Yira ko/⁠tue oḅẹm mọ araghaạph abuẹn omite bọ Watchtower Bible School of Gilead ekụ phọ, emhunhenhiom bọ 148 agbatanhaạn ni r’ipẹ ophạm ghan bọ epẹ omhạn. Eniin iyaạr bịn kụ igbatanhaạn: awe u/ḍigh siphẹ ogbotu phọ utologhụ ude. Oomo abuphẹ omhạgh bọ oghị aani phọ unaghạn ghan raghaạph phọ olhoghi aKomputa obobọ Tv. Ezẹgh phọ eleeny bọ eleeny oomo isiẹn aḅirinhi phọ, iḍighi idị oḍighom mọ odaphạn sidọl phọ bịn osighẹ emhoom eten kụ oḍighinhom nyeẹn egi phọ.

Uphạm raghaạph phọ iphẹn phọ March 14, 2020, siphẹ ropạm ghan bọ ruskul Abugbaanhaạn AZihova epẹ Patterson, New York. Umor phọ Stephen Lett, oniin siphẹ Aloor Phọ Repogh Bọ, kụ aḍighi otolhọm agadạ phọ. Oomo anmụny askul phọ umhạn 55. *

Esighẹ bọ iyạl ikpo asiwiki rekị oteẹny amem mọ kopạm bọ raghaạph abuẹn omhadạn bọ askul phọ, bịn iinhaghạn oomo isiẹn aḅirinhi phọ eḅẹm mọ ezẹgh phọ oghol bọ mọ COVID-19 melheeny elheeny. Idiphọ oghaạph bọ epẹ omhạn siphẹ Esi Iinhaghạn phọ siphẹ jw.org, emhụ agadạ phọ Abugbaanhaạn AZihova okiririom ni ropogh ipẹ asidọl phọ rekị bọ ḅilhẹ romiteom ni iiḅakiọm kongọ oomo arookpomhoghan phọ dị emhoọgh muḅọph r’ipẹ iikpọ itooghị arikpisi phọ eghaạph bọ

Eniin iyaạr dị oghaạph dị keloghonhaạn ḍighaạgh pọ mọ aḍita awe kuu/⁠kpomhoghan ghan mun esi. Loor esi iduọn phọ ḅilhẹ kẹn r’inhọn ariphigh, Aloor Phọ Repogh Bọ uḅẹm ni mọ oye ku/ḍuạ erugh uḍigh esi phọ kopạm bọ raghaạph phọ. Ḅilhẹ kẹn mọ oye ku/⁠tọl siphẹ ogbotu phọ unaghạn raghaạph phọ. Eghunotu aBetẹl phọ r’anmụny askul aGilead phọ uphighi ni imạ eḍeenhaan omhiịn mọ bidị odaphạn ni iiḅakiọm mọ iphẹn phọ.​—⁠Jọn 13:​34, 35.

Toroboiperolbọ, uḍighi ni idị aruuruen phọ r’abuọ eghunotu aBetẹl phọ komiịn aani ipẹ araghaạph phọ ophamhanhaạn bọ nmụny askul aGilead phọ eghị bọ. Iphẹn phọ iru ni eḍighi idị 10,000 abumor r’abumaranhi oomo isiẹn aḅirinhi phọ, eḅaramaạm righirị r’abuọ arughunotu anmụny askul phọ orọl ilhoghi aruutu abidị bịn omhiịn aani ipẹ araghaạph phọ rekị bọ, eniin phọ amem mọ.

Aloor Phọ Repogh Bọ okạr ri rowạ mọ oghiọm risigh iiseeny phọ ayira, ekạr ekpaariọm iphẹn arookpomhoghan phọ ayira, ghalhamọ r’iduọn aCOVID-19 phọ odi bọ ni. Esi iduọn phọ, Aloor Phọ Repogh Bọ ongooghị ni iiḅakiọm ilhạ agadạ oomo isiẹn aḅirinhi phọ idị bidị kooḅenhiom eten phọ bidị ropạm ghan bọ ituughạ, odaphạn ipẹ itooghị ekpisi phọ abidị eḅẹm bọ. Odaphạn iphẹn phọ, iniin arikpisi abukaaphọm mọ “kookpomhoghan” ghan ibạm arugu kụ osighẹ ghan ḍimhạgh avidio opamọm ituughạ. Yoor okuphom ni owol mọ abumor phọ oomo isiẹn aḅirinhi phọ kokiọm ni ghisigh omooghọm ghan suọ eḍien aruwaloor phọ rotom ghan bọ koghiọm oomo arookpomhoghan phọ.

Eegholhaan ni mọ iyaạr i/⁠lo dị ketue esophoghom iikpọ phọ aZihova amhoọgh bọ olhoghonhaạn ghan ayira ḍighaạgh idiphọ oḍighom odị, okpạr opu isophoghom.​—⁠Psalm 18:⁠29.