Allah hana mu Yehuwa ya he arti mu ”Nala he domaha de mipaneng”. Yehuwa mu Allah ba he kuasa midaliela, ya nal karikarnuku de paneni. Nala he domaha paneng he kuasa hadoa ba mipaneng.

Loring Ibrani homi mia Allah hana huruf buti puna bileni. Abui loring homi mia YHWH. Surah Rieling ba loring Ibrani hiyeng rofi homi mia Allah hana hadoa mi 7.000 mihadap. Amakang ba buku taha mia hamo afena ba Yehuwa hana de loring puna wofang mu tara-tara.

▸ Psl. 1, par. 15

Allah he Surah Rieling Paneni haba de amakang puna ba Surah Rieling bileni. Heiopi mu hedosama desa de sekretaris habot ba surah bileng ba desa hetanut he puna surah bileng. Allah de simoi rieling puna ba ama Surah Rieling bileni hapong puna ba hetanut bileng. Allah he simoi rieling de lela faring puna ba ama hediwei hapong puna, de penglihatan hehalal namati peila hiyeng ya hewohaluol dekul heiur bileng.

▸ Psl. 2, par. 5

Wotadasakolah ba Surah Rieling homi mia ba nal hiyeng rofi heiyeri de he falaka wofang. Hedosama, prinsip ba ”tiyeng hiyena beka de pak paneng kang habek” Dewopidasakolah ba ama ba pi hadatiyeng hiyena de pomi hafik ba kang ya beka pi mipaneng kang. (1 Korintus 15:33) Ya prinsip ba ”nala he ama reu hedi he de woahiy” dewotadasakolah ba nala he pi mipaneng pi hiyeng takiy beka.​—Galatia 6:7.

▸ Psl. 2, par. 12

Heimu tapakang ba Allah hei. Heiopi mu hedosama falaka ba Allah hedomaha hei,wotadasakolah ba pak paneng hei, parentah, namati hasalah tahai. Heimu hadou tapakang wuda ba ariy falaka de midalek. Ngwofani faring ba Surah Rieling homi mia ngmidalek diy.

▸ Psl. 2, par. 13

Ngwofani faring Surah Rieling homi mia ba Mesias hei Yesus de mihayei. Hehalal kotak ” Ngwofani ba Mesias hei”.

▸ Psl. 2, par. 17, Sei uwa.

Yehuwa de buku opi paneni tofa firdaus ba miy amakang ba mihiyena wei her. Allah hedomaha mu kul wal midamohawai na. Wala lunga nati tahupang kadia Allah de hanau ya dewai birang mihalor miy hehui hefati wei her.

▸ Psl. 3, par. 1

Iblis mu malaikat ba la ahola-ahola de Allah hadabeka. Hana hadou ba Setan, heimu ”Hahatilaka”. mbeimu de Yehuwa hahatilaka. Dedi bay wai wofang Iblis, heimu ”Tana habek”. Hana hedi mi hedi mbeimu de Allah he ayer wofang ya de amakang wei hei ayeri diy.

▸ Psl. 3, par. 4

Buku opi dar paneng na Yehuwa dong lunga he malaikat paneni. Hei paneni ba mar surga mia nahani. Malaikat mu hefaring juta asaha nuku mihapieti. (Daniel 7:10) Hana hopa ya he kepribadian bay tara-tara, malaikat ba hadakor domi damasing ba amakang de holuk mu doaiy. He kedudukan mu tara-tara ya he awang bay midesei. Mani de Yehuwa he takhta hapomareng mi awang, pakang tabot, pofikang, ya hehui hafatil ba buku taha mia hapong puna, awang ba heminuku mipaneng, ya dei bay de awang maring kang homong. (Mazmur 34:7; Penyingkapan 14:6; 22:8, 9) Ariy falaka yenang Armagedon mia Yesus dokari awang.​—Penyingkapan 16:14, 16; 19:14, 15.

