The Watch Tower June 1, 1912 aghaạph mọ, “Eeni ibadị abuẹn robạl ghan bọ rinyạ phọ ayira olhegheri ni we dị eten ro/miịn ghan. Bidị kotue ni oteẹny ḍinyạ aạl oopho . . . . Rinyạ abuphẹ ro/miịn ghan bọ eten phọ ogeọm ikpo igẹ dị eḅuguluyogh obọ abuọ ikpom ariḍien phọ orue aạl.” The Watch Tower phọ aḅarạm mọ: “Ibadị abuphẹ eten ro/miịn ghan bọ okạr kụ osereghiạn dom mọ eḅẹm bọ mọ aḍio arughuenhian dị ephamhanhạm ḍisẹph retu ni siẹn aḅirinhi phọ.”

 Mem mọ ogẹ bọ ikpo-onhụ phọ ipẹ phọ, ko/mhoọgh eniin eten ogẹ ghan arinyạ abuẹn eten ro/miịn ghan bọ onhụ aḅekeeny. Kụ egbi oteẹny amem mọ amuphẹ phọ, Abugbaanhaạn aZihova momhiigh ni romiteom igey aBaibul phọ esi oḍighinhom “ikpo igẹ dị eḅuguluyogh”—ipẹ rogeọm ghan bọ rinyạ abuẹn ro/miịn ghan bọ eten. Kụ yira okiọm ni ghisgh roḍighi iduọn phọ! Nyiidiphọ yira omoọgh rinyạ abraille dị repel li 50 arunhụ aḍiaḅạ. Romiteom ghan ika?

 Eḅẹl edạ omiteom aḍinyạ abraille pọ otenhe igẹ phọ ikpo igẹ abraille. AMichael Millen odị rakumuan ghan r’Text Processing Services epẹ Patterson, New York aghaạph mọ “Epẹ omhạn, yoor uḍighinhom ghan software dị abunhọn awe kụ omiteom, kuolọ u/tue ghan usighẹ uḍighinhom oomo arunhụ aḍiaḅạ phọ yoor rowạ bọ. Nyiidiphọ yoor roḍighinhom ghan Watchtower Translation System, kụ kotue ni osighẹ oteneghiom ikpọ igẹ aBraille opol arunhụ aḍiaḅạ oomo isiẹn aḅirinhi phọ. Mị ameeraam mọ onhọn asoftware dị kotue osighẹ otomaạm nyoọn phọ o/lho.”

 Epel okạr adom mọ edi bọ ḍinyạ phọ, arinyạ abraille regbaạm ghan ni sifoto phọ edi bọ ḍinyạ phọ. Esi omaạm, okaạph ilọ afoto phọ edi bọ opoḍi aghisigh aḍinyạ phọ Kelhọm Ghuḍum K’agee-pọ! olọ abraille mọ: “Oye dị ramiigh orelhe eten dị ekulakulạ dị imạ iizuphạ edi ekeeny r’elhiom, eḅilhẹ emhoọgh roogbolhom r’araaḅarạph.” Jamshed, onyọ umor dị eten ra/miịn ghan, dị raloghonhaạn ghan ḍighaạgh ikumor awe ḅilhẹ rakọy ghan eten, aḅẹm mọ “Egbaạm asifoto phọ ekạr kụ emhạn maạr esi amhị.”

 Rotenhe igẹ phọ ikpo igẹ abraille, kụ osighẹ okiọm ilạ agadạ dị romiteom ghan rinyạ abraille. Rosiemhi epẹ phọ kụ osighẹ ikpo igẹ phọ otenhe iḅugulu igẹ loor aḍinyạ dị emhoọgh oogbiim dị ke/kputonhu ophoriphọ omhạn phọ, obobọ dị ke/nuụn eḅu mem dị ogbor roḍighinhom. Ipẹ reten, kụ oḅoonomhị ipoḍi arinyạ phọ, okpogh, kụ oḅarạm inhọn arinyạ arookpomhoghan phọ osighẹ okiọm rookpomhoghan phọ, obobọ ongọ we dị rosighẹ ghan raraạr awe dị eten ro/miịn ghan koghiọm oopho eḍighi maạr dị ekpisi phọ omhoọgh ni iikolobian phọ ipẹ phọ. Mem lọ ewạ, ilạ agadạ roḍighinhom ghan ni eten dị keegboronhom obọ abumor phọ abuphẹ eten ro/miịn ghan bọ omoọgh aani rinyạ ituughạ awiki phọ.

 Oḍighi iphẹn phọ resighẹ ghan ni iboom ikpoki r’amem. Okạr oghaạph, aprintery phọ epẹ Wallkill, New York, rosighẹ ghan mem dị kotue ni oḍighinhom 50,000 asiBaibul kụ kodighinhom 2 asiBaibul abraille bịn. Oniin aBaibul abraille onhụ Aḅekeeny amhoọgh 25 aruḅum, ḅilhẹ aḍighi araraạr phọ emhoghi bọ osighẹ oḍighinhom oniin aBaibul abraille esighẹ 123 amem epelom ilọ oḍighinhom onhọn aBaibul. Arokpogho 25 aruḅum bịn remhạn ni $150 (U.S.)!

