PELAJARAN 15
Nala Wuhe, E Kul Sakolah Te?
1. E Surah Rieling wosakolah, hekang mu nala?
Surah Rieling wosakolah heiyeri, de omong e Yehuwa mihiyena. Kang ba pihiyeni opi, pi pupuk te. (1 Petrus 2:2) E worumai birang mihalor e hiyeng ya, e Allah he mokeni kang e Allah hamau buka wosakolah te.—Mihalal Yohanes 17:3; Yudas 21.
Allah hiyeng mihalor ba opa, de omong heworumai. E worumai puna, Allah homi hakang. (Ibrani 11:1, 6) E worumai de omi mi hasuong diy, e amo hawai hiyeng rofi, birang mihalor e hiyeng.—Mihalal Kisah 3:19.
2. Lateiur e hiyeng mihalor ba Allah hei, hekang mi ama afena mihadasama?
Yehuwa rinaisena nal ba kulkang
Nala he e wosakolah, eiy o maha e wai afena wohadabesar. Potafuda pomaha, maring kang he pi wobesar. Surah Rieling e wosakolah, e lateiur puna e worumai, Yehuwa ya maring kang he falaka e wobesar.—Mihalal Roma 10:13-15.
Ama faring maring kang demi demokeni ya, henang henaha wei wohadabesar. Hei opi, empaneng haba e aleling te. Wofang ba he agama hasalah na. Allah he pakang wu wohadabesar. Haba, epak epaneng he, ama hehalal wala e loring e amak na.—Mihalal 2 Timotius 2:24, 25.
3. Allah riliya rinaisena E lateiur paneng?
Surah Rieling wosakolah, e rohani de bali. Heminukumia ti, Yehuwa rinaisena nal ba kulkang. E Yehuwa he nala kang ya, e he tofa homi mia.—Mihalal 2 Korintus 6:18.
4. E lateiur paneng dewe kangdiy?
E rohani dewe kangdiy temati, e kul Surah Rieling wosakolah te. (Ibrani 5:13, 14) E Saksi Yehuwa nuku hafang ba, Surah Rieling woadasakolah. Hedi opi, buku Nala he Surah Rieling Dewopidasakolah? puna. Allah hamau buka ba Surah Rieling homi mia, e wosakolah e birang demi kang.—Mihalal Mazmur 1:1-3; 73:27, 28.
Maring kang Yehuwa heiyeri, Allah kang hamol. E Yehuwa he mokeni kang ya, hehui hefatil e hada tiyeng hiyena kang. (Ibrani 10:24, 25) E kul mipaneng iti, Yehuwa homi hakang ya, birang hiyeng rofi e hiyeng hedi mu birang mihalor. E Allah he mokeni kang, lela afena walna Allah.—Mihalal 1 Timotius 1:11; 6:19.