1, 2. Amakang faring nala he de midatangar?

TAMA WAL FALUNG ba afeng nuku habeki. Neng nuku de senapang puna ba gereja tofa ara iy, de ama kabei honamur ya faheng. Kanker de keta mol nuku faheni ba hewil yeting dohawena miti.

² Nalbeka ba hedosama mar ara mi daleki ama midofel maniu, de midatangar, ”Nalawuhe?” Amakang faring midatangar ba nalawuhe ruli opi mia ama midekilikil ya bekatafiela he womiri. Na edi bay e heiur mi atangar diy?

3, 4. (a) Hetatangar nala he Habakuk de puna midatangar? (b) Yehuwa de lateiur wohawai?

³ Surah Rieling homi mia pi wosakolah ba ama neng nuku dekul Allah hei worumai, haba de hadou heiur midatangar. Hedosama, nabi Habakuk de Yehuwa mihatangar, ”Nalawuhe nal bekatafiela mu e woniyeng diy, ya susah malohi, dotafuda e la woreya? Ya nalawuhe ama nal topa miy pung ya tahupang kadia napomareng midalek ya tohatang tohamal ba mitadabeka mu faring?”​—Habakuk 1:3.

⁴ Habakuk 2:2, 3 pi mihalal Habakuk he tatangar mu Allah dewohawai ba de hadapakang nal ba Habakuk de hadatareu Allah de woheikang. Yehuwa dekul amakang mihiyena. Surah Rieling dewofang, ”De pi halal nahani.” (1 Petrus 5:7) Herofi mu bekatafiela ba pi hadatareu Allah tukai hiyeng ho beka ba piy mitaha. (Yesaya 55:8, 9) Heiwuhe mie pi wosakolah, Nalawuhe bekatafiela faring ruli taha mia?

5. Bekatafiela hei nala he guru agama de ama wohadasakolah? Nala he Surah Rieling dewofang?

⁵ Pastor, pendeta, ya guru agama de miwofang ba amakang de bekatafiela hadatareu mu Allah hedomaha. Mani ama ko miwofang ba nala he amakang de hadatareu ya nalbeka daleki ba ama midofel maniu heimu Allah he domaha, ya nala he daleki he alasan pi wal hiyeng na. Wai afena dewofang fi kang ya kano fila de mong mu Allah dokari surga mia. Haba opi wal rofi na. Nal bekatafiela ba dalek Yehuwa dekul wal heiyeri na. Surah Rieling dewofang, ”Nala ba beka Allah hiyeng rofi do hebuokal, ya wal adil na Mahakuasa dewal mipaneng na!”​—Ayub  34:10.

6. Ruli taha mia bekatafiela midalek nalawuhe ama Allah woheihasalah?

⁶ Bekatafiela ba buku taha midalek ama faring de Allah woheihasalah heimu de wotanut Allah he ruli opi wokuasa. Haba pong pasal 3 miwosakolah ba he rofi mu Setan si Iblis he ruli opi woparentah.

7, 8. Nalawuhe bekatafiela faring ruli taha mia?

⁷ Surah Rieling de he falaka wofang ba ”ruli dolea si fasik he uwa mia”. (1 Yohanes 5:19) Ruli opi he aduwo mu Iblis ba kul tahupang ya beka he de mipapaneng. Dedi ”ruli dolea ba amakang mia de hewal”. (Penyingkapan 12:9) Ama faring ama hei hu haluol. Ya hedi he alasan nuku ba ruli taha mia, ayer, tomi tekikilikil, tahupang kadia midalek.

⁸ Alasan afena wai hadoa nalawuhe bekatafiela faring buku taha midalek. Adam ya Hawa dewal Allah heluk na dosa hasalaha hu de dopiiti. Ya dosa wuhe amakang de beka paneng miy amakang afena mihadasama. Dedi wei domaha de donakala midaliela ba miy afena mihapieti.  De dohatang nahani, dadayenang, ya beka paneng miy afena mihadasama. (Pengkhotbah 4:1; 8:9) Mani ama bekatafiela hadatareu heimu ”leng ya nala he wal tetanut mia na daleki”. (Pengkhotbah 9:11) Hare pi heyera ba hasalah hu mia, ya leng ba hasalah, taniy namur ya nal bekatafiela afena de midalek kang.

