Ri hiyeng rena ma-ma he ko opi gambar mia?— Hei weimu Matius, Markus, Lukas, Yohanes, Petrus, Yakobus, Yudas, ya Paulus. Leng ba de mibirang nahani mu Yesus dokari la sama. Ya, buku ba de bileni mu mifaring Yesus hei. Buku-buku opi Surah Rieling homi mia. Mie, ama ba buku bileni hei pi wosakolah.

Ama ba Surah Rieling bileni hanaisena ama sua, rasul ba Yesus dokari maring kang wobesar. Dedi weimu  ma?— Matius, Yohanes, ya Petrus. Rasul Matius ya Yohanes mu Yesus hemokeni kang, ya tara-tara de buku ba Yesus hei de bileni yoti. Rasul Yohanes bay buku Penyingkapan (Wahyu) de bileni, ya surah sua de bileni hana he Nuku Yohanes, Ayoki Yohanes, ya Sua Yohanes. Rasul Petrus de surah ayoki bileni, hana he Nuku Petrus ya Ayoki Petrus. Surah he ayoki homi mia, Petrus de bileni ba Yehuwa de mar surga mi besar. Hedimia Yehuwa, Yesus hei dewofang, ’Opi kul Ne-wil. Ne mihiyena, ya Ne woneikang.’

Wai afena, gambar opi ama afena bay hadoa, deiwei bay Yesus hei de wobileni. Hanaisena nuku hana he Markus. Ama Yesus hapuni, Markus na ko de heimia hare nala he daleki de hehalal. Wai nuku he Lukas. Deimu de dokter. Hedimia Yesus moni tehu na ko dedeimiy Yesus he murid afena hohau.

Ama ba buku bileni ba opi gambar mia, heiopi mu Yesus henaha. Heiwei mu ma-ma?— Dedi weimu Yakobus ya Yudas. La ahola nala he Yesus de wotadasakolah de wala worumai na, ya de wotanut nahani Yesus mu hetanut kang ngnawi. Haba, he uiyharena de Yesus hei worumai ya yala de Yesus he murid.

Ama ba buku bileni wosik ba gambar opi mia hana he Paulus. De dara ama Kristen na, hana he Saulus. La ahola ama Kristen wei de beka mi mihadasama, ya homi he kilikil nahani. Haba, e hiyeng rena lateiur tehu Paulus domaha de ama Kristen?— Leng nuku, Paulus de toki puna lak kota nuku mi ya. Lang farot, ama surga mia hadabesar sei. Haba heimu Yesus! De Paulus hatangar, ’nalawuhe e tahupang kadia miy ne murid wei mihadasama?’ Heiopi mi daleki, Paulus damohawai, yala de ama Kristen. Paulus buku ba Surah Rieling homi mia de 14 bileni, buku Roma mia ya Ibrani refi.

Leng kopang pi Surah Rieling mihalal, mu?— Pi Surah Rieling mihalal, Yesus hei pi faring hiyeng. Romaha Yesus hei ri faring hiyeng?—