1. Birang mahe pidi?

YEHUWA mu ”Allah ba birang”. (Yeremia 10:10) He dedi piy paneni ya he dedi birang pidi. Surah Rieling dewofang, ”E edi nal karikarnuku paneni, ya e omaha wuhe nal karikarnuku hadoa ba paneni.” (Penyingkapan 4:11) Rofi, Yehuwa domaha birang opi pi hei haluol paneng. Birang mu nalkang nuku ba hebeli daliela he Allah de mipidi.​—Mihalal Mazmur 36:9.

2. Pi birang homi mia lateiur te de kang hamol?

² Nala he po hiyeng te Yehuwa de mipidi ba pi birang mihalor kang, hedosama siyeng ya iya. (Kisah 17:28) Haba wai afena ba tukai mitaha mu domaha birang opi pi hei haluol paneng. (Kisah 14:15-17) Birang do kang temati, Allah he parentah pi heluk te.​—Yesaya 48:17, 18.

3. Kain de Habel faheng nala he Yehuwa de paneng?

³ Surah Rieling dewopidasakolah ba pi birang ya ama afena hebirang mu Yehuwa hapomareng mia hebeli daliela. Hedosama, Kain—Adam ya Hawa hewil—de tukai de naha Habel hei kilikil Yehuwa de he wong wofang ba de  abeta kilikil na. Haba Kain dewal womahia na, de tukai kilikil ba de ”de naha hadanatea ba de hei faheni diy”. (Kejadian 4:3-8) Kain de Habel faheni wuhe, Yehuwa de hei hukum diy. (Kejadian 4:9-11) Hare tomi afena hei kilikil ya tahupang mu kul we beka wotikeli diy, heimu de paneng ba pi hirai kafeti ya tahupang he mipaneng.  Ama ba hei wei mipaneng de birang mihalor beka. (Mihalal 1 Yohanes 3:15.) Yehuwa homi hakang hei pi wosakolah ba ama dotafuda pi mihiyena te.​—1 Yohanes 3:11, 12.

4. Hukum karnuku hanaisena mia nuku dewofang teifaheng na. Heiopi nala he pi wosakolah kang?

⁴ Eyal hetung ribi mia Yehuwa dewotiyeng diy ba birang de hehalal mu hebeli tukai daliela, hedimia de parentah karnuku mi Musa hedi. Parentah hanaisena mia nuku, ”Teifaheng na.” (Ulangan 5:17) Ama nuku dokol ama faheni, ama hedi bay faheng te.

5. Wil habek mu Allah hapomareng mia lateiwuda?

⁵ Ama dewil habek mu Allah de hehalal lateiwuda? Wil ba dar hamang na bay Allah hiyeng harena mia hebeli daliela. Yehuwa he parentah ba de miy ama Israel wei heri, Yehuwa dewofang ba ama nuku de mol wo uta nuku hado fata diy ba hewil me hotoki ama hedi bay faheng te. (Mihalal Keluaran 21:22, 23; Mazmur 127:3.) Heiopi dewopidasakolah ba wil habek mu hasalah.​—Hehalal Catatan Hewosik 28.

6, 7. Pi lateiur Yehuwa wohiyeng diy ba pi birang mu hebeli kul daliela?

⁶ Lateiur pi Yehuwa wohiyeng diy ba pidi ya ama afena hebirang mu hebeli daliela? Pidi ya ama afena hebirang hadoa beka mu pi wal mipaneng na. Hare pi wala tabak duma, fu take, ya narkoba puna na heimu de pido beka diy, ya de teifaheng kang.

⁷ Allah de birang ya pi isi mipir hare pi isi pi puna ba hedomaha wuda te. Hare pi isi mu pi wofikang te. Pi wal heiur paneng na Allah hapomareng mia pi wal sani na. (Roma 6:19; 12:1; 2 Korintus 7:1) Pi birang ba hebeli daliela pi wal hehalal na Yehuwa ba de birang mipidi  pi holuk beka. Ko pi tukai awang ba nal-nal beka ba pi mipaneng pi wal mipaneng na, pi wopibalaibuku nasiy Yehuwa de pomong heimu pi birang hehalal hebeli daliela wuhe.

