Unwanyụ aJune 11, 2022, aPresident Vladimir Putin amheeraam ni ilọ iyạl iilhogh dị bidị kodạ emhụ bịn oḍuạ eeḍiạn iilhogh ḅilhẹ r’itọ European Court of Human Rights (ECHR) kụ imhiigh ni k’aMarch 15, 2022. Esi iduọn phọ, torobọ ooruẹn dị ECHR phọ osoph egbi k’aMarch 15, 2022, kụ eghiọm ghisigh i/gbolhomaam mụn Russia odaphạn iilhogh. Iphẹn phọ eḅarạm ni ooruẹn phọ ECHR phọ osoph bọ June 7 aḅẹm bọ mọ, ipẹ osophoghom bọ Bugbaanhaạn AZihova siphẹ eelhe phọ aRussia eḍighi ekeeny ooruẹn, kụ atọ bọ mọ bidị owilhẹ osighẹ eten iigamhanhiạn ogbiphoghọm Abugbaanhaạn phọ, m’osereghi bulọ odi niiniin ikoli, ḅilhẹ m’oḅulhemhi rutu phọ bidị osighiọgh bọ obobọ okpẹ ikpoki dị ketue etoomaam rutu phọ, 59 eru bạl euros ($63 eru bạl U.S.).

Kụ Ookpomhoghan phọ Europe amoọgh ni Ekụ Ikpolhom awe dị romhiịn ghan mọ areelhe phọ odi bọ eeḍiạn itọ ECHR phọ odaphạn ni torobọ ooruẹn lọ osoph. ARussia aḍigh aani Ookpomhoghan Europe phọ egbi kạ 1996.

Kụ March 15, 2022, aRussia uḅenhị ni Ookpomhoghan phọ mọ bunọ u/ḍighi mụn pakirị ookpomhoghan phọ. Ḍio phọ etum bọ pạ, Ookpomhoghan phọ umutonhaan ni Russia. Kụ uḅenhiọm ni itooghị phọ aRussia mọ odaphạn iilhogh phọ ephạm bọ Ookpomhoghan Europe phọ odị amheeraam bọ ni kụ agbi bọ oḍigh phọ, pọ aRussia kadaphạn ghan ni torobọ itọ ECHR phọ tutụ eteẹny September 16, 2022.

ARussia umhiịn mọ bidị odạ ni emhụ oḍuạ dị ko/lher loor ongọ Otu Iiruẹn phọ ekulha amem mọ esugha bọ, esi oghel iyạl phọ itọ phọ m’oghaạph bọ ni oghol ipẹ ongọ bọ June 7, 2022. Ḍinhiin phọ aḍio phọ ECHR phọ osoph bọ erugh ogheelhemhi bumor phọ epẹ Russia.

Ooruẹn ECHR phọ amoọgh ni iikpọ akị esi arutu iiruẹn 46 areelhe phọ odi bọ Ookpomhoghan Europe phọ torobọ amem dị aḍighiton dị egbolhomhaam Bugbaanhaạn AZihova emite. Kụ edị ekạr emhạn maạr, ooruẹn phọ aḍeenhaan mọ Abugbaanhaạn AZihova u/soor iilhogh phọ aRussia osiph bọ bidị. Siẹn oomo aḅirinhi phọ, ooruẹn phọ ophọn phọ akạr kụ angọ ogey phọ ni ogbaanhaạn ilọ aZihova aḅilhẹ apophe ḍien ph’odị. Agey ni, oomo iiseeny phọ ekị esi aZihova!​—Psalm 83:18.