▸ Psl. 3, par. 5; Psl. 10, par. 1

Nala he pi mipomahia, pi tanut namati pi paneng ba wal Yehuwa ya hedomaha haluol na heimu dosa. Mbeimu dosa de pidi ya Yehuwa pinaisena habek heiwuhe Yehuwa de hukum ya prinsip mipir ba de pomong ba pokol dosa paneng na. La ahola mu nal karikarnuku ba Yehuwa de paneni mu kul rofi, haba Adam ya Hawa de miahiy ba wal Yehuwa hei haluol na de dosa mihayei ya hebirang ba kul rofi nawi. De fing kalieta diy ba mong, ya de dosa mu de dopiiti wuhe pidi bay pi fing kalieta diy ba mong.

▸ Psl. 3, par. 7; Psl. 5, par. 3

Allah he yenang ba ruli Iblis ya tahupang kadia dotafuda hanau.

▸ Psl. 3, par. 13; Psl. 8, par. 18

Karajaan Allah mu parentah ba Allah de surga minasiy. He Lei mu Yesus Kristus. Ariy falaka mia, Yehuwa de Kerajaan puna ba tahupang kadia dotafuda hanau. Karajaan Allah ruli dolea dewoparentah.

▸ Psl. 3, par. 14

Nal karikarnuku dar hadoa na Allah dong Yesus paneni. Yehuwa de Yesus habot buku opi tau saiy ba mong mi amakang faring mihadasama. Yesus ama faheni kani Yehuwa de mihabirang diy. Yala Yesus de mar Surga mia parentah hopuna ba Lei Kerajaan Allah hei.

▸ Psl. 4, par. 2

Ngwofani Surah Rieling homi mia ba Mesias de siye hei. Heiopi priode 69 minggu hewosik mihalek, heiopi mihalek tung 455 SM ya wosik tung 29 M.

Priode leng opi pi lateiur hiyeng ba hewosik mu tung 29 M? Minggu kartalama wal yeting buti hehalek mu tung 455 SM heimia Nehemia de Yerusalem misiye ba Yerusalem wai woheikang ya tau ong. (Daniel 9:25; Nehemia 2:1, 5-8) Hedosama loring ”Lusin” pi wotanut mu 12, hare loring ”minggu” mu wopimunang hefaring yeting ayoki. Minggu ba ngwofani opi homi mia mu wala minggu ba leng yeting ayoki na, haba minggu ba helunga tung yeting ayoki, hedosama ngwofani wuda ”leng nuku hedosama tung nuku”. (Bilangan 14:34; Yehezkiel 4:6) Heiopi hearti mu minggu tara-tara helunga tung yeting ayoki ya 69 minggu mu hefaring 483 tung (69 x 7). Hare 483 tung, pi tung 455 SM mihalek, de ya tung 29 M mihayei. Tung opi he kul Yesus hei baptis diy ba de Mesias diy!​—Lukas 3:1, 2, 21, 22.

 Ngwofani ba Mesias de siye mu ngwofani ba minggu afena hei ba helunga hadou tung yeting ayoki. Leng lohi opi ama Mesias faheni tung 33 M. Ya tung 36 M dowe, Maring Kang ba Kerajaan Allah hei mi bangsa dotafuda miwobesar wala ama Yahudi mani na.​—Daniel 9:24-27.

▸ Psl. 4, par. 7

Surah Rieling dewotadasakolah ba Allah Yehuwa he nal karikarnuku paneni, ya nal karikarnuku dar hadoa na dong Yesus paneni. (Kolose 1:15, 16) Yesus mu wal Allah ba he kuasa midaliela na. Dewal wofang ba Allah dil dosama na. Herofi mu dewofang, ”Nima tukai leya ba mi nei taha.” (Yohanes 14:28; 1 Korintus 15:28) Haba agama mani dewotadasakolah ba allah mu hamo sua ba nuku homi mia: Hema, hewil neng, ya simoi rieling. Loring ”Tritunggal” mu wal Surah Rieling homi mia na. Heiopi mu wotadasakolah ba wal rofi na.