8. Nala he pi mipaneng tehu pi birang ya ama afena hebirang hadoa beka na?

⁸ Pong wosakolah diy ba birang mu hebeli tukai daliela. Yehuwa deworumai ba nal ba kulkang he pi mipaneng ba pi isi, ya ama afena hebirang hado beka diy na. Opi pi mipaneng hedosama lateiur pi oto hopuna, motor hopuna namati kendaraan afena hopuna. Olahraga ba pi birang hadoa beka diy bay pohebuokal. (Mazmur 11:5) Pi tofa bay pi paneng ba de kang homi mia. Yehuwa de parentah nuku mi ama Israel wei hedi, ”E tofa tifa nuku ong mati hafai mu he ba hadoa te, mbeimu ama hayei ba he weya e bani he.”​—Ulangan 22:8.

9. Nala he pi paneng ba miy binatang mihadasama?

⁹ Nala he pi paneng ba mi binatang mihadasama bay penting ba Yehuwa hapomareng mia. Domaha pi binatang faheng ba po ne hei, po konda deko her ya de pibot ba binatang teihe tahupang wopidasama mati pi faheng. (Kejadian 3:21; 9:3; Keluaran 21:28) Haba doma pi tahupang paneng mi binatang mihadasama na, namati pi faheng ba la woaluwong heimu doma.​—Amsal 12:10.

10. Bukti nala he dewotiyeng diy ba weya mu hedosama birang wuda?

¹⁰ Weya mu Yehuwa hapomareng mia rieling ya heimu weya hedosama birang. Kain de Habel faheni wosiki, Yehuwa de Kain wohokafani, ”E naha he weya anai mia ba  besar.” (Kejadian 4:10) Habel he weya mu hedosama hebirang, ya Kain de Habel faheni Yehuwa de hei hukum diy. Yeu sarang ba Nuh he masa mia wosiki, Yehuwa dewai miwofang ba weya mu birang. Yehuwa de Nuh ya he tofa homi mia wei wohokafang ba mahising ro ne. Dewofang, ”Binatang karikarnuku ba buruok, ya birang, heiopi ro ne. Baleu karikarnuku wuda, heiopi wei dotafuda ne miy rir.” Haba nal nuku he Yehuwa dewofang ba ne na, ”Binatang he isi ro ne, he—weya—doma ne na.”​—Kejadian 1:29; 9:3, 4.

11. Weya hei parentah nala he Yehuwa de miy bangsa Israel wei heri?

¹¹ Tung 800 mihadap ba Yehuwa de Nuh hotap ba weya ne na, dewai parentah miy dehui defatil wei her, ”Riy ama Israel re ama afena ba rinaisena mia ri binatang aloang tahai namati ruol karikarnuku he isi ri ne kang, haba he weya ri anai mitok ri wai wosiyer.” Ya dewai mitau wofang ba, ”He weya mu ne na.” (Imamat 17:13, 14) Yehuwa de dar domaha hehui hefatil wei de weya hehalal mu rieling. Mahising de ne, haba he weya walna. Hare de binatang nuku faheng ba do ne, he weya de anai mitok nahani.

12. Ama Kristen wei de lateiur weya hehalal?

¹² Tung kabei mitawi ba Yesus de moni rasul-rasul ya penatua Kristen wei ama Yerusalem mi deitoluol ba ama heminuku ngmiy ba hukum tei he miy ama Israel wei her ba yala ama Kristen wei de dar mipaneng kang. (Mihalal Kisah 15:28, 29; 21:25.) Yehuwa de ama homong ba de hiyeng nahani ba weya mu Yehuwa hapomareng mia hebeli daliela, ya de dar hehalal nahani ba heimu rieling. Ama Kristen masa ahola hei, weya mu ama wal ne ya wal but na, namati mahising ba he weya wal dotafuda toki na dewal ne na. Hare de weya ne ya weya but hedosama mu  beka ba wiy bata holuk ya tafui taka mipaneng wuda. Abad ahola wohaluol ama Kristen ba hiyeng rofi wei weya ne ya weya but mu doaiy. Yala lateiwuda? Yehuwa de dar domaha ba pi weya hehalal mu nal rieling.

13. Nalawuhe ama Kristen wei transfusi ba weya puna dohoaiy?

¹³ Na hei bay ama Kristen wei de transfusi dohoaiy? Rofi. Yehuwa de parentah miy pir ba pi weya ne ya weya but na. Dokter de wo okafang ba iya tafur but na, na e puna ba e isi mitilok? Ko walna! Heiopi dosama, hare parentah ba weya but ya weya ne na heimu transfusi ba weya hei bay po hoaiy.​—Hehalal Catatan Hewosik 29.

