Ribka mu ama mol ba de Yehuwa mihiyena. Heneng hana he Ishak. Dedi bay de Yehuwa mihiyena. Yani he Ribka la ahola de Ishak hadatohayei? Dei domaha de Yehuwa homi hado kang, dewotiyeng diy mu nala? Mie delateiur wobesar.

Ishak mu Abraham ya Sara hewil. De Kanaan hemia nahani. Ama ba heimia, wala Yehuwa hehui hefatil na. Hare Ishak de mol hediwei miy Abraham dokaleng. Hare, ama ba hetofa mi awang, de habot ya henang henaha ba Haran mia hopa ya. Ama ba hopa mi awang mu hana he Eliezer, de afeng hedi mi ya ba mol nuku tahai miy Ishak her.

Eliezer ya wai ama afena ba hopa mi awang wei dokari lak. Lela ba de haluol mu kul buokal. Hare, unta de karnuku hadoa nahani ba de siyeng ma ya hadia karikkarnuku bang. Haba, lateiur Eliezer de mol hedi hadatareng ba kulkang mi Ishak her? Ya, Haran mia de iya nabuk nuku peya mi eli, de hiyeng ama siye ba iya hei sui. Hewohaluol Eliezer de doa Yehuwa wohokafang, ’Kolmai ne mayak nuku hopa mi iya fang, ya dedomaha de miy ner ya ne unta-unta wei bay, hedi opi mol ba E kul miahiy ba mi ner.’

Wal milunga na, Ribka de iya nabuk hedi misiyei. Surah Rieling dewofang,  hedi mol ba kul masena. Eliezer de iya he hafang, ya de wohawai, ’Nomaha, ne sui ba er. E unta-unta wei bay ne her.’ E wotanut! Unta mu de iya faring but, hare iya Ribka de sui mu detok datang de mi her. Gambar opi e hehalal, Ribka de mayasing mu?— Eliezer homi mikang mihamol Yehuwa de he doa wohawai.

Hadia ba masena-masena wei Eliezer de miy Ribka her. Ribka bay de Eliezer ya ama ba eyala dokari wei de hiyenabey ba hetofa homi mia wei hadatareng. Eliezer de he falaka wofang nalawuhete ne Haran mi siyei. Dewai wofang, Ribka-he Yehuwa demiahiy ba Ishak hemol heri. Ribka hetofa homi mia wei homi kul mikang mihamol dewofang Ribka opi, hare hado ya Ishak hohatang.

E wohatuk, Ribka ko domaha Ishak dilia deimiy rena?— Ribka de hiyeng Yehuwa-he Eliezer homong. Hare, Ribka heya hema denghatangar omaha e Kanaan ya ba Ishak rilia rimiy, de wohawai, ’Nomaha haluol nahani.’ Ribka ya Eliezer wei dokari lak ya Kanaan miyai. Ya Kanaan mia, Ishak dilia deimiy deypuni.

Ribka de Yehuwa homi hado kang, de oweni tauhapuna. Ya, he uyharena Ribka de Yesus heketa fala! Hare, ri Ribka wuda ba ri Yehuwa homi hado kang Yehuwa de oweni riytauhapuna.