IGON GHAN!
Oomo Isiẹn Aḅirinhi Phọ Okuaḍio Phọ Akolhoghọl li Apu Idị Erọl Ghan—ABaibul Phọ Akaạph Aani Eeghe?
Unwanyụ aJuly 2022, torobọ ekụl aḅirinhi phọ ungọ ni iinhaghạn ilọ egholhoghọl okuaḍio phọ:
“Ophọn omhunhenhiom iyạl amem siẹn unwanyụ phọ ophọn phọ dị aChina m’ongọ iphụr arurụ ilọ egholhoghọl dị ketọl igbogh aramhạ dị repel 70.”—July 25, 2022, CNN Wire Service.
“Onuzạ ralheeghi li ibadị areelhe Europe loor esi iduọn egholhoghọl okuaḍio phọ rebụgh ghan bọ bịn.”—July 17, 2022, The Guardian.
“Ibadị igbogh aramhạ aUnited States ughaạph ni idị okuaḍio phọ agholhoghọl Sondi phọ iduọn egholhoghọl osoor phọ etir bọ East Coast phọ r’inhiin apakirị aSouth r’aMidwest.”—July 24, 2022, The New York Times.
Iphẹn phọ remạ ghan eeghe? Kesi ni esi dị oye ka/tue mụn atọl siẹn ade phọ? ABaibul phọ akaạph aani eeghe?
Egholhoghọl Okuaḍio phọ eḍighi aani ni imiịn aBaibul dị remunhughan ḍughụm?
Ii. Egholhoghọl phọ ephẹn etir bọ oomo aḅirinhi phọ ekạr kụ ekasiạn relhegh dị aBaibul phọ aḅẹm mọ kemite mem mọ amuẹn ayira. Esi omaạm, aZizọs amhiịn ni mọ yira kụ komhiịn ‘raraạr aruugu.’ (Luk 21:11; Ooḅi Oghaạph) Iduọn egholhoghọl phọ repogh ghan bọ obụgh obụgh awe momhiigh rokiilhaany mọ iiḍighi omhạr awe kepiemhi ni de phọ.
Kebilhẹ ni idị ade phọ ke/ḍighi mụn esi amarugh ḍughụm?
Eye. Enhaạn alhẹm de phọ meḍighi marugh oye k’agee-pọ. (Psalm 115:16; Ecclesiastes 1:4) Kụ kparipẹ romheera mawe ophiemhi, “kopiemi buphẹ ropiemi bọ aḅirini phọ,” ipẹ kụ idị odị aguanhaan.—Ogananami 11:18.
Ḅeeḅeghiọn inhọn iyạl imiịn dị eḍeenhaan raraạr dị Enhaạn aḅilhẹ aguan:
“Aradalạ phọ ḅilhẹ r’aḍigharaghạr ade phọ kebo ni, ḅilhẹ ade okpaghạ phọ kemoọgh ni ibo eḅilhẹ emuza r’odọ kirokirọ atuḍiil arooghọ.” (Isaiah 35:1) Enhaạn ka/meera ade phọ eḍighi ḍigharaghạr ade dị aghuḍum ka/tue atọl, kparipẹ ghụn odị kaselhemhi torobọ apakirị ade phọ dị emhoọgh iiḅaghamhị.
“Nạ amaạr rapogh ghan de phọ, kaḍighi idị kemuza riimuma ḅilhẹ kemaạr enuụm.” (Psalm 65:9) Raḍisẹph Enhaạn ade phọ keḍighi ni paradaịs.
Orue olegheri obughẹ idị onmeeghian okuaḍio phọ ramunhenhi imiịn aBaibul phọ, pọ bạl emhuoghaạph phọ “Onmeeghian Okuaḍio Ḅilhẹ R’aghisigh Phọ Ayira—ABaibul Phọ Akaạph Aani Eeghe.”
Orue olegheri obughẹ ilọ aruguanhan aBaibul phọ onhighemhị ade phọ, pọ miịn emhuoghaạph phọ “Anhiạn Kụ Kapẹl Bọ De Phọ?”