Simoi rieling mu Allah he rumai, ba wal woarehai na he de puna ba hedomaha mipaneng. Heimu wal pribadi na. Hedosama, ama Kristen ahola mia ”simoi rieling hewaka mia”, ya Yehuwa dewofang, ”Ne rumai ne baharing ne kabei miy amakang ba bangsa tara-tara mia her.”​—Kisah 2:1-4, 17.

▸ Psl. 4, par. 12; Psl. 15, par. 17

Ama Kristen hiyeng rofi wei de Allah holuk, dewal salib puna na. Nalawuhe?

1. Agama ba wal hiyeng rofi na de ibadat homi mia dong lunga he salib puna. Asing mia, hei ama puna ba alam holuk ya lek ba tafui taka paneng ba wal rofi na. Tung ribi 300 ba Yesus moni, ama Kristen de ibadat homi mia dewal salib puna na. Tung kabei mitawi, Kaisar Konstantin Roma de salib puna ba lambang ba Kekristenan hei. Heiopi de paneng Kekristenan mifaring diy. Haba salib opimu Yesus Kristus hei dil wal dotilaka na. New Catholic Encyclopedia dewofang, ”Salib ama hiyeng mu budaya dar Kristen na ya wal ama Kristen he puna na.”

2.   Yesus mu wal salib taha mi moni na. Loring Yunani ba ”salib” heiyeri mu he arti ”bata tuku ba rofi natea”, ”bata tuku nuku”, namati ”bata”. The Companion Bible dewofang: ”Loring Yunani hei [Perjanjian Baru] dewal wofang ba bata tuku ayoki na.” Yesus bata tuku rofi mi moni.

3. Pi wiy bata puna holuk Yehuwa dewal domaha na.​—Keluaran 20:4, 5; 1 Korintus 10:14.

▸ Psl. 5, par. 12

Yesus de parentah miy de murid-murid wei her ba leng ba de mimoni mipaneng iti te. Opi tung kopang 14 Nisan ama mipaneng iti, tanggal ba dosama ama Israel wei de Paskah mipaneng. Roti ya anggur, heiopi dewotiyeng diy ba Yesus he isi ya he weya, hewohaluol ama ba siye Leng Ba Mipaneng haluol hehatol nahani. Ama ba Yesus dokari mar surga mi parentah hopuna de roti ne ya anggur hedi but. Ama ba heworumai buku taha mia birang mihalor ba leng lea hedi de siye nahani haba dewal roti ne ya anggur but na.

▸ Psl. 5, par. 21

Amakang faring deworumai ba amakang he isi aroi ba wal woreya na hadoa, hare de moni he isi aroi hedi de ya de keta fala ba moni wei dokari birang. Mani de hadou worumai ba keadaan opi homi mia ama mona hedi de dar ama birang homong ya beka paneng mihadasama kang.

Surah Rieling dewal wofang ba pi isi aroi hadoa ba pong moni mati pi isi aroi hedi dar birang, haba Surah Rieling de he falaka wofang ba ama nuku moni dong nal nuku paneng beka. Surah Rieling dewofang ba, ’Hare ama ba birang de hiyeng demong haba ama mona, dekul nalwal hiyeng mahiy na. He kang, tomi te kikilikil ya, woho beka ngnawi ya nal karikarnuku dong wal wari uwa mi awang na. Ya nabuk,  e yera ba e mi ya awang nati tanut, ya faring hiyeng nati tanut daliela walna.’ (Pengkhotbah 9:5, 6, 10) Surah Rieling bay de hadou wofang ba ama nuku dong moni, ”dewai dei anai hedi; hedimia bay nala he de wotanut ngnawi”, ya dong kul walna. (Mazmur 146:4; Kejadian 3:19)

Kul, hare Surah Rieling dewal wopidasakolah ba ama nuku de mong he isi aroi wai ya afena mibirang na. Ama nuku dong moni dewai wala ya afena mibirang na, hare de pomong beka ya dewal beka paneng mipidasama na.

