Fraidee phọ, February 24, 2023, kụ edị eghạm mọ aUkraine eḍigh ḍinhiin alhạ. Odaphạn iniin iinhaghạn, awe eghạm aUkraine r’aRussia dị momhuughu siẹn eghạm mọ romạn ni 300,000, kụ oopho awe dị momhuughu romạn ni 30,000. Toroboiperolbọ, awe dị momhuughu otue ni opel onhụ abạl phọ ongọ bọ.

 Idị ekạr bọ eeph, oye o/lho dị alhegheri mem dị eghạm mọ kesi eekunha.

•   “Rekị ni siẹn lhạ awe eghạm aRussia oḍigh bọ Ukraine, kụ i/kịgh mudị eghạm mọ ephẹn phọ kesi ni eekunha moọny amem. I/kịgh kẹn mudị agạ odi ni dị kotue okpạr opu eghạm mọ, kụ oghaạph ilọ osiemhi eekunha eghạm mọ obọ amuḅọph atọl k”orọl.”—NPR (National Public Radio), February 19, 2023.

 Kụ reeḅaghamhị ni ibadị awe iduọn eghạm mọ ephẹn phọ r’inhọn odọ araaghạm rekọm bọ iiḅaghamhị r’imhinhimiịn kirokirọ kengọ we dị u/legheri aani siẹn aḅirinhi phọ. ABaibul phọ ungọ iyira eeghe oḍuom olhoghi? Amem ketọl li dị eghạm ke/tọl ghan mun ḍughụm?

 ABaibul phọ akaạph ilọ eghạm dị kepẹl oomo awe, k/edị kepiemhi we. Eghạm mọ epẹ phọ okol mọ eghạm Amagedọn, kụ aBaibul phọ akaạph mọ eghạm mọ epẹ phọ kụ “eghạm mọ kesoor bọ ḍigbogh aḍio Enaạn oomo iikpọ phọ.” (Ogananami 16:14, 16) Dị eego esi eghạm mọ epẹ phọ, Enhaạn kesiemhi eekunha itooghị omhạr awe phọ mekọm bọ ibadị araaghạm dị ephiemhi sighuḍum awe. Otuughạ olhegheri idị eghạm Amagedọn kesighẹ eephọ k’agee-pọ etu, bạl rumhuoghaạph phọ iphẹn:

•   “What Is the Battle of Armageddon?”

•   “Armageddon Is Good News!”