Allah de amakang ya tei-tei mia bay, de hiyenabei ba doa. (Mazmur 65:2) Haba, Allah dewal doa dotafuda womahia na. Hedosama, ama neng de mol hada beka, de doa Allah dewal womahia na. (1 Petrus 3:7) Ama Israel wei de beka paneng, de doa Allah dewal womahia na. Hare, doamu nalkang nuku wuda ba Allah de mi pidi. Haba, ama ba hasalah lea mipaneni, de hasalah dewodarang de doa, Allah dewomahia.​—Mihalal Yesaya 1:15; 55:7.

Video Apakah Allah Mendengarkan Semua Doa? woreya

Pi ibadat mu, doa hadoa. Hare, ama ba piy paneni hana he Yehuwa, hedi he doa pi her. (Matius 4:10; 6:9) Wai afena, pi ama ba wal kulrofi na hare, Yesus de moni depi hasalah wowau hare, pi doa pi hana puna te. (Yohanes 14:6) Doa ba tawa heyera nuku mibesar-besar na ya, buku puna Yehuwa dewal womahia na. Dedomaha doa mu, tomi he mimirang te.​—Mihalal Matius 6:7; Filipi 4:6, 7.

Ama ba piy paneni, pi doa ba tomi hu miwotanut bay dewomahia. (1 Samuel 1:12, 13) Allah de piyenabei ba doa. Miakuni re, akuni re, po siyeng ma ne ya, bekatafiela pi hadateru bay pi doa, de womahia.​—Mihalal Mazmur 55:22; Matius 15:36.

Pi Allah he mokeni kang haba, beka. Pi ama ba wal Allah heworumai hanaiy sena mibirang hare, Allah he domaha rama amoni buku taha mia, ama lahosesei. (2 Timotius 3:1, 4; 2 Petrus 3:3, 13) Hare, mitapieta mitarumai ya siye te, pidi ya pimokeni wei.​—Mihalal Ibrani 10:24, 25.

 Ama ba Allah mihiyena he, pi hadatiyeng hiyena de pomong pi Allah mihadap. Ibadat Saksi-Saksi Yehuwa wei, hei mitei toluol mitarumai ya sie, e hiyeng.​—Mihalal Roma 1:11, 12.

Nala he Surah Rieling mia e wosakolah, e wotanut e Allah he mokeni kang. Allah hepak hepaneng, hewong, he pakang hei opi e kul-kul wotanut. Hare, pi wotanut ya pi doa Allah hekang hamol ya, hetanut daliela pi hiyeng kang.​—Mihalal Yosua 1:8; Mazmur 1:1-3.

Pi Allah herofi wofang ya, worumai pi kul Allah he mokeni kang. Haba, pi worumai bata birang wuda hare, iya mihotok te. E worumai e iya hiyeng rofi puna hotok, hedi mu nala he e wosakolah e wotanut.​—Mihalal Matius 4:4; Ibrani 11:1, 6.

Ama ba Yehuwa mihiyena homi hedatoka. Nala he ama worumai ya, nala he ama hebirang mihalor hobok bay, Allah dewofikang. (Mazmur 91:1, 2, 7-10) Dong wopokafani ba, lela ba tarik tafiy na ya, kang hamol hei hebuokal dong wofani. Lela ba birang kang hei, Yehuwa dong wopidasakolah diy.​—Mihalal Mazmur 73:27, 28; Yakobus 4:4, 8.