IGON GHAN!
AWorld Cup Phọ Katue Ni Akạr Aḅophoghị We Aḅirinhi Phọ Ḍughụm?—ABaibul Phọ Akaạph Aani Eeghe?
Awe dị romạn ni oogh eelạ kụ edị rogon mọ kopogh aani FIFA World Cup phọ kopegh bọ November 20 kụ eghị esi December 18, 2022. Ibadị awe ootughiạn mọ ephegh phọ ephẹn phọ reḍighi ghan ni idị epelhom oḅophoghị awe phọ abuphẹ ropogh aani bọ bịn.
“Ephegh emoọgh ni iikpọ dị ketue enme aḅirinhi phọ. Ketue ni enyu oye oḍighi iyaạr. Emoọgh kẹn iikpọ oḅophoghị awe eten dị egbatanhaạn.”—Nelson Mandela, aḍighi ghan president aSouth Africa.
“Ephegh abọl . . . reḅophoghị ghan we loor esi dị reḍighi ghan idị bidị kologhoma oḍuomolhoghi, ibo, ephuọm, keḍighi idị awe kopomoghiạn bunhọn awe, kụ oomo phọ abidị omoọgh ḍiniin aḍiigbu.”—Gianni Infantino, apresident aFIFA. a
AWorld Cup phọ obobọ enhọn edọ ephegh ketue ni eḍighi k’ipẹ k’ipẹ engọ we ḍughụm? Oḍuomolhoghi odi ni mọ awe komoọgh muuḅọph r’eephọ ḍughụm?
Ekạr ri reḅophoghị ghan we ḍughụm?
AWorld Cup arolhool phọ makọm idị awe rootughiạn ghan ilọ inhọn araraạr kparipẹ r’abọl phọ bịn. Areephegh phọ mekọm idị awe rokaaphọgh ilọ arikpisi r’itooghị dị egbolhomhaam elhiom awe, olhoghoḍị iiseẹny we, r’idị adọl iniin arikpisi enhighẹ epu inhọn.
Ghalhamọ r’iduọn phọ ni, ibadị awe rokelọm ghan ni reephegh dị etir oomo aḅirinhi phọ, idiphọ aWorld Cup phọ. Kuolọ areephegh phọ iphẹn phọ ke/tue engọ we muuḅọph dị katọl ghan bịn. Kparipẹ ghụn, areephegh phọ regananami ghan eegharạ amadia phọ aBaibul phọ aghaạph bọ mọ awe komoọgh siẹn “aruukuna phọ.”—2 Timoti 3:1-5.
Oḍuomolhoghi odi ni mọ oomo aḅirinhi phọ kokạr ri omoọgh muuḅọph
ABaibul phọ apamanạm ni okạr ogey oḍuomolhoghi ilọ amuuḅọph oomo aḅirinhi phọ. Aguanhaan mọ oomo awe isiẹn ade phọ komoọgh ni muuḅọph eeḍiạn agomẹt k’akẹ dị oghol mọ “Omạr phọ k’Enaạn.”—Luk 4:43; Matiu 6:10.
Otooghiạ Omhạr phọ opọ phọ, Zizọs Kraist kamiịn ni mọ eephọ etọl siẹn oomo aḅirinhi phọ. ABaibul phọ aḅẹm mọ:
“Abuọ elhiom eḍighinhom iyaạr koopaany ni, kụ eephọ eepaany.”—Psalm 72:7.
“Odị ratagharạn ghan ni rukulom lọ oru esi odị . . . Odị ratagharạn ghan bidị kasighẹ esi igbiphoghọm r’esi owạ asighiton.”—Psalm 72:12, 14.
Ghalhamọ arodon phọ ni, itughemhị phọ aZizọs mekạr kụ eḅophoghị irubal awe side dị emạn ni 239. Bidị motuughạ okporiọn araghaạgh mulhọgh ḍien. Otuughạ obughẹ, pọ bạl emhuoghaạph phọ “Breaking the Cycle of Hatred.”
a Fédération Internationale de Football Association, aloor phọ repogh bọ ephegh abọl oomo aḅirinhi phọ (okpor abọl).