January 24, 2023, awe asayẹns udụr Asokeẹny Adumsdee a phọ oseere 90 onyam oḅatạn oteẹny ogbo aḍughul, oḍeenhaan mọ eekunha aḅirinhi phọ mekpụl.

•   “Tusdee phọ kụ edị oḍur ‘Asokeẹny Adumsdee’ phọ raḍeenhaan ghan bọ iiḅaghamhị dị omhạr awe osoman, otumeriom ogbo aḍughul loor esi eghạm mọ edi bọ epẹ Ukraine, oghiilaan araraạr amuphe dị kotue ni otạph olọgh epẹ okuaḍio phọ, ḅilhẹ r’iiḅaghamhị dị iphẹn phọ rengọ de phọ.”—AFP International Text Wire.

•   “Abuọ ituughạ aSayẹns uḅẹm Tusdee phọ mọ esugha 90 onyam oḅatạn dị ‘Asokeẹny Adumsdee’ phọ kateẹny ogbo aḍughul, bịn amuphe oomo aḅirinhi phọ mamhiigh.”—ABC News.

•   “Abuọ ituughạ asayẹns dị oḍighi buọ areelhe kirokirọ opụr ri rurụ mọ aghuḍum omhạr awe maḍigh esi ooto r’osooromhinheen nyiidiphọ eten dị ke/rọl ghan.”—The Guardian.

 Eekunha omhạr awe r’ade phọ meteẹny ḍughụm? Rewạ ni dị yira kokiilhaan ipẹ kemite bọ ghisigh phọ? ABaibul phọ akaạph aani eeghe?

 ABaibul phọ aḅẹm mọ, “ade phọ ketọl k’agee-pọ” ḅilhẹ mọ awe “kotọl siphẹ phọ k’agee-pọ.” (Ecclesiastes 1:4; Psalm 37:29) Iphẹn phọ remạ ghan mọ awe ko/tue opiemhi de phọ obobọ oḍighi idị oomo ade phọ ke/nighẹ mun orọl.

 Toroboiperolbọ, aBaibul phọ akaạph ni akol ilọ eekunha amem. Esi omaạm, aḅẹm ni mọ “aḅirini phọ r’oomo aruuphuạ phọ odị rape.”—1 Jọn 2:17.

•   Olhegheri iyaạr dị eekunha aḅirinhi phọ remạ ghan siphẹ aBaibul phọ pọ bạl emhuoghaạph phọ “Is the World Coming to an End? What Is the Apocalypse?”

•   Olhegheri idị aBaibul phọ aghaạph ilọ amem dị araraạr kemiteghu siẹn aḅirinhi phọ, bạl emhuoghaạph phọ “When Will the World End?”

 ABaibul phọ katue ni ulhoghonhaạn iyira ḍighaạgh ophamhanhạm igey iitughiạn etigheri iiḅaghamhị phọ edi bọ siẹn aḅirinhi phọ. Ika?

•   ABaibul phọ ungọ ni iyira oroma dị yira kotue osighẹ oḍighinhom. (2 Timoti 3:16, 17) Esi omaạm, bạl emhuoghaạph phọ “How to Control Worry” omhiịn idị aBaibul phọ katue alhoghonhaạn nyinhạ ḍighaạgh ophamhanhạm igey iitughiạn etigheri ipaanhaạn dị nạ asoman.

•   ABaibul phọ angọ ni oḍuom olhoghi mọ aghisigh phọ kanighẹ ni. (Rom 15:4) Akaạph ni raraạr dị yira kotue ogon omhiịn nyiidiphọ r’epẹ ghisigh, kụ iphẹn phọ kilhoghonhaạn iyira ḍighaạgh ophamhanhạm igey iitughiạn etigheri iiḅaghamhị phọ edi bọ siẹn aḅirinhi phọ.

 Orue okạr omhooghọm asuọ ipẹ edi bọ siphẹ aBaibul phọ, pọ yoor romhạgh ni nyinhạ otuughạ aBaibul phọ r’olhoghonhaạn aḍighaạgh otughemhiạ, dị ikpoki ro/boor.