Maring kang Surah Rieling homi mia dewofang, ama rama amoni de buku taha mia de birang mihalor. (Mazmur 37:29) Surah Rieling he faring 66. Allah de ama neng 40, puna Surah Rieling bileni. La ahola, Musa de yeting bileni tung 3.500 ba mihapieti. Buku hewosik rasul Yohanes he bileni, he tung 1.900 ba mihapieti. Mahe tanut he, ama puna Surah Rieling bileni? Allah de Simoi Rieling depuna, mi ama ba Surah Rieling bileni, wohadabesar. (2 Samuel 23:2) Allah he tanut he depuna, wala detanut na. Hare Yehuwa-he, Surah Rieling paneni.​—Mihalal 2 Timotius 3:16; 2 Petrus 1:20, 21.

Video Mahe Surah Rieling Paneni? woreya

Pi hiyeng Surah Rieling Allah he heiyeri, birang ariy falaka hei ba, he kiding–kiding, dong wofani. Amakang de heiur paneng beka. (Yosua 23:14) Yehuwa Allah Rumai Baharing, amakang he birang ariy falaka, he kiding-kiding bay dehiyeng.​—Mihalal Yesaya 42:9; 46:10.

Surah Rieling ba Allah hei kul dei afena, wal afena hei dosama na. Surah Rieling loring asaha mihapieti mi bileni, ya tei-tei mia. Surah Rieling ngketa haba, nala he homi mia hedosama de, buku opi paneni buku ba sakolah hei bay de herofi wofang. Wai hewohaluol ama 40 de Surah Rieling bileni la dosama, Surah Rieling homi mia Allah mu kang hare, Allah he falaka dewopokafang. * Surah Rieling de ama faring he birang hadoa kang, wai hewohaluol Allah ba midaliela he domaha, hamau buka ba Surah Rieling hamo hawai doaiy. Hedi opi ama faring homi hado rumai ba Surah Rieling mu kul Allah Hamau Buka.​—Mihalal Yesaya 40:8; 1 Tesalonika 2:13.

Video Nalawuhe Pi Worumai Surah Rieling Mu Nal Hiyeng Rofi? woreya

Surah Rieling dewofang, Allah de birang ariy falaka mi amakang heri. Surah Rieling dewai wofang firdaus ahola mu nawi, haba Allah dewai kang hamol miy ama ba, birang mihalor buku taha mibirang her, hana he firdaus.​—Mihalal Penyingkapan (Wahyu) 21:4, 5.

Allah hamau buka ba Surah Rieling mia dewofang, he parentah, hewong, delateiur tebirang hadokang. Wai afena, Surah Rieling mibileni depaneng miy amakang mihadasama. Hedi mia, Allah hamo pihiyeng kang hare, Surah Rieling de pomong pi Allah hiyeng te. Pilateiur Allah he mokeni kang bay, buku opi de he falaka wotiyeng diy.​—Mihalal Mazmur 19:7, 11; Yakobus 2:23; 4:8.

Buku opi pi puna, Yesus delateiur pidasakolah pi Surah Rieling homi mi hiyeng kang. He ayat Yesus demiahiy, he falaka dewai wopopang nala he demibileni ”kul-kul Rieling”.​—Mihalal Lukas 24:27, 45.

Maring kang ba Allah hei, kul tomi hafik haba ama wala womahia na, afena ama wai la e kilikil hei womahia na. E worumai e birang mihalor, hare e Allah hiyeng te.​—Mihalal Yohanes 17:3.