Irubal Abugbaanhaạn ḅilhẹ r’abudị omhoọgh ḍiḅeraạn kookpomhoghan Tuesday, April 7, 2020, olhẹ eyaạl dị emhạn maạr epelheghiom lhạ phọ aḍiphẹ phọ, Ootughiạn aḍuugh phọ aKraist. Toroboiperolbọ, rolhool phọ, loor esi ezẹgh phọ COVID-19, eḍighieeny phọ ayira kegbatanhaạn ni. Ibadị siẹn oomo aḅirinhi phọ kosighẹ ḍimhạgh avidio kụ oḍighinhom.

Loor esi ezẹgh aKorona-vairọs phọ, iikpọ itooghị arikpisi kirokirọ moḅẹm mọ bunọ u/wạ omhiịn esi dị ibadị awe ookpomhoghan. Esi iduọn phọ, ibadị arookpomhoghan oomo isiẹn aḅirinhi phọ rosighẹ ghan ḍimhạgh avidio kụ kophamhạm ituughạ torobọ awiki. Iniin phọ aḍimhạgh avidio phọ kụ edị arookpomhoghan phọ iphẹn phọ kosighẹ opamọm aMemorial phọ. Avidio dị mookolhobian oseere ilọ edeọm mọ ketolonaạn ni oomo awe phọ siphẹ jw.org.

Awe dị opel li 20 irubal kụ ughị aani aMemorial phọ lhạ phọ aḍiphẹ eten bọ. Oḍuom ni olhoghi mọ irubal awe kosighẹ ni oḍighinhom ḍimhạgh avidio, ḍimhạgh afon, obobọ okị opogh nyopọ ookolhobian bọ oseere siphẹ jw.org.

Ibadị arikpisi, ezẹgh phọ relheeny ghan bịn elheeny. Oḍighi idị abumor phọ ayira komoọgh eborọph, pọ ewạ mọ yira olhọgh inyaạm osighẹ ghan oḍighinhom iiḅakiọm dị ungọ iyira tutụ ezẹgh phọ eḍuạ. Ghalhamọ r’iduọn phọ, loor esi oḍuomolhoghi phọ yira omhoọgh bọ mọ aZihova kubakị ni iyira, yira osopha ni odaphạn itọ phọ aZizọs eḅẹm bọ mọ “Iḍighi ghan iduọn ilọ ootughianạm ami.”—Luk 22:19.