1. Doa nala he amakang faring hiyeng ba yala pi wosakolah?

DOA ba ama jutaan de hiyeng heimu hana he Doa Bapak Kami. Yesus de doa opi puna ba demurid-murid wei wohadasakolah ba doa mu hamo heiopi wuda. Nala he de wo doa? Ya nalawuhe yala doa hedi mu kulkang ba mipidi?

2. Nal penting hamo sua teiwuda he Yesus dewopidasakolah ba pi wo doa te?

² Yesus dewofang, ”Hare ri doa mu ri our wofang, ’Nima ba mara surga mia mahofaling ba ana mu do Rieling. Mahofaling ba e Kerajaan do siye. Mahofaling ba e omaha de midalek, buku taha bay, de mara surga mia wuda.’” (Mihalal Matius 6:9-13.) Nalawuhe Yesus dewopidasakolah ba nal hamo sua opi mu pi wo doa te?​—Hehalal Catatan Hewosik 20.

3. Kerajaan Allah hei nala he pi kul hiyeng te?

³ Pong wosakolah diy ba Allah hana mu Yehuwa. Ya Allah hedomaha ba mi amakang ya buku opi mihadasama bay pong wosakolah diy. Haba nala he Yesus dewofang, ”Mahofaling e Kerajan do siye” he arti mu nala? Pi wai wosakolah ba Kerajaan Allah mu nala, nala he ko de mipaneng, ya Kerajaan hedi de lateiur paneng ba Allah hana hado rieling.

4. Kerajaan Allah mu nala, ya ma he Lei?

⁴ Yehuwa de parentah de mar surga mi nasiy de Yesus miahiy ba de Lei. Surah Rieling de parentah opi wofang  hana he Allah he Kerajaan. Yesus mu ”Lei ba, lei afena mitauhapuna, ya de Tuan ba tuan afena mitauhapuna”. (1 Timotius 6:15) Yesus mu de paneng tukai kang ba amakang he parentah ba yal opi hadoa wei mihapieti, ya amakang he parentah honuku bay Yesus he parentah mu kul midaliela.

5. Allah he parentah ya teihe mi siyei? Ya nala he de mipaneng?

⁵ Leng karbuti ba Yesus mihabirang diy de surga yai. Ya Yehuwa de hotu ba de Kerajaan Allah he Lei. (Kisah 2:33) Allah he Parentah mar surga mia ruli dolea dewoparentah. (Penyingkapan 11:15) Heiwuhe Surah Rieling dewofang ba Kerajaan Allah mu ”Kerajaan surga”.​—2 Timotius 4:18.

6, 7. Nalawuhe Yesus mu Lei ba kul kul kang miy lei amakang mihapieti?

⁶ Surah Rieling dewofang Yesus he kuasa kul lea lei afena do iy heimu ”he dedi donakala wal mong na”. (1 Timotius 6:16) Amakang he parentah ya he hapong puna dotafuda dewai mong, haba Yesus de kul wal mong na. Nalkang dotafuda ba Yesus de paneng mipidasama de hadoa mihalor.

⁷ Ngwobileni ba Surah Rieling homi mia dewofang ba Yesus mu de Lei rofi hapuna, ya homi afena hedatoka, ”Yehuwa he simoi he isi mia, simoi tanut daliela, simoi tanut kang, simoi te wong wofang ya simoi rumai baharing, simoi pengetahuan ya simoi Yehuwa hiyena funa. De Yehuwa hiyena funa de we kang hamol hiyeng. De te hasalah tahai dewal nala ba diyeng puna hehalal na, re nala ba de la mahiy dewal puna tewong wofang na. De rofi hapuna mi ama ba nal wal hopa na he hasalah tahai.” (Yesaya 11:2-4) Lei hamo opi wuda ro homaha rena?

8. Pilateiur hiyeng ba Yesus mu wal donakala parentah hopuna na?

 ⁸ Allah de amakang kabei miahiy ba Yesus dokari mar surga mia parentah hopuna. Hedosama, Rasul Paulus de Timotius wohokafang, ”Pi wopibalaibuku nasiy iti pokari hadou lei ba parentah hopuna.” (2 Timotius 2:12) Ama yeng he lei ba Yesus dokari mar surga mia parentah hopuna?

