PELAJARAN 01

Surah Rieling Hekang Miadasama Mu Nala?

WO ALUWONG

Hetatangar ba birang hei, beka tafiela, mong tanitang, ya ariy falaka hei pi sering wotanut. Masalah ba leng kopang pi hadatareu bay pi sering wotanut, hedosama teiur te pi kebutuhan penuhi hei ya lateiur te lik tofa homi mia de kang hamol hei. Hetatangar opi wei Surah Rieling dewohawai kang wong ba Surah Rieling homi mia hekangmu miy pi birang ariy kopang mihadasama. Ama faring bay dong hekang hiyeni. Na edi ya, e tiyeng hiyena wei rotafuda na Surah Rieling de romong kang?

1. Hetatangar hamo teiuda he hewohawai Surah Rieling homi mia?

Hetatangar opi weimu Surah Rieling de wohawai: Birang ahola mu lateiuda? Pi birang opi he tujuanmu nala? Nalawuhe ama faring de beka tafeila hadatareu? Ama monamu hamo lateiuda? Potafuda pomaha rama amoni homi mia, haba nalawuhe yenang faring hadoa? Ya buku opi ariy falaka lateiuda? Surah Rieling de wofang hetatangar hedi wei hewohawai mu pi perlu tahai te. Ama faring de heiur mipaneng, ya hewohawai ba Surah Rieling mia de paneng ba homi mikang mihamol nahani.

2. Surah Rieling hekang ba miy pi birang ariy kopang mihadasama mu nala?

Surah Rieling de wong masena he miy pir. Hedosama, Surah Rieling de tadasakolah lateiur tofa homi mia de kang hamol homi mia. Wong ba Surah Rieling mia de pomong ba stres atasi kang, ya awang bay pi hekang hiyeng. Hare buku opi pi sama-sama wobesar, Nalahe Surah Rieling de woadasakolah ba nal-nal hedi mihadasama E hiyeng kang. Nal afena hei bay e faring wosakolah kang. Nalahe pi wobesar opi de paneng ba E worumai ”Surah Rieling homi mia dotafuda . . . hekang hadoa”.—2 Timotius 3:16.

Buku opimu dewal Surah Rieling hemanau na. Haba, buku opi de omong E bisa Surah Rieling hiyeng kang. Hare, ayat ba buku opi homi mia E dotafuda mibaca, ya ayat opi wei ya nalahe E wosakolah E do iy kang.

FARING OHIYENG TE

Ama ba Surah Rieling wosakolah ba hekang nala-nalahe de hiyeni hedi he pi wobesar, lateiur te pomaha Surah Rieling mibaca, ya nalawuhe te pi ama afena wobutuh ba de pomong Surah Rieling homi hiyeng kang.

3. Surah Rieling de Pipong Puna Kang

Surah Rieling hedosama senter ba falaka kang. Surah Rieling de pomong ba pi woheinuk miy kang ya nalahe ariy falaka midalek bay de wopokafang kang.

Mazmur 119:105 mibaca, ya hetatangar opi wei wobesar:

Ama ba mazmur bileni opimu he tanut ba miy Surah Rieling mihadasamamu nala?
E tanut ba miy Surah Rieling mihadasamamu nala?

4. Pi hetatangar opi wei Surah Rieling de wohawai kang

Miye pi hehalal mol nuku mu tung-tung he hetatangar-hetatangar opi he tanut mia hedi de paneng dewal rama amoni na haba Surah Rieling de wohawai kang. VIDEO haber, ya hetatangar opi wei wobesar:

VIDEO: Doma Worumai Nawi He! (1:48)

Video hedi mia nalahe mol hedi de wotanut?
Surah Rieling wosakolah wosiki hekang nalahe mol hedi de hiyeni?

Surah Rieling de wofang pi kul hetatangar iti te Matius 7:7 mibaca, ya hetatangar opi wobesar:

Hetatangar nala-nalahe E wotanut, hewohawaimu ko Surah Rieling homi mia?

5. Omaha Surah Rieling mibaca

Ama faring domaha Surah Rieling mibaca, ya nalahe de mibacamu de hekang hiyeng nahani. VIDEO haber, ya hetatangar opi wei wobesar:

VIDEO: Surah Rieling Mibaca (2:05)

Abeti mayak ba video hedi miamu na domaha baca nahani?
De wal domaha baca na haba, nalawuhe domaha ba Surah Rieling mibaca nahani?

Nalahe Surah Rieling de wopidasakolah de paneng pomi mikang mihamol ya pi worumai hadoa. Hediwuhe Surah Rieling de wofang. Roma 15:4 mibaca, ya hetatangar opi wobesar:

Na omaha faring hiyeng ba lateiur Surah Rieling de omong ya omi mikang mihamol ba E harapan hadoa?

6. Ama afena de pomong ba Surah Rieling faring hiyeng kang

Yala ama faring domaha Surah Rieling mibaca. Wala donakala mibaca na haba, ama afena bay dokari wobesar. De midomahia hekang mu tukai mihadasama nahani. Kisah 8:26-31 mibaca, ya hetatangar opi wobesar:

(Ayat 30, 31 mihehalal.) Pi lateiur Surah Rieling pahami kang?

Etiopia neng nuku de ama afena hafang ba mihomong Surah Rieling he isi hiyeng. Yala bay ama faring de Surah Rieling he isi hiyeng hedimu ama afena de homong wuhe.

WALA DE WOFANG: ”Surah Rieling wosakolahmu waktu lawat.”