Agama dotafuda ama homi rofi nunuku mia. Ama hedi wei, Allah dediyeng hotilak. Hei mu maring kang. Haba, mifaring tahupang kadia, ama agama hana puna paneng. (2 Korintus 4:3, 4; 11:13-15) Berita dewofang, tamultalal, teifaheng lea-lea, yenang ya kano fila hosalak hei weimu, agama mani homi mia. Ama ba Allah hei worumai wei, nala ba owei de homi hado harik!​—Mihalal Matius 24:3-5, 11, 12.

Agama hiyeng rofi de Allah hana wohaliel wohamai. Haba, agama ba wal hiyeng rofi na mu hobeka. Agama ba wal hiyeng rofi na, nala he wal Surah Rieling homi mia na he depuna ama wohadasakolah. Ama mona ya Allah hei ba wal hiyeng rofi na, ama puna wohadasakolah. Haba, Yehuwa domaha nal hiyeng rofi ba Yehuwa hei, ama hiyeng te.​—Mihalal Yehezkiel 18:4; 1 Timotius 2:3-5.

Tomi mi kang, Allah hei ayer beka. Agama faring dewofang de Allah mihiyena haba, hiyeng rofi mu, kang ba rofi demiy Setang ya ruli opi hu her. (Yakobus 4:4) Agama ba wal hiyeng rofi na, Surah Rieling dewofang hana he ”Babilon Lea”. Babilon ba opi, kota ba asing hei. Yeu sarang ba Nuh he masa mia wosiki, maitehu agama ba wal hiyeng rofi na miler. Wal lunga na, agama ba de amakang wei hei ayer ya, beka miy mi hadasama Allah de hanau.​—Mihalal Penyingkapan (Wahyu) 17:1, 2, 5, 16, 17; 18:8.

Haba maring kang afena wai hadoa. Ama ba homi rofi ya agama-agama wal hiyeng rofi na homi mia, Allah dewal hei wodafang na. Ama ba agama wal hiyeng rofi homi mia na, Yehuwa de hafik ba nal hiyeng rofi depuna wohadasakolah.—Mihalal Mikha 4:2, 5.

Ama ba kang hamol hiyeng rofi mihiyena, Allah homi hedatoka. Deng hasasik, agama ba wal hiyeng rofi na do iti. Ama ba Allah mihiyena domaha damohawai Allah homi hakang.—Mihalal Penyingkapan 18:4.

Asing abad ahola mia, ama homi rofi wei Yesus he Rasul de maring kang wohadabesar homi mi kang. Lela tifa ba Yehuwa hei dewosakolah nahani, hei opi mu lela ba tomi tukai mikang mihamol hei, ba nala he piworumai ya pimiya hei demiy ter. Yala hetok pati pi woreya nahani, maring kang dewomahia hebirang homi Yehuwa hei dedeicura.​—Mihalal 1 Tesalonika 1:8, 9; 2:13.

Ama ba agama wal hiyeng rofi na dedoiti, Yehuwa de hiyenabei, de hatang hepaniy mie hehui hefatil tofa homi lea mia wohau. Yehuwa de iyenabei, e haluol e kul hemokeni kang. E hehui hefatil tofa homi lea mia, birang mihalor e hiyeng kang.​—Mihalal Markus 10:29, 30; 2 Korintus 6:17, 18.

Allah he leng lea desiye, de agama ba wal hiyeng rofi na mihadasama. Hedi opi, maring kang. Agama ba wal hiyeng rofi na, dong wala tomi hafik na ya tanai harak na. Amakang dotafuda Allah de ibadat mi toluol ba, Allah hiyeng rofi nuku holuk.​—Mihalal Penyingkapan 18:20, 21; 21:3, 4.