E KORAN mihalal, televisi mireya, namati radio womahia e hehalal ya e womahia mu tahupang kadia, yenang ya tamul talal faring hadoa. Na ko onakala bay tarik tafiy e hadatareu, namati ama ba e mihiyena moni.

E isi mihatangar:

• Heiopi na Allah hedomaha ba miy nedi ya ne tofa homi mihadasama?

• Minomong ba ne masalah woheikang mu ne ya teihe mihiyeng?

• Rama amoni ba mihalor mu na de hadoa diy?

Hetatangar hedi wei hewohawai Surah Rieling homi mia ba de tomi misei kang.

• Ama wal hafiy, wal fing keta ya mong na.​—Penyingkapan 21:4

• ”Ama tukung bay dong dakur ba auti wuda.”​—Yesaya 35:6

• ”Ama hiyeng akuta dong halal kang.”​—Yesaya 35:5

•  Ama mona de wai midabirang.​—Yohanes 5:28, 29

• Ama nuku bay de wal hafiy na.​—Yesaya 33:24

• Mahe buku taha mia he siyeng dong tukai faring.​—Mazmur 72:16

E ko wotanut nala he buku opi he ahola mia ba e mihalal hedosama ko e lapeila wuda. Haba Allah dong wopakang diy ba ruli opi mu dong abeta mihamohawai, ya de lateiur midalek Surah Rieling de he falaka wobesar.

Surah Rieling homi mia de wai nal afena wobesar. Surah Rieling homi mia de wobesar nala he pi mipaneng te pi kul-kul kang hamol homi mia ya birang yala opi hei pi haluol birang kang. Nal-nal ba de paneng omi wosei e rama ba wotanut. Heimu hanaisena mia ko seng, masalah ba tofa homi mia, tarik tafiy, namati ama ba e mihiyena moni. Surah Rieling de omong kang ba bekatafiela hedi wei woheikang, ya hetatangar heiopi wei mu hewohawai de omi mi hakang, hedosama:

• Nalawuhe pi bekatafiela hadatareu?

• Pi masalah wei mu pi lateiur woheikang?

• Pi tofa homi mia de kang hamol diy rena?

• Pi mong nala he midalek?

• Ama ba pi mihiyena moni pi wai hiyeng rena?

• Nala ba Allah dong wopakang diy wei mu nalawuhe pi worumai ba de kul midalek?

 E buku opi mihalal heimu nala he Surah Rieling dewofang omaha e hiyeng wuhe. Buku opi de omong kang. Hetatangar ba paragraf dokopang mia de omong ba e Surah Rieling hiyeng woheikang. Ama jutaan domaha Saksi-Saksi Yehuwa wei dokari Surah Rieling wosakolah. Numaha edi bay e hei wuda. Nala he Surah Rieling dewoadasakolah e wosakolah woheikang, Allah de oweni de miy er kang!