▸ Psl. 6, par. 5; Psl. 15, par. 17

Loring Ibrani ya loring Yunani homi mia ”simoi” ba Terjemahan Dunia Baru he arti mu tara-tara. Heiopi nal ba amakang de hehalal beka he dewotiyeng diy, hedosama anaha namati amakang ya binatang he ahel. Heiopi bay de he arti birang ba tiyeng puna hehalal beka, ya Simoi Rieling ba Allah herumai. Surah Rieling dewal wopidasakolah ba amakang mong he isi aroi dar ya ma afena mibirang na.​—Keluaran 35:21; Mazmur 104:29; Matius 12:43; Lukas 11:13.

▸ Psl. 6, par. 5; Psl. 15, par. 17

Gehena mu morak nuku hana ba Yerusalem hamina mia ba ama ya hei mia fusing waritai hiyer ya hanau. Yesus he masa mia bukti walna ba amakang ya binatang ya hei beka paneng mihadasama namati dobirang ba hei mihiyer. Hare Gehena mu wal lambang ya heyera ba wal woreya na ba amakang ba moni wei ya hei mia bekatafiela hadatareu ya hei hiyer mihalor na. Yesus de miwofang ba mahe Gehena miwati diy, heimu mong mihalor hei he Yesus dewofang.​—Matius 5:22; 10:28.

▸ Psl. 7, par. 20

Heiopi mu doa ba Yesus de mipaneng ba de demurid wei wohadasakolah ba lateiur de doa nahani. Hedosama Yesus de doa wopidasakolah ba pi opiur doa:

• ”Mahofaling ba ana mu do rieling”

  Iblis de paneng ba Yehuwa hana hadoa beka diy hare pi doa ba Yehuwa hana do sani diy. Heiopi mu he arti mahe mara surga mia ya sei buku taha mia de Allah hana holuk ya heluk te.

• ”Mahofaling ba e Kerajaan do siye”

  Pi doa ba Kerajaan Allah de ruli Iblis ba tahupang hanau, ba de ruli dolea woparentah, ya de paneng buku opi do firdaus her.

• ”Mahofaling ba e omaha de midalek . . . buku taha”

  Pi doa ba Allah hedomaha de buku taha midalek, ba ama ba heluk wei, amakang ba kul rofi de firdaus mia ba birang mihalor hedosama Yehuwa hedomaha wuda ba de amakang ahola paneng mia wuda.

▸ Psl. 8, par. 2

Yehuwa de tebusan paneng ba amakang dosa ya mong tanitang do hiring amoni. Tebusan mu nal hebeli wowawi ba birang kul rofi ba amakang ahola Adam de hanawi wai hawai. Ya wai afena amakang ya Yehuwa hanaisena ba beka de woheikang. Allah de Yesus habot buku tau sai ba de mong miy amakang dotafuda he hahasalah wowau. Yesus de mong wuhe amakang dotafuda he leng hadoa ba birang mihalor ya de kul ama rofi diy.

▸ Psl. 8, par. 21; Psl. 9, par. 13

Ngwofani ba Daniel pasal 4 mia dewotadasakolah ba tung 1914 Allah de de Kerajaan nasiy.

Ngwofani: Yehuwa de peila nuku ba ngwofani wuda miy Lei Nebukhadnezer her ba bata lea lohi ba ama hawoti. Peila hedi homi mia, heiyeri mu ama lasing tipai ba tembaga puna kodi hare wal wotulut na ba ya priode ”masa yeting ayoki”. Wosiki bata iyeri hedi wai wotuluti diy.​—Daniel 4:1, 10-16.

