Ri wotanut yala ri afeng Yerikho mia. Afeng opi Kanaan hemia. Ama ba amina mia, wala Yehuwa worumai na. Mol nuku hedimia, hana he Rahab.

Lunga Rahab dara kiding, ama Israel hei he falaka dong faring mahiy diy. Hedosama, Musa de ama Israel wei hadoa Mesir mia lak tamawal kika hapiet. Dei bay, de mahiy ama Israel de yenang hada natea Yehuwa de homong. Wai yala bay, ama wofang ama Israel wei de Yerikho hamina mia ba de nayong ong!

Akuni nuku, ama tumal ayoki ba Israel he ama de rama-rama afeng Yerikho homi mi we ba afeng homi hamo lateiwuda de hehalal. De Rahab hetofa misiyei. Ya, Rahab de hiyenabey ba hetofa mi el. Akuni hedi bay lei Yerikho de maring mahiy ba tumal ayoki afeng hedimia, ya Rahab hetofa mia. Lei hedi de ama ba hopa mi awang, de habot ba tumal ayoki hapung. Haba, tumal ayoki hedi Rahab de akuitaha mihabuni. Rahab de ama ba lei ho awang wohokafang, ’Yala opi siyei, haba ngafeng opi hapieti. Yala ri heisiyer, ri hapung kang nahani!’ E wotanut, nalawuhete Rahab de tumal ayoki hedi hofikang diy?— Rahab de hiyeng, ya de Yehuwa hei worumai ba anai Kanaan mu Yehuwa de miy ama Israel her.

Tumal ayoki de dara Rahab hetofa uytaha misei na, de Rahab hadapakang ni Yerikho opi hada yenang edi ya etofa homi mia wei robirang. Haba, de Rahab hafang nalnuku paneng. E hiyeng hedimu nala?— Dewofang nahani, ’Tila kika opi e mi e jendela mitilak. Heiopi mu, tafuda etofa homi mia robirang.’ Rahab bay de haluol paneng. Hewohaluol nala he daleki?—

Leng kabei mitawi, ama Israel de larama lak ba afeng hedi balei. Leng nuku afeng hedi de balei minuku, ya deleng talama he mipaneng nahani. Haba leng he yeting ayoki, de balei miyeting ayoki. Hedi wosiki, damau puna tukai wosorai diy. Lang farot, Yehuwa de paneng tembok ba afeng hedi taraki. Haba, tofa  ba tila kika mitilaka wala taraki na. Yala, e gambar mihalal. Tei he Rahab hetofa?— Rahab ya, hetofa homi mia wei do birang nahani!

Pi lateur Rahab hei wosakolah?— Rahab de Yehuwa hei worumai, ya Yehuwa herumai hebaharing dong faring mahiy. Ridi bay, yala Yehuwa herumai hebaharing ri wosakolah. Ridi bay ri Yehuwa hei worumai, mu?— Kulkang!