 Buẹn romiteom ghan bọ siBaibul abraille phọ ologhoma ika ilọ oḍighi phọ abidị? Onyọ umaranhi dị oghol mọ Nadia, dị rakumuan ghan epẹ olạ agadạ aSouth Africa, aḅẹm mọ: “Adọl aghuḍum i/dughanhaan bumor r’abumaranhi phọ ayira ro/miịn ghan bọ eten, esi iduọn phọ eḍighi ni ḍiboom aḍisẹph oḍighi iyaạr dị keloghonhaạn bidị ḍighaạgh. Eganana ni mọ aZihova akạr kụ apomhoghiạn bidị.”

 Kuolọ kokaạph ika eḍighi maạr dị oye dị ra/miịn ghan eten ka/tue abạl braille? Iphurukpu asiạ epẹ omhạn, yira umiteom ni Learn to Read Braille, aḍinyạ ituughạ dị ephamanhạm ikpo igẹ abraille r’ikạr igey igẹ. Olẹm idị oye dị ramiịn ghan eten kụ kasighẹ atughemhiọm oye dị eten ra/miịn ghan. Oḅarạm brosọ phọ inhọn araraạr dị opọ ra/miịn ghan bọ eten kageọm braille. Opọ ratuughạ bọ kasighẹ raraạr phọ kụ ageọm ghan torobọ ekpo igẹ abraille r’aloor. Oḍighi iduọn phọ keloghonhaạn nyodị ḍighaạgh olhegheri ikpo igẹ phọ obọ odị atue alọgh ghan elhegh mem lọ odị aḅọgh.

 Ika kụ idị abumor r’abumaranhi phọ ro/miịn ghan bọ eten phọ momooghọm suọ rinyạ phọ iphẹn phọ? Ernst onyọ umor dị odi ghan epẹ Haiti, aghị ghan ni ituughạ kuolọ o/moọgh ghan rinyạ abraille. Esi iduọn phọ, iwạ ghan mọ odị akpạph ghan aphạm ophagharanhaạn atorobọ aḍipuru r’asaimẹnt dị odị amhoọgh. Odị aḅẹm mọ “Kuolọ nyiidiphọ, mị katue ni apoophe ḍighaạgh apagharanhaạn ḍipuru torobọ amem dị iḅeraạn imhị. Mị makạr aloghomha mọ mị maḅophạn bumor r’abumaranhi phọ amhị. Oomo phọ ayoor kụ role nyeniin phọ eḍien aruwaloor phọ!”

 AJan okumor oye ookpomhoghan dị amhoọgh iiḅaghamhị ariḍien epẹ Austria, dị ratughemhị ghan Otu Okoriom mọ r’Ituughạ aBaibul Ookpomhoghan phọ aḅẹm mọ, “Arinyạ iphẹn ayira kụ iigholhaany epu inhọn arinyạ abraille dị mị m’aạl ghan. Esi omaạm, iphẹn ayira epamanạm onhụ abạl ipoḍi phọ, igẹ phọ edi bọ ude phọ edugh omhiịn, ḅilhẹ kẹn ogbạ sifoto phọ.”

 Seon-ok, aḍighi okọy eten epẹ South Korea, dị eten ra/miịn ghan ḅilhẹ aḅaaghạph. Mem dị eten odị abeḍenhọm ghan onhụ imaaghiạn phọ opọ rookpaphaghạn ghan bọ raghaạgh mem lọ aghị ituughạ, kuolọ nyiidiphọ oginha odị katue ni abạl rinyạ abraille. Odị aḅẹm mọ, “inhọn arinyạ abraille rekpạr ghan aạl loor esi dị u/tiighi iniin ariisi, aḍikoọl igẹ phọ epighọgh, obodọ aḍinyạ phọ epheghepheghẹ iboom. Kuolọ Abugbaanhaạn aZihova kụ roḍighinhom ghan igey arinyạ ḅilhẹ k’omhaạr oḅugulumi itiighinheen igẹ phọ, bịn midughanhaan imhị aạl.” Odị aḅarạm mọ: “Mem dị eten, ogina amem dị abunhọn awe ulhoghonhaạn imhị ḍighaạgh kụ edị mị arue ghan atuughạ rinyạ phọ regbạ bọ Baibul phọ. Kuolọ nyiidiphọ, oginha amhị bịn katue ni atuughạ. Olhoghi amhị akạr kụ aḅaạl iduọn mị katue bọ ni aakolobian ilọ ituughạ awiki phọ ayira ḅilhẹ apanyanhaạn aani sipuru. Mị rabạl ghan ni oomo arinyạ abraille phọ ayira. Oḅenhị anyinha, mị ka/tue atọl dị mị u/bạl.”

 Idiphọ arinyạ ayira dị oprint omiteom, arinyạ abraille phọ ayira epamanạm igẹ phọ eḅẹm bọ mọ: “Aḍinyạ phọ aḍiẹn ka/ḍị aal. Umiteom idiphọ apakirị oḍighi itughemhị aBaibul dị osighẹ iisogh dị u/kpaariọm kụ rologhonhaạn ḍighaạgh.” Meḍighi iisogh phọ anyinha edaphạn bọ reten kirokirọ phọ oghaạph bọ siphẹ donate.pr418.com. Eegharạ inmo phọ anyinha kụ iḍighi bọ idị edugh dị komiteom eḍien aruwaloor ongọ oomo awe, eḅaramhaạm weye ikpom ariḍien r’abudị eten ro/kạr ghan komiịn.