9. Nalawuhe pi worumai ba bekatafiela Yehuwa de lawomahia mu he alasan hadoa wuhe?

⁹ Bekatafiela Yehuwa dekul wal heiyeri na. Yenang, tahupang kadia, beka miy afena mihadasama Allah woheihasalah beka. Nalbeka ba daleki hedosama yokai, anaha lea ba nal karikarnuku hamul, ya yeu lea heiopi wei Allah dewal heiyeri na. Haba ko ri miritangar, ’Nalawuhe Yehuwa ba he kuasa midaliela ba amakang mihapieti mar adiy taha ya sei buku taha, nal beka ba daleki dewal wotap na?’ Pi hiyeng Allah homi kul pidatoka hare bekatafiela de la womahia mu he alasan hadoa wuhe.​—1 Yohanes  4:8.

10. Lateiur Iblis de Yehuwa hadanatea?

¹⁰ Taman Eden mia Iblis de Adam ya Hawa hei ayeri. Iblis de Allah mihopung ba Allah mu hapong puna ba tahupang. Iblis dewofang nalkang ba Adam ya Hawa hei Allah dewal her na. Iblis domaha Adam ya Hawa de worumai ba dedi mu de hapong puna kang, wal Yehuwa wuda na ya dedi weimu Allah do hoaiy.​—Kejadian 3:2-5; hehalal Catatan Hewosik 27.

11. Hetatangar nala he pomaha ba hewohawai pi hiyeng?

¹¹ Adam ya Hawa dewal Yehuwa heluk na ya dewal hei haluol na. De wotanut ba kang ya beka mu donakala miahiy kang. Yehuwa de lateiur wotiyeng diy ba wal hei haluol  na mu hasalah, ya nala ba kang ba mipidasama mu Yehuwa de hiyeng?

12, 13. (a) Nalawuhe ama ba wal Allah hei haluol na Allah dewal hamong na? (b) Nalawuhe Yehuwa de dar domaha ba Iblis de ruli opi hapong puna ya amakang de isi donakala woparentah?

¹² Nalawuhe heimia Yehuwa dewal Adam ya Hawa hamong na. Haba domaha habot ba dewil deratawala hadoa. Hewohaluol Yehuwa de Adam ya Hawa hewil heratawala wei hiring amoni miy her ba de miahiy ba domaha mahe hapong puna nahani. Yehuwa hedomaha mu buku opi ama rofi he womir, ya hei de mipaneng Iblis de wotap beka.​—Kejadian 1:28; Yesaya 55:10, 11.

¹³ Jutaan Malaikat hapomareng mia Iblis de Yehuwa hadanatea. (Ayub 38:7; Daniel 7:10) Hare Yehuwa de leng miy Iblis her ba wotiyeng diy ba nala he dewofang rofi rena. Ya de amakang bay leng her ba de donakala parentah nasiy Iblis he hapong puna ba wotiyeng diy, wal Allah na hebirang de kang hamol diy rena.

14. Tung do lal leng dowat nala he dewotiyeng diy?

¹⁴ Tung ribi mia amakang wei donakala de isi woparentah, haba wal hei mi iy na. Dewotiyeng diy ba Iblis de ayeri. Amakang weimu Allah dekul homong te. Nala he Nabi Yeremia dewofang kulrofi, ”O Yehuwa ne kul hiyeng ba amakang he kuasa walhopa na ba he donakala he lela wotu. Amakang ba lak detok hawat hei he kuasa walhopa na.”​—Yeremia 10:23.

15, 16. (a) Nalawuhe bekatafiela lunga beka midalek haba Allah de la womahia? (b) Bekatafiela ba Iblis de heiyeri nalawuhe Allah de la womahia?