9. Ama yeng he Yesus dokari parentah hopuna? Yani he Allah de hei miahiy yoti?

⁹ Pong pasal 7 miwosakolah ba Rasul Yohanes de penglihatan nuku hehalal ba Yesus mu Lei ba mar surga mia ya 144.000 lei afena dokari. Ama 144.000 mu ma? Yohanes de he falaka wofang ba ”hana [Yesus] ya Hema hana miy hapong kai mibileni yoti”. Ya dewai tau wofang, ”Dedi wei mu dekul lumfa hewil haluol heiopi [Yesus]. Ya dedi wei mu amakang hanaisena he mibeli.” (Mihalal Penyingkapan 14:1, 4.) Ama 144.000 heimu ama Kristen ba de Allah heluk he Allah de miahiy ba Yesus dokari ”lei ba ruli dolea woparentah”. Hare de mong nahani wai mihabirang diy ba mar surga mibirang. (Penyingkapan 5:10) Rasul-rasul he masa mia ama Kristen ba Yehuwa heluk dong miahiy ba ama Kristen 144.000 hohau.

10. Yehuwa mu nalawuhete kang ba de Yesus ya ama 144.000 miahiy ba amakang woparentah?

¹⁰ Yehuwa homi kul pidatoka de paneng ba amakang bay Yesus dokari parentah hopuna kang. Yesus de pipong puna kang heimu de piyeng wuhe. Yesus mu lunga de amakang wuda hare nala he amakang de hadatareu Yesus de hiyeng. Paulus dewofang ba Yesus mu homi pidatoka, ”nala he pi hadatareu bay de hiyeng”. Mbeimu ”pidi wuda nal karikarnuku dong hadatareu diy”. (Ibrani 4:15; 5:8) Ama 144.000 dedi wei bay  de hiyeng amakang wuda mu lateiwuda. Dedi wei bay dewodabalai buku nasiy ba tarik tafiy ya wal ama rofi na de hadatareu heiwuhe pi worumai ba Yesus ya ama 144.000 mu bekatafiela ba pi hadatareu wei de hiyeng nahani.

11. Nalawuhe Yesus de demurid wei wohadasakolah ba Allah hedomaha mar surga mi daleki?

¹¹ Yesus de demurid wei wohadasakolah ba wo doa ba Allah he domaha mar surga midalek. Nalawuhe? Pong pasal 3 mi wosakolah ba Setan si Iblis mu dewal Yehuwa hei haluol na. Iblis ya malaikat ba wal dei miy Yehuwa hadakor na namati hantu-hantu wei ba wal Yehuwa hei haluol na Yehuwa de leng kabei her ba mar surga mibirang. Hare mar surga mia wala dotafuda Allah he domaha de mipaneng na. Iblis ya hantu-hantu hei Surah Rieling de lateiur wofang pasal 10 mia te pi wai faring wosakolah.

12. Penyingkapan 12:10 nal hamo ayoki ba daleki nala he dewobesar?

¹² Surah Rieling dewobesar ba wal mi lunga na Yesus de Lei ba Allah he Kerajaan hei de Iblis hada yenang. (Mihalal Penyingkapan 12:7-10.) Ayat 10 homi mia nal ayoki ba kul penting ba daleki hei dewobesar. Kerajaan Allah dong woparentah Yesus he Lei ba Iblis surga mia de sei buku tauwat. Hedosama nal-nal ba pi wosakolah ngmidaleki diy.

13. Iblis mi ruli opi tauwat nala he mar surga midaleki?

¹³ Surah Rieling de he falaka wobesar ba Iblis ya hantu-hantu wei uiytaha miwat malaikat-malaikat ba dei miy Allah hadakor wei homi mikang mihamol. Pi mihalal,  ”Surga homi mikang mihamol, ya ridi ba homi mia wei bay romi mikang mihamol!” (Penyingkapan 12:12) Yala surga mia kul rama amoni ya kang hamol homi mia, heimu ama ba surga mia Allah hedomaha de milak minatea wuhe.

14. Iblis surga mia ruli opi tauwat nala he midaleki?

¹⁴ Haba birang ba buku taha mia kul dei afena. Nal bekatafiela ama hadatareu heimu ”Si Iblis buku tau sai diy”, ya de ”hiyeng he leng la kabei hare de tukai kilikil”. (Penyingkapan 12:12) Iblis de tukai kilikil mar surga mia hei wat sei buku opi dotau sei ya de hiyeng wal lunga na ti dong mong. Hare bekatafiela, wal rama amoni na, tarik tafiy ya susah malohi ba ruli dolea mia Iblis he heiyeri.

15. Allah hedomaha ba miy buku opi mihadasama mu nala?

¹⁵ Haba Allah he domaha ba mi buku opi mihadasama wal midamohawai na. Allah dar domaha ba ama rofi Firdaus buku opi taha mia ba de birang mihalor. (Mazmur 37:29) Ya Kerajaan Allah de heiur paneng, haba ko lateiur?

16, 17. Kerajaan Allah hei nala he Daniel 2:44 dewobesari?

