Piy paneni hetanut pimiy daliela, Pima kang wuda homi pidatoka. Wai afena, Allah piy paneni ba, wala birang pipong ahiy na haba, de tapong puna. (Yeremia 10:23) Hedosama mu kano fila wuda, he fikang de hapong puna. Pidi bay, pipomaha Allah de pipong puna te. (Yesaya 48:17, 18) Nala ba, Surah Rieling mia detapong puna hedi opi, Allah dela mi, pidi.​—Mihalal 2 Timotius 3:16.

Allah hamau buka ba Surah Rieling mia pi haluol birang, kang hamol yala pi hiyeng kang ya, birang ariy falaka bay pi hiyeng kang. Allah he piy paneni ya, pipong puna hare, pi kul tomi rofi puna ba hei haluol te.​—Mihalal Mazmur 19:7, 11; Penyingkapan (Wahyu) 4:11.

Birang hado kang ba Surah Rieling mia, heiyeri kul hiyeng rofi. Ya, parentah paneni mu nal nuku wohareng hei. (Ulangan 22:8) Birang hado kang pi kul wotanut ya, piwai mi paneng te. (Amsal 2:10-12) Hedosama, Surah Rieling dewopidasakolah pi birang mu, Allah delang hai pidi. Birang hado kang, de pipong puna woya awang puti, tofa mia ya lela. Birang hado kang opi de pipong puna, tealeling ba pi taniy namur he.​—Mihalal Kisah 17:28.

Tebirang hado kang, Yesus de ayoki wofang. Tebirang hado kang nuku, amakang de Allah hiyeng, kang ba mi Allah her ya, hei milak minatea ya wosik. Birang hado kang ahola, wotanut diy te heminuku ngmiy. (Amsal 3:6) Birang hado kang hei, ama mi paneng de Allah he mokeni kang. Ya, birang kang  hamol yala ya ariy falaka hei bay dehiyeng kang.​—Mihalal Matius 22:36-38.

Tebirang hado kang he ayoki hedi opi, de pipong puna pidi ya, ama afena bay rama amoni homi mia kang. (1 Korintus 13:4-7) Tebirang hado kang ba ayoki opi, pi pomi mi iy, pi wai haluol Allah hei woreya kang paneng mi afena mihadasama.​—Mihalal Matius 7:12; 22:39, 40.

Tebirang hado kang ba Surah Rieling mia, pi haluol birang, tebirang tofa homi mia dekang. (Kolose 3:12-14) Allah hamau buka tofa homi mia de wofikang, tebirang hado kang way afena bay hadoa. Surah Rieling dewotadasakolah, teimiy teypung hedi mu dekul rumai te.​—Mihalal Kejadian 2:24.

Tebirang hado kang ba Surah Rieling mia, pi haluol birang tomi rama amoni ya, wal to kurang kaleba na. Hedosama, tebirang hado kang ba Surah Rieling homi mia pihaluol, pi ama ho awang pi mayasing ya, rofi hopuna ama dopomaha. (Amsal 10:4, 26; Ibrani 13:18) Surah Rieling bay de pidasakolah ba, nal ba pi hiyeng wei pomi mi kang. Ya, pi Yehuwa he mokeni kang hei decura te, po awang afena paneng.​—Mihalal Matius 6:24, 25, 33; 1 Timotius 6:8-10.

Pi isi dokang temati, pi birang mi Surah Rieling do iy te. (Amsal 14:30; 22:24, 25) Hedosama, Allah he parentah ba, iya araka but na piheluk mati tarik tafiy, taniy namur piwal hadatareu na. (Amsal 23:20) Yehuwa domaha pi iya araka but haba faring na. (Mazmur 104:15; 1 Korintus 6:10) Tebirang hado kang ba Allah hey, hekang pi hiyeng kang. Hei opi dewotadasakolah, pipak pipaneng ya, pitanut wofikang. (Mazmur 119:97-100) Haba ama Kristen hiyeng rofi, tebirang hado kang ba Allah he heluk, wala hedi donakala hekang hiyeng na. De paneng Allah hana hekang.​—Mihalal Matius 5:14-16.