PELAJARAN 02
Pakang ba Surah Rieling mia pi worumai kang
Ruli dolea, ama faring masalah hadatareu, hedosama homi wosei, ya tarik tafiy. Na masalah hedi bay E pernah hadatarewi? Hedosama, E susah mu na E penyakit wala hadatarewi wuhe. Namati, E sedih mu ama ba E mihiyena moni wuhe. Na E pernah miatangar, ’Ne birangmu na opi lauda?’ Surah Rieling hewohawaimu de paneng omi mikang mihamol.
1. Surah Rieling wosakolah harapan nalahe pi hiyeng kang?
Surah Rieling de hefalaka wofang nalawuhe yala pi masalah faring hadatareu. Surah Rieling bay de maring kang wopokafang, hedimu masalah ba pi hadatareu Allah de hanau. Pakang wei ba Surah Rieling mia de paneng pi ”worumai ba birang ariy falaka hadoa”. (Yeremia 29:11, 12 mibaca.) Pakang opi wei pi worumai, masalah wei ba pi hadatareu pi hadapi kang, ya pi tanut kang hadoa, ya pi worumai birang kang hamol ba mihalor pi hiyeng.
2. Surah Rieling hei haluol, birang ariy falaka teiuda he pi hiyeng kang?
Ariy falaka heimu nalahe Surah Rieling de wopakang diy? Surah Rieling de wofang, ”Mong tanitang walna. Mitoding, felmaniu, ya tarik tafi ngwalna.” (Wahyu 21:4 mibaca.) Masalah faring ba paneng ama homi wosei, kilil fiyal, aroi mitihai, tarik tafiy, ya mong tanitang, wal hadoa na. Surah Rieling de wopakang amakang de Firdaus mia birang mihalor, hedimu buku ba masena ya sempurna.
3. E lateiur worumai pakang ba Surah Rieling miamu dekul midalek?
Herofimu nal ba kang he amakang faring dohomaha. Haba, nal ba de worumai weimu dewal midalek na. Pakang ba Surah Rieling miamu wal heiuda na. Haba pakang wei ba dotafuda Surah Rieling mia dekul midalek. Nal hedi E worumai mati E ”Surah Rieling mihalal iti te”. (Kisah 17:11) E Surah Rieling wosakolah mati, pakang ba Surah Rieling mia ba birang ariy falaka hei onalaka E woheinuk miy ba hedi E worumai kang.
FARING OHIYENG TE
Mie nal kabei ba Surah Rieling de wopakang ba birang ariy falaka hei pi wobesar. Lateiur Surah Rieling hekang de hiyeng nahani ba miy hebirang ariy falaka wohadasama nahani.
4. Surah Rieling de wopakang ba pi birang mihalor kang ya, bekatafiela wal na
Miye pakang ba Surah Rieling mia sei opi mia pi hehalal. Pakang teihe kul Omi hafik? Nalawuhe?
Ayat ba bileni wei mibaca, ya hetatangar opi wei wobesar:
-
Ayat hedi wei ba mibaca diy mu na omi mikang mihamol? Eiy haluol, ayat hedi wei na de E tofa homi ya E tiyeng hiyena wei homi hado kang hamol?
E wotanut na ruli opi ko de hei lauda:
|
NAL OPI WEIMU DE KUL NAU HEDIMU . . . |
AMAKANG DOTAFUDA . . . |
|---|---|
|
|
|
|
|
|
|
|
|
|
5. Yala bay worumai ba Surah Rieling de miy pidi hekang dar hadoa
Yalamu masalah faring popa pimina midaleki ama faring de hehalal homi wosei ya de wokilikil nahani. Wala de kul-kul mifik ba perubahan mipaneng. Miye pi pengalaman nuku hehalal de lateiur wotiyeng diy ba pakang ba Surah Rieling mia ba birang ariy falaka hei yala bay hekang dar hadoa. VIDEO haber, ya hetatangar opi wei wobesar:
-
Video hedi mia, paneng ba aroi mitihai teiuda he Rafika mihadasama ba homi wosei?
-
Rafika de hiyeng paneng ba aroi mitihai dar hopa hamina mia haba lateiur Surah Rieling de homong?
Pakang ba Surah Rieling mia ba birang ariy falaka hei pi worumai mati, pak paneng ba pomi wosei pi atasi kang ko pi masalah hadatareu bay pomi mikang mihamol. Amsal 17:22 ya Roma 12:12 mibaca, ya hetatangar opi wei wobesar:
-
Eiy haluol, pakang ba Surah Rieling mia ba birang ariy falaka hei yala bay hekang dar miadasama rena? Nalawuhe?
WALA DE WOFANG: ”Pakang ba Surah Rieling miamu latukai. Wal mungkin pi birang dewal masena ba heiuda na?”
-
Eiy haluol, Nalawuhe E bukti wotahai ba pakang ba Surah Rieling mia E worumai kang?
PELAJARAN OPI HE INTI
Surah Rieling homi mia, pakang faring ba ariy falaka hei wai tukai kang. Pakang hedi wei de paneng pi worumai hadoa pi kesulitan hadatareu bay pi tabah kang.
Nalahe E Wosakolah?
-
Nalawuhe Allah hepakang weimu ama afena bay de kul hiyeng te?
-
Birang ariy falaka teiuda he Surah Rieling de wopakang diy?
-
Ko pakang ba Surah Rieling mia ba ariy falaka hei E worumai mati, hekang nalahe yala E hiyeng?
WAI FARING OHIYENG TE
Pi masalah hadatareu lateiur harapan de pomong kang?
”Harapan—E Yatei he Mihiyeng Kang?” (Sedarlah! 22 April 2004, loring Indonesia mia)
Ama ba penyakit hopa ba wal mikang diy na lateiur harapan ba ariy falaka hei de homong kang?
”Penyakit ba Tung-tung he Hopa—Na Surah Rieling de Homong Kang?” (Artikel web, loring Indonesia mia)
E video musik opi woreya diy, E wotanut hedosama edi ya E tofa homi mia wei rokari Firdaus ba Surah Rieling de wopakang diy ri ya hei mibirang.
Ama neng nuku ba de organisasi nuku homi mia he pengalaman pi mibaca. Pakang ba Surah Rieling mia de hiyeni lateiur de hebirang mihamo hawai?
”Ne Minomahiya Ne Wal Ruli Opi Mihamohawai Na” (Menara Pengawal 1 Juli 2013, loring Indonesia mia)