Ngwofani hedi opi he arti nala ba mipidasama: Bata iyeri hedi mu hedosama Allah he parentah. Tung kabei mitawi, Yehuwa de lei wei ba Yerusalem mia puna ba Bangsa Israel woparentah. (1 Tawarikh 29:23) Haba lei hedi wei dewal hadakor na wuhe he parentah wei wosiki. Tung 607 SM Yerusalem hayei diy. Nal hedi mia, ahola ba ”masa yeting ayoki hei”. (2 Raja 25:1, 8-10; Yehezkiel 21:25-27) Yesus dewofang ba, ”Bangsa afena de Yerusalem holak hosik ya leng ba ngwofani mihayei,” heimu ”masa yeting ayoki” hei he Yesus dewobesar. (Lukas 21:24) Hare ”masa yeting ayoki” mu hewosik wala Yesus de buku taha mia na. Yehuwa dewopakang ba ”masa yeting ayoki” hewosik mia te de lei nuku miahiy. Lei tifa Yesus he parentah mia te, de oweni faring miy Allah hehui hefatil ba ruli dolea mia, her mihalor.​—Lukas 1:30-33.

”Masa yeting ayoki” helunga yeng: ”Masa yeting ayoki” helunga 2.520 tung. Hare 2.520 tung heimu pi tung 607 SM mihalek, hewosik de ya tung 1914 mihayei. Heiopi mu leng ba Yehuwa de Yesus ba Mesias hatang fahuni ba de surga mia Karajaan Allah he Lei.

 Hafaring ba 2.520 pi lateiur hiyeng? Surah Rieling dewofang ba masa sua ameya heimu 1.260 leng dosama. (Penyingkapan 12:6, 14) Hare ”masa yeting ayoki” hefaring mu hedi miayoki, namati 2.520 leng. Hare 2.520 leng hedosama 2.520 tung, mbeimu ”leng nuku hedosama tung nuku”.​—Bilangan 14:34; Yehezkiel 4:6.

▸ Psl. 8, par. 23

Surah Rieling dewofang hiyeng tuku wonatea mu la nuku ba hana he Mikhael.​—Daniel 12:1; Yudas 9.

Mikhael mu Allah he pasukan he hapong puna heimu malaikat ba Allah hadakor. Penyingkapan 12:7 dewofang, ”Mikhael ya he malaikat-malaikat wei de naga hedi hadayenang . . . ya he malaikat wei.” buku Penyingkapan dewofang ba Allah he pasukan he hapong puna mu Yesus hare Mikhael mu Yesus hana afena.​—Penyingkapan 19:14-16.

▸ Psl. 9, par. 4

Miwofang opi leng he lunga ba dewotiyeng diy mu Kerajaan Allah de dar ruli Iblis habek na namakai lea de daleki te. Miwofang ba dosama opi wuda, ”ruli opi dong wosik peya” ya ”amakang hewil neng de siye”, hadou puna ba ngwofani Surah Rieling homi mia ba dewotiyeng diy leng he lunga ba dosama. (Matius 24:3, 27, 37) ”Leng dosik lal” he ahola mu tung 1914 ba Karajaan Allah dong mar surga mia parentah hopuna ya hewosik mu Armagedon mia ba ruli Iblis hanau.​—2 Timotius 3:1; 2 Petrus 3:3.

▸ Psl. 9, par. 5

Ama ba ngmoni hebirang Allah dewai hawai heri, hei he hana mihabirang. Mihabirang yeting buti Surah Rieling dewobesar. Elia, Elisa, Yesus, Petrus, ya Paulus dotafuda dong hadou ama mona mihabirang diy. Mukjizat hedi midalek mu Allah herumai hebaharing he puna wuhe. Yehuwa dewopakang ba ”ama rofi hapuna ya wal rofi hapuna na de mihabirang diy ba” buku taha mia. (Kisah 24:15) Surah Rieling bay mihabirang ba surga ya de hadou wofang. Heiopi de midalek mu leng ba ama ba miahiy namati Allah de hatang fahuni mihabirang diy ba Yesus dokari mar surga mibirang.​—Yohanes 5:28, 29; 11:25; Filipi 3:11; Penyingkapan 20:5, 6.