14, 15. Tei he kul penting Yehuwa heluk re pi birang hei?

¹⁴ Lateiur dokter dewofang pi wal transfusi ba weya puna na pi mong? Ama nunuku pi woheinuk miy ba Allah he parentah ba weya hei pi heluk re walna. Ama Kristen wei birang ba Allah de miy pidi pi kul heluk, ya pengobatan afena pi tahai ba po birang te, haba transfusi ba weya hei pohoaiy.

¹⁵ Pi kul mifik ba pokang te, haba pi birang Allah hapomareng mia hebeli daniela hare pi wal transfusi ba weya puna na. Lateiur bay pi Yehuwa heluk mu kulkang, na pi birang pi hado lohi haba pi wal heluk na. Yesus dewofang, ”Hare ama ba domaha de isi hado birang diy hebirang de nau, haba mahe hebirang nau ba minadasama, hebirang de we hiyeng.” (Matius 16:25) Pomaha Yehuwa heluk mu pi mihiyena wuhe. Nala he kang ba mipidasama de hiyeng ya Yehuwa wuda pi hiyeng birang hebeli daliela ya rieling.​—Ibrani 11:6.

16. Nalawuhe Allah hehui hefatil wei de heluk?

¹⁶ Yehuwa hehui hefatil wei ba yala, hukum ba weya hei de heluk nahani. Weya mu dedi wei dewal ne ya but na, ya nal ba medis hei ba weya puna do  hoaiy. * Haba lateiur bay pengobatan afena ba hebirang de mikang he de puna. Deworumai nahani ba Allah he pi birang ya weya paneni, hare nala he kang ba mipidasama de hiyeng. Na e worumai ba nala he kang ba mi adasama bay de hadou hiyeng?

17. Israel mia Yehuwa domaha weya puna mu nala he wohareng hei?

¹⁷ Hukum homi mia ba Allah de miy Musa heri Yehuwa de bangsa Israel wohokafani, ”Nal ba birang he isi mu he weya homi mia, ya ne nonakala kameng tau iy ba mi ridasama ba de ri isi wei hadoa rama amoni mbeimu weya hedi he ri do rama amoni.” (Imamat 17:11) Bangsa Israel wei de hasalah paneni de Yehuwa hafang ba he hasalah mu de wodafang heimu binatang nuku faheng ya de imam wohokafang ba he weya kabei mi kameng ba bait mia mi tau habes. Hamo heiopi mani he Yehuwa de ama Israel wohokafang ba weya puna kang.

18. Yesus de moni nala he pi hiyeng kang?

¹⁸ Yesus de buku taha mia hukum ba binatang faheng mu de hemanawi ya de birang ya de weya he de puna miy pi hasalah wosiyer. (Matius 20:28; Ibrani 10:1) Yesus hebirang mu kul hebeli daliela, hewohaluol Yehuwa de Yesus mihabirang diy ba surga yai, Yehuwa de leng miy amakang dotafuda her ba de birang mihalor kang.​—Yohanes 3:16; Ibrani 9:11, 12; 1 Petrus 1:18, 19.

19. Nala he pi mipaneng te ’amakang dotafuda he weya hei pi sani masolang’?

¹⁹ Pi kul Yehuwa hekang hehamol wofang mbeimu  birang kang ba hebeli daliela he de miy pidi! Ya pomaha ama afena wohadabesar ba dedi wei bay de Yesus worumai ba de birang mihalor kang. Pi ama afena mihiyena wuhe nal karikarnuku pi mipaneng ba wohadasakolah ba lateiur te de birang kang. (Yehezkiel 3:17-21) Hedosama rasul Paulus wuda pi miwofang kang ba, ”Amakang dotafuda he weya hei nedi ne sani masolang mbeimu newal mi narang na ba Allah hamau buka mu ne woridabesar iti.” (Kisah 20:26, 27) Rofi, pi wotiyeng diy ba birang ya weya pi heluk mu pi Yehuwa hei mi ama afena wohadabesar ya birang mu Yehuwa hapomareng mia hebeli tukai daliela.