PELAJARAN 6
Ama Mona, Heworumai mu Nala?
1. Maring kang nala he, mi ama mona mihadasama?
Yesus he mokeni kang hana he Lazarus ba moni, leng mibuti tehu Yesus de he tofa miyai. Lazarus he ura mol ayoki Marta ya Maria Yesus dokari nabuk peya miyai. Langkaber ama faring siye deitoluol, E wo ompang Yesus de Lazarus mihabirang diy, Marta ya Maria delateiwuda?—Mihalal Yohanes 11:21-24, 38-44.
Maring kang ba ama mona hei, Marta dong hiyeng. De hiyeng, ama mona wei Yehuwa deng habirang diy ba buku taha mibirang.—Mihalal Ayub 14:14, 15.
2. Ama mona, hamomu lateiwuda?
Allah de Adam wohopang, ”E anai hare, wai awaiy anai miseiy.” —KEJADIAN 3:19.
Amakang Allah de anai puna paneni. (Kejadian 2:7; 3:19) Amakang he isi he waka he hopa, sehilbirang wala he isi mia na. Hare, pi mong pi isi dolea mong. Pi isi afena wal rea na pi tanut bay mona, pimong pi tanut walna. Lazarus denalwala wobesar na hare, ama mona kul-kul mona.—Mihalal Mazmur 146:4; Pengkhotbah 9:5, 6, 10.
Ama mona na Allah demi ara lefing mihatani? Surah Rieling dewofang, ama mona nalwal hiyeng na. Mani ama wofang, ama mona ama ara lefing mihatang hedi wal rofi na, ama Allah hana la hado beka. Ya, Allah he tanut mu wal amakang mi ara lefing mihatang na, heiwei mu Allah de hehalal hiyeng hado beka diy.—Mihalal Yeremia 7:31.
Video Ama Mona He Keadaan Mu Lateiwuda? woreya
3. Ama mona, na de pidabesar?
Ama mona debesar beka ya, womahia beka (Mazmur 115:17) Haba malaikat ba tahupang bay hadoa, hediwei he ama mona he baki mitol ba tadabesar. (2 Petrus 2:4) Yehuwa de potap, ama mona hada besar na.—Mihalal Ulangan 18:10, 11.
4. Mahe ko mi dabirang diy?
Ama jutaan ba moni, deng dabirang de buku taha mia. Ama ba, wal Allah hiyeng na ya, beka mi paneng bay Allah deng habirang diy.—Mihalal Lukas 23:43; Kisah 24:15.
Ama ba Allah deng habirang diy, Allah dewai leng hedi de Surah Rieling wosakolah. De Yesus hei horumai ya, heluk. (Penyingkapan [Wahyu] 20:11-13) Ama ba Allah deng habirang diy, de kang hamol mi paneng mihadasama ya, de birang mihalor ba buku taha mia.—Mihalal Yohanes 5:28, 29.
5. Yehuwa de ama mi habirang diy, nala he pi wosakolah?
Allah de Yesus habot mong mipidasama hare, ama mona de worumai deng dabirang diy. Allah hekang hamol pihiyeng hare, ama mona deng dabirang diy. Ama mona deng dabirang diy, mahe la ahola e hatang hepaniy?—Mihalal Yohanes 3:16; Roma 6:23.
