Ai wotanut: Karin de pesta nuku miya. Yal te de menit karnuku hei mia, langfarot ama nuku de he uiyharena mia ba hor.

Hedi mu hemokeni, Jessica, de sopi botol ayoki bang. Karin de hiyeng hedi mu minuman beralkohol. Jessica de botol nuku miy Karin her. Ya, dewofang, ”Ai coba. Yal ong wal kano fila na?”

Herofi mu Karin doaiy, haba Jessica mu hemokeni. Karin doaiy hasuong mbeimu de funa Jessica dewofang ba dewal rofi na. Ya wai afena, Jessica mu wil ba kang. Dedi hoti de but, hare opi ko wal dowuda na. ’Opi sopi wal narkoba na,’ dewotanut heiwuda.

E Karin, nala he e mipaneng?

Keadaan opi homi mia e keputusan kang nuku miy temati e jati diri de hadoa te. Jati diri e omong kang ba e kelebihan, e kekurangan, ya e pendirian e hiyeng. E heiur mipaneng, onakala e keputusan miy kang ya e wal ama afena hei hahaluol na.—1 Korintus 9:26, 27.

Pendirian ba rumai heiwuda de lateiur opa? Hetatangar opi wei ai wohawai.

E kemampuan ya e sifat-sifat kang e hiyeng, e isi e worumai kang.

HEDOSAMA BA SURAH RIELING MIA: Rasul Paulus dewobileng, ”Besar lasar mu ko ne wal te hiyeng na, haba pengetahuan hei, ne wal ama foda na.” (2 Korintus 11:6, Bahasa Indonesia Masa Kini.) Surah Rieling hei Paulus de faring hiyeng wuhe, ama beka paneng mihadasama haba de rumai iti. Ama langhosesei haba de isi de worumai.—2 Korintus 10:10; 11:5.

AI E ISI HEHALAL: E bakat namati e kemampuan ba opa e wobileng.

Yala, e sifat kang ba opa he falaka e wobesar. (Hedosama, na e penyayang? omi feng? eiy andalkan kang? tepat waktu?)

Woamunang, kesumba kabei de susu balek nuku hado beka diy kang. He maksud, e kekurangan e woheikang beka, e pendirian de abeta midamohawai kang.

HEDOSAMA BA SURAH RIELING MIA: Paulus de kekurangan de hiyeng. Dewobileng, ”Nedi, nomi, kul-kul hukum Allah nohomaha, haba ne hehalal ne isi homi mia mu hukum afena hadoa ba de hukum ba ne tanut hei hada yenang ya de paneng ne hasalah he hui.”—Roma 7:22, 23.

AI E ISI HEHALAL: Kekurangan nala he e woheikang te?

Na e oto taha ba e supir he hafang lak kota balei ba bensin woyoti? Hei wal te tanut misei na ya hei seng lawawat.

He pelajaran? E tujuan ba birang hei de opa, e birang dewotentu. E tei miya ya he cara ba ya hei ref e hiyeng.

HEDOSAMA BA SURAH RIELING MIA: Paulus dewobileng, ”Ne cara takiy mu he tujuan hadoa.” (1 Korintus 9:26) Birang heimu Paulus dewal pasrah na. Haba, he tujuan hadoa ya de mifik ba paneng.—Filipi 3:12-14.

AI E ISI HEHALAL: Tujuan sua, namati e cita-cita ba omaha tung aroi e mipaneng e wobileng.

E wal nal nuku worumai na, ko e minunuk kang. Hedosama bunglon wuda, ko e miamohahawai ba e mokeni wei wuda. Hedimu e pendirian wal opa na wuhe.

Haba, nala he e worumai e haluol mipaneng, heimu he arti e pendirian de opa ya e wal ama afena hei haluol na.

HEDOSAMA BA SURAH RIELING MIA: Nabi Daniel de dar abeti, de fi kang ya de mokeni ba deworumai nuku de he buokal haba de ”domi mia tekad paneng ba” hukum Allah haluol. (Daniel 1:8) De heiur mipaneng, de pendirian de hopuna iti.

AI E ISI HEHALAL: Nala he e worumai? Hedosama: Na e worumai ba Allah mu hadoa? Ko rofi, he bukti ba de omi harumai ba Allah hadoa mu nala?

Hukum Allah ba paneng pak hei hekang miadasama mu na e worumai? E worumai, he alasan mu nala?

Omaha e nala he uda? Omaha fusing wuda ba anaha de o filiy re e bata wuda ba anui anaha haba dewal mibok na? E pendirian e hado rumai ba hedosama bata hei wuda. E heiur mipaneng, e wofang kang ba e pendirian rumai.