▸ Psl. 9, par. 13

Spiritisme mu paneng pak beka ba simoi beka hadabesar, la mipaneng namati ama afena puna, hedosama kila wali. Ama ba spiritisme mipaneng wotadasakolah ba hasalah he deworumai ba ama mona he isi aroi dar ya ma afena mibirang ba dei loki maheng hedi ya rumai baharing. Loki maheng wei bay de ama homi hol ba wal Allah heluk na. Nala he furi midalek hehalal, nal hareng amak ba wotau, te loki hatang, rumai baharing ba kul dei afena bay hadou dar spiritisme dil dotilaka. Buku faring, majalah, film, poster, ya musik homi mia, ama paneng spiritisme kang ya ama homi hafik. Nal ba ama mipapaneng hedosama ama nal miy ama mona her, ama ba ama faring hiyeng he pemakaman, leng ba mimoni wai mipaneng, nal-nal puna ya ama mona hiyeng tau iy, namati ama leng-leng he mete ba ama mona hofikang, hei wei mipaneng mu hadou loki maheng hadabesar wuda. Mani ama de ramuan puna ba loki maheng he rumai baharing puna.​—Galatia 5:20; Penyingkapan 21:8.

▸ Psl. 10, par. 10; Psl. 16, par. 4

Yehuwa mu Allah ba he kuasa midaliela, ya de adiy anai ya nal karikarnuku paneni. (Penyingkapan 15:3) Hediwuhe wofang ba nal karikarnuku he hedi Hopa ya he kedaulatan hopa, namati, he kuasa hopa ba de datang pakang wei woparentah. (Mazmur 24:1; Yesaya 40:21-23; Penyingkapan 4:11) Hatang pakang dotafuda de hukum paneng miy her. Yehuwa bay he wewenang hadoa ba tapong puna afena miahiy. Pi Allah he Kedaulatan heluk mbeimu pi mihiyena ya pi heluk.​—1 Tawarikh 29:11.

▸ Psl. 11, par. 10

Wil habek mu dokol paneng wil ba hatok mia do hayei ba mong. Heiopi mu wala la dakai na namati he isi he waka he la mia na. Wil hei wodaleki, wil hedi wal heya he isi aroi dil dosama na. Wil hedi mu pribadi nuku ba donakala.

▸ Psl. 13, par. 5

Transfusi weya mu dokter de tindakan paneng ba weya dotafuda namati komponen buti ba pi weya mi ama he isi mir namati pi weya ba bineni wai hawai miy te isi mir. Komponen buti ahola ba weya heimu plasma, weya kika, weya kuli, ya weya kasing.

▸ Psl. 13, par. 13

Surah Rieling homi mia ”mihirai diy mu” wal wofang ba hukuman na. Leng ba pi mihirai diy mu he falaka, wotadasakolah, ya he hasalah woheikang. Yehuwa de mihirai diy mu dewal kira he la tukai diy na, namati ama ba de mihirai diy mu dewal tahupang paneng mihadasama na. (Amsal 4:1, 2) Yehuwa mu hetok pati kulkang ba miy fikang wei mihadasama. Mihirai diy ba Yehuwa de miy ama heri mu kulkang ba ama midomahia homi mikang mihamol. (Amsal 12:1) Yehuwa dehui defatil wei de mihiyena, ya de hadasakolah nahani. He falaka de miy heri nahani ba he tanut hasalah woheikang, homong ba wosakolah ba wotanut, ya pak paneng ba hedomaha wuda. Fi kang wei, mihirai diy mu hanaisena mia riwil wei homong ba nalawuhe de ri luk te. Hedi bay hanaisena mia hadasakolah ba de Yehuwa, ya he Surah Rieling mihiyena ya prinsip hiyeng.

▸ Psl. 14, par. 13

Dedi weimu mahkluk roh tahupang wal woarehai na ya herumai hebaharing miy amakang mihapieti. Loki maheng mu malaikat ba tahupang. De tahupang nahani mu de donakala de Allah hetakel ba dewal Allah heluk na. (Kejadian 6:2; Yudas 6) Loki maheng wei de we Iblis hohawi ba Yehuwa hadanatea.​—Ulangan 32:17; Lukas 8:30; Kisah 16:16; Yakobus 2:19.

▸ Psl. 16, par. 4