¹⁵ Nalawuhe bekatafiela Yehuwa de lunga he lawomahia? Nalawuhe nal bekatafiela Allah dewal hotap na?  Iblis he parentah ba wal hei mi iy na mu leng faring puna wotiyeng diy. Parentah hamo teiwuda amakang dong mipaneni, haba hekang mu walna. Pengetahuan ya teknologi mu kulkang, haba ya tei-tei mia wal adil na, tokurang tokaleba, tahupang kadia ya yenang kul mitaha ba wal lunga wuda na. Allah dewal pomong na pi isi pi woparentah beka.

¹⁶ Haba, bekatafiela ba Iblis de paneni mu Yehuwa dewal woheikang na. Yehuwa de woheikang heimu Iblis he parentah Yehuwa de homong, ya hedi dekul wal mipaneng na. Heiwuhe amakang bay de worumai ba parentah ba de mipaneng mu de we kang. Haba heimu ayer ya parentah teiwuda bay Yehuwa dewal homong na. Yehuwa dewal ayer na.​—Ibrani 6:18.

17, 18. Bekatafiela ba dotafuda Iblis de paneni nala he Yehuwa de paneng mihadasama?

¹⁷ Iblis ya amakang dewal Allah hei haluol na bekatafiela ba midalek na Yehuwa de woheikang? Rofi. Nal karikarnuku mu Allah de paneng kang. Yehuwa de hiyeng yani te Iblis he ayer wei dotafuda de wohawai. Hewohaluol buku opi de hamohawai ba Firdaus wuda ba he tanut ahola wuda. Amakang dotafuda ba ”nabuk homi mia” deng dabirang diy. (Yohanes 5:28, 29) Amakang dong wal hafiy ya mong na. Bekatafiela ba Iblis de paneni Yesus de hanau. Yehuwa de Yesus puna ba ”Iblis he awang hanau”. (1 Yohanes 3:8) Pi kul Yehuwa hekang wofang mu yala opi de dar dei hoaring ba mipidasama wuhe pi Yehuwa hiyeng kang, ya pi woheinuk miy ba he dedi Pipong puna. (Mihalal 2 Petrus 3:9, 10.) Pi bekatafiela hadatareu bay de pomong ba pi wopibalaibuku nasiy kang.​—Yohanes 4:23; mihalal 1 Korintus 10:13.

 ¹⁸ Yehuwa dewal tohapuna ba pi hei ngahiy ba de Pipong puna na. Hiring amoni ba miahiy Yehuwa de mi amakang her. Mie pi wosakolah nalkang ba hebeli daliela opi he arti mu nala ba mipidasama.

19. Nalkang hamo teiwuda he Yehuwa de mipidi? Nalawuhe nalkang hedi pi hekang wofang te?

¹⁹ Yehuwa de nalkang nuku pidi ba ping ahiy heimu binatang hei dil waldosama na. Binatang wei nala he de paneng de naluri he de puna, haba pidi pi miahiy kang ba lateiur pi birang kang, ya pi woheinuk miy ba pi Yehuwa homi hakang. (Amsal 30:24) Ya pi wal mesin wuda na, nala he de paneng hei mani he de paneng. Po hiring amoni hadoa ba pi woheinuk miy ba pomaha pi lateiwuda, pi mokeni kang hamo teiwuda, ya pi birang homi mia nala he pi mipaneng. Yehuwa domaha birang opi pi hei haluol paneng.

20, 21. Yala miahiy kang teiwuda he e mipaneng te?

²⁰ Yehuwa he domaha pi mihiyena. (Matius 22:37, 38) Allah mu hedosama pima kang wuda ba homi mikang mihamol de womahia hewil dewofang ”Ne mi iyena” heimu domi mia wofang ama wal habot na. Yehuwa de hiring amoni mi pir ba ping ahiy pi hei milak natea rena. Iblis, Adam, ya Hawa de miahiy ba wal Yehuwa holuk na. Edi lateiwuda?

²¹ Hiring amoni ba eiy mu puna ba Yehuwa hei milak minatea. Ama jutaan afena bay de woheinuk miy ba Yehuwa hei milak minatea wal Iblis hei haluol na. (Amsal 27:11) Yala, nala he e mipaneng te e Allah he ruli tifa mibirang kang? Pasal hewohaluol hetatangar opi dewohawai.