¹⁶ Ngwofani ba Daniel 2:44 dewofang, ”Dara lei-lei wei he masa mia Allah he kuasa hopa ba mara surga mia de kerajaan nuku surga nasiy, ya heimu de nau beka ya kerajaan hedimu dewal bangsa afena hatana hayei na. Ya kerajaan hedi de kerajaan afena hanau, haba Kerajaan hedi de natea mihalor.” Karajaan Allah hei nala he ayat opi dewopidasakolah?

¹⁷ La ahola dewobesar ba Kerajaan Allah ”dara lei-lei he masa mia” dong parentah hopuna. Heiopi he arti mu parentah afena dara buku taha mia haba Kerajaan Allah dong parentah hopuna. He ayoki, dewopidabesar ba  Kerajaan Allah de natea, de parentah afena hemanau, haba hedonakala natea mihalor. He sua, Kerajaan Allah ya parentah ba buku taha mia mu de dadayenang. Kerajaan Allah hei mi iy, ya he donakala Kerajaan nuku ba buku taha mia parentah hopuna. Hewohaluol, amakang wei he parentah ba kulkang hadoa.

18. Yenang hewosik ba Kerajaan Allah ya amakang he parentah hei hana he nala?

¹⁸ Lateiur Kerajaan Allah de amakang he parentah miy ba he donakala kuasa hopuna? Dar yenang hewosik na ba hana he yenang Armagedon, hantu-hantu de lei-lei wei hewal ”lei-lei dotafuda ba buku taha mia dei doluol ba Allah ba kuasa midaliela he yenang lea hei”. Rofi, amakang he parentah ya Kerajaan Allah hei dil dadanatea.​—Penyingkapan 16:14, 16; hehalal Catatan Hewosik 10.

19, 20. Nalawuhe Kerajaan Allah mu pohomaha?

¹⁹ Nalawuhe Kerajaan Allah pohomaha? He alasan mu tara sua. He alasan nuku, pi hasalah homi mia hare pi tarik tafiy ya pi mong kang. Haba Surah Rieling dewofang ba Kerajaan Allah he parentah homi mia mu pong birang mihalor kang. Yohanes 3:16 mia dewofang ba, ”Allah mu dekul amakang mihiyena wuhe de Wil Neng nuku wala haba de mipidi, hare pi hei worumai pi wal mong na haba pi birang mihalor kang.”

²⁰ He alasan ayoki nalawuhe Kerajaan Allah mu pohomaha, heimu ama tahupang kadia hanaisena he pi mibirang wuhe. Besar lasar walrofi na, ayer kiyar faring, ya tafui taka. Heiopi pi hamohawai beka, haba Allah de paneng kang. Ama ba tahupang kadia mipaneng iti Allah de Armagedon mihamong. (Mihalal Mazmur 37:10.) He alasan sua nalawuhe Kerajaan Allah mu pohomaha,  heimu amakang he parentah mu wal rumai na, tahupang nati korupsi. Amakang he parentah dewal ama mihomong ba Allah heluk na. Surah Rieling dewofang ba ”amakang ya amakang nahani mideiwokuasa hare mie beka wonatea diy”.​—Pengkhotbah 8:9.

21. Lateiur Kerajaan Allah de Allah hedomaha miy buku opi tau paneng?

²¹ Armagedon dong wosik Allah he domaha Kerajaan Allah dong mipaneng ba buku opi taha midalek. Hedosama, heimu Iblis ya hantu-hantu wei haloi. (Penyingkapan 20:1-3) Hewosik ama wal hafiy ya mong na. Korban tebusan hadoa wuhe amakang dotafuda ba Allah hei haluol de birang mihalor ba Firdaus mia. (Penyingkapan 22:1-3) Kerajaan opi de Allah hana hado Rieling. He arti mu nala? Heimu he arti Kerajaan Allah dong buku opi woparentah amakang dotafuda dong Yehuwa hana heluk.​—Hehalal Catatan Hewosik 20.

22. Pilateiur hiyeng ba Yesus de dar buku taha mia namati ngmihabirang diy de dar Lei na?

²² Yesus de demurid wei wohadasakolah ba berdoa, ”Mahofaling ba e Kerajaan dosiye.” Hare heimu rofi ba Allah he parentah ariy falaka de siye. La ahola-ahola  Yehuwa de parentah nasiy ya de Yesus hatang fahuni ba de Lei. Na Yesus de surga yai dong Lei? Walna, heleng ba woharosa hadoa. Leng kabei mitawi ba Yesus mihabirang diy, Rasul Petrus ya Rasul Paulus de Yesus hei ba Mazmur 110:1 dilia wai miwofang. Ngwofani hedi Yehuwa dewofang, ”Natang