PELAJARAN 5
Allah de Domaha, Buku opi Lateiwuda?
1. Nala wuhe, Allah de buku opi paneni?
Buku taha opi Allah demi amakang heri, opi pi tofa. Hare amakang ahola, Adam ya Hawa Allah dewal hedi paneni ba, mar surga mi birang na. Allah dong malaikat wei paneni mar surga mi hatani. (Ayub 38:4, 7) Allah de amakang ahola paneni de, firdaus mihatani hana he Taman Eden. (Kejadian 2:15-17) Leng kang ba, birang mihalor buku taha mia Yehuwa de miy amakang ahola ya, hewil heratawala wei heri.—Mihalal Mazmur 37:29; 115:16.
La ahola Taman Eden homi mia Firdaus wuda. Amakang ahola, hewil heratawala wei heminukumia de buku taha womiri. Heminukumia amakang ahola ya, hewil heratawala wei de buku taha mia, hana he Firdaus. (Kejadian 1:28) Buku taha opi dewal beka na haba, amakang de hei mibirang mihalor.—Mihalal Mazmur 104:5.
Video Allah He Domaha Buku Opi Paneng mu Nala? woreya
2. Nala wuhe, buku taha opi yala wala firdaus na?
Adam ya Hawa dewal Allah heluk na wuhe, Allah dehaloi. Firdaus hei yala ngwalna, amakang bay dewoheikang beka. Surah Rieling dewofang ”Buku taha opi miy ama bekatafiela hatang mi iy”.—Ayub 9:24.—Mihalal Kejadian 3:23, 24.
Allah he tanut ba miy amakang mihadasama na ngnawi? Walna! Allah Rumai Baharing hare, nala he dewotanut kulmidalek. (Yesaya 45:18) Allah he domaha amakang hebirang denghamo hawai, wai ahola wuda.—Mihalal Mazmur 37:11, 34.
3. Firdaus lateiur woheikang?
Allah de Yesus hatang fahuni ba, dong Lei deparentah hopuna buku opi hamohawai hana he firdaus. Yenang hana he Armagedon, Yesus de malaikat Allah hei dokari, ama ba wala Allah heluk na wei hanau. Ya Yesus de setang mi nabuk lohi mibineng, helunga tung 1000. Yehuwa hehui hefatil ba dobirang wei, hapong puna ya, hofikang. Firdaus ba buku taha mia, ama ba birang mihalor wei de heimia.—Mihalal Penyingkapan (Wahyu) 20:1-3; 21:3, 4.
4. Tarik tamor, yanite dewosik?
Bekatafiela ba buku taha midalek, yani te Allah de hanau? Yesus de demurid wei wohokafang, ”nala he demidalek” hedi opi dewotiyengdiy ruli opi dong mihamang. Ruli taha mia pihehalal, bekatafiela he langler hedi opi depaneng, amakang wei de mong kang. Hedi opi dewotiyengdiy, ”pong ruli ahola taha mibirang”.—Mihalal Matius 24:3, 7-14, 21, 22.
Yesus demar surga mia parentah hopuna helunga tung 1000 heimia tarik tafiy, bekatafiela, de hanau. (Yesaya 9:6, 7; 11:9) Ama ba kang miy Allah miy hadasama, hehasalah Yesus de wolut. Hare Allah de Yesus puna tarik tafiy, fingketa, mongtanitang dehanau.—Mihalal Yesaya 25:8; 33:24.
5. Mahe ko firdaus mibirang?
Ama ba Allah mihiyena ya, hei wosakolah hedi opi, e ya Balai kerajaan Saksi Saksi Yehuwa he e mihiyeng
Ama ba Allah heluk de, firdaus mibirang. (1 Yohanes 2:17) Yesus de demurid wei habot ama ba, homi sadafalasing toluol ba, hadasakolah, ba de Allah hiyeng. Yala opi, ama jutaan Yehuwa detoluol ba Firdaus buku taha mibirang. (Zefanya 2:3) E lateiur neng kang ya mol kang e ya Balai Kerajaan Saksi-Saksi Yehuwa he miwosakolah. Kano ya hefikang dokari Allah heluk hiyeng mihalor ba Surah Rieling homi mia dewosakolah demiy debirang do iy, hebirang dekul kang.—Mihalal Mikha 4:1-4.
