Unwanyụ aMarch 23, 2020, epẹ Ekool aRussia dị oghol Khabarovsk, Abuọ Iḍiil phọ (FSB) ughị ni owum otu onyọ Umor phọ Igor Avramenko, odiiny aḍughul otu reten mem mọ odị amhugh bọ loor esi ezẹgh ekpom. Abuọ iḍiil phọ oghị bọ owaaghị araraạr ophogh phọ uphạm ni ḍinyạ dị otu iiruẹn phọ kụ ongọ itọ mọ owaaghị raraạr ophogh siphẹ otu onyọ umor phọ dị ephạm ni ḍien onyọ Umor phọ Avramenko, ghalhamọ r’iduọn phọ ni bịn bidị usighẹ ni aKomputa, camera, r’inhọn ibadị araraạr dị eḍighi ilọ ekpukele anhịr phọ odị, Yelena.

Ḍiniin phọ aḍio phọ adiphẹ phọ ni, abuọ iilhogh phọ molhọgh ni we dị okori oghi otu oḍighi Umaranhi phọ Avramenko, odạph osi olhoghotu odị, bidị osi bọ olhoghotu umhiịn ni buphẹ oghị bọ owaaghị araraạr Stanislav Grebenkin dị odi rokori bidị, r’aḍinyạ dị otu iiruẹn phọ ongọ itọ oghị owaaghị araraạr ophogh siphẹ otu phọ. Umaranhi phọ Avramenko aḅenhị ni Grebenkin mọ olom onọ mamhugh. Oye phọ alhegheri ni iphẹn phọ, kuolọ aghiọm ni ghisigh aḅẹm mọ otu iiruẹn phọ mongọ itọ mọ oghị owaaghị raraạr ophogh siphẹ otu phọ kụ ogbi bọ olhegheri mọ onyọ Umor phọ Avramenko mamhugh.

Buphẹ oghị bọ owaaghị araraạr phọ ukue bịn oḅenhị Umaranhi phọ Avramenko mọ awe phọ olhọgh bọ kokị owaaghị iphurukpu araraạr bịn, loor esi dị mọ rowạ “oogborion oghughi aḍighiton phọ kụ osighẹ araraạr phọ oghị olhọgh esi dị [FSB] rosereghi ghan raraạr.” Toroboiperolbọ, bidị uḅilhẹ ghụn oḍigh otu umaranhi phọ kụ ogunyonhaan.

Epẹ Ekool phọ aKhabarovsk, mosiphi ni Bugbaanhaạn dị romạn ni ḍioph mọ aruḅạ. Ghalhamọ r’iduọn obuọ itooghị phọ mokparaghạ bọ ni oḍighi idị abumor phọ ayira koparanhaạn omheeraam mọ abidị epẹ Russia, bidị olegheri ni mọ bidị komoọgh “inyaạm esi omhaạr oḅoorian kụ oḍeenhaan oḍuomolhoghi” Odẹ ephomhoghiạn phọ ayira, Zihova.—Isaiah 30:15.