Oomo isiẹn aḅirinhi phọ oghaạph imhirighan itooghị makọm ni madia igbo ibadị awe. Lhạ phọ 2022 aPew Research Center uwaaghị ni omhiịn mọ “65 abin awe dị momhuunha ukpe esi 19 areelhe dị mọ owaaghị, uḅẹm ghan ni mọ inonuan obobọ igbagarạ inonuan edi ni reelhe phọ abidị igbo awe dị obakị kirokirọ aruukụ imhirighan itooghị phọ.”

 Nạ mamhiịn ni dị imhirighan itooghị mekọm muboom amadia igbo awe ekool phọ nạ arugh bọ ḍughụm? Eeghe kụ rekọm ghan bọ iphẹn phọ? Eekonhom edi ni? Ḅeeḅeghiọn idị aBaibul phọ aghaạph.

 ABaibul phọ akaạph ni mọ siẹn asiḍio phọ ayira, rokol ghan bọ mọ “asiḍio aruukuna phọ” ibadị awe komoọgh ni roozọ dị kekparanhaạn bidị omhoọgh amuḅọph.

•   ‘Aruukunha phọ keḍighi ni ooto r’osooromineen. Awe kopomhoghiạn ni siloor, . . . ko/meeraam ghan mun ilọ ogeeghiạn.’—2 Timoti 3:1-3.

 Etigheri inyaạm mọ ibadị awe rolhọgh ghan bọ oḍighi idị agomẹt phọ kanighẹ, imạ re/ḍuạ ghan kemite. Awe dị ephoghom araraạr egbaranhaạn ro/tue ghan kokumuan r’amuḅọph oolhemhi iiḅaghamhị dị emite. Iphẹn phọ remeeraam ghan ipẹ aBaibul phọ aghaạph bọ k’epẹ omhạn.

•   “Oye maponhomhaam oye alhọgh esi imhinhimhiịn.”—Ecclesiastes 8:9.

 Toroboiperolbọ, aBaibul phọ akaạph ni akol ilọ eekonhom—agomẹt dị oye dị katue asiemhi eekunha imhinhimhiịn phọ omhạr awe kụ kadạ.

 ABaibul phọ akol li oḍiemhiom dị akạr asi amhanamhaạm: AZizọs Kraist. AZizọs phọ amoọgh iikpọ itooghị ḅilhẹ r’eephuạ oḍighi idị oomo awe komoọgh eephọ r’amuḅọph.

•   “Siḍio phọ ipẹ odị awe elhiom eḍighinhom iyaạr komuza ni, kụ eephọ etọl torobọ ekpisi.”—Psalm 72:7.

•   “Oomo areelhe phọ kokumu ghan nyodị.”—Psalm 72:11.

 AZizọs phọ omạ oḍiemhiom dị akạr akasiạn idị eḍighi bọ odị amoọgh ogbolhomhaam ḅilhẹ akạr rawạ ghan olhoghonhaạn aḍighaạgh buphẹ mozoọm bọ ekarạph eten.

•   “Odị katagharạn ni rukulom mọ rowạ bọ olhoghonhaạn aḍighaạgh, r’abuphẹ osoorom bọ kụ u/moọgh bọ oye olhoghonhaạn abidị ḍighaạgh. Odị kanmaanhaạn ni ighirigiir buphẹ osoorom bọ r’arukulom mọ, kụ apẹl sighuḍum abidị. Esi ikpuuroghọm r’iigamhaniạn odị kapẹl li bidị.”—Psalm 72:12-14.

 Tuughạ abughẹ ilọ omhạr phọ Enhaạn, gomẹt k’akẹ phọ opọ aZizọs kụ aḍighi bọ odaạm. Wạ amhiịn idị nạ katue amhooghọm suọ ḅilhẹ abakị aani itooghị phọ odị.

•   Pogh vidio phọ Omhạr Phọ K’Enhaạn P’eeghe?

•   Bạl emhuoghaạph phọ “God’s Kingdom—A Government With No Corruption.”