍuom ologhi.”—Rom 15:4.
Asinhị iilhogh aBaibul phọ ketue ni elhoghonhaạn nyinhạ ḍighaạgh odaluạn iigamhanhiạn aḅirinhi phọ. Pogh Awake! phọ emhuoghaạph phọ eḅẹm bọ mọ “Iigamhanhiạn Kesi ni Eekunha Ḍughụm?” otuughạ obughẹ.
Omhiịn araraạr dị odẹ r’onhiin kotue oḍighi olhoghonhaạn aḍighaạgh ibạm anmụny abidị ophamhaghạn ooḅaghamhiạn aloor ikarạph iinhaghạn, pọ bạl emhuoghaạph phọ “Iinhaghạn Dị Eeph R’ibạm Anmụny Phọ Anạ.”
Iigamhanhiạn kesi ni eekunha?
“Odị kapẹl bidị asighẹ esi ikpuuroghọm r’iigamhanhiạn.”—Psalm 72:14.
“Bidị kogurọgh isiko abidị otene iguphom, isọph abidị otene silekẹ osạm. Areelhe k/okị mun eghạm, k/ookolobian mun ilọ elephiri.”—Micah 4:3.
Enhaạn kaḍighi ni ipẹ awe k”orue bọ oḍighi. Omhạr k’akẹ phọ Odị kapiemhi ni oomo araraạr eghạm aḅilhẹ asiemhi eekunha iigamhanhiạn. Olhegheri obughẹ ilọ araraạr phọ Omhạr phọ k’Enhaạn kaḍighi bọ, bạl emhuoghaạph phọ “Eeḍiạn Omhạr Phọ Enhaạn ‘Eephọ Kemuza Ni.’”