Samuel de dara kiding, de tabernakel mia ba hei mi awang. Tabernakel mu Yehuwa heyera ba ama hei mi ibadat. Ri hiyeng rena nalawuhete, Samuel de ya heimia? Samuel heya mu Hana, haba la ahola-ahola hei he falaka pi hehalal.

La ahola, Hana dekul domaha dewil hiyeng, haba beka. Hare de doa. De Yehuwa hadapakang newil de nopa, newil ne mi er de e tabernakel mia ba hei mi awang. Yehuwa de Hana he doa wohawai, dewil neng nuku hamani. Hana, de hana hadowi hana he Samuel. Hana de pakang de dawa heyera mi iy. Samuel tung sua nati tung buti, Hana dong hadoa tabernakel ya heimia de Yehuwa hei milak minatea.

Hedimia, imam lea ba tabernakel mi awang hana he Eli. Eli hewil neng ayoki bay de imam ba de hei mi awang. Hare, tabernakel heimu Yehuwa heyera ba ama hei mi ibadat. Ama ba hedi mi awang wei, hetanut mu dekang te. Haba, Eli hewil neng ayoki hepak hepaneng mu beka. Nala he de mipaneng, Samuel de hehalal nahani. Nal beka ba de mipaneng nahani na Samuel de haluol paneng?— Walna, heya hema nala he dewohadasakolah de hiyeng, hare yala bay de dara wil ba kulkang.

E wotanut mu nala he Eli de paneng ba mi dewil wei wohadasama te?— Wong mihirai diy Eli dekul miy ba dewil mihadasama ya de hotab ba wai Yehuwa hetofa mi awang na te. Haba, Eli de wala mipaneng na. Hare, Yehuwa de Eli ya hewil ayoki he kilikil. Yehuwa bay domaha, wong mi hirai de miher nahani.

Akuni nuku Samuel de tade Samuel de womahia ama nuku de hor, ’Samuel!’ De takiy Eli hopa we. Haba Eli dewofang, ’Ne wala or na.’ Heiopi midalek misua lal. Samuel dewai dawai he sua, Eli de Samuel wohokafang dewai or mati e opiur wofang, ”Yehuwa o besar, ne opi womahia.” Samuel bay de hei haluol paneng.  Hewohaluol, Yehuwa de Samuel wohadabesar, ’Eli wohokafang, hetofa homi mia wei beka he de mipaneng hare ne hamong nahani.’ E wotanut, pakang hamo heiwuda e abeta Eli wohokafang rena?— Samuel, de wotanut de paneng beka. Pakang opi de funa wofang. Heiwuda haba, Yehuwa he haboti hare dekul mipaneng. Ya, nala he Yehuwa dewofani de kul-kul midalek. Eli hewil ayoki ama faheni ya Eli bay moni.

Hedosama kang he Samuel de paneni mi pidi. Heimia ama afena ba hopa hamina mia wei hepak hepaneng labeka, haba Samuel mu wil ba kulkang. Ridi la teiwuda? Romaha ri wil ba kulkang Samuel wuda rena? Ri hei wohalal, ri Yehuwa ya riya rima homi hado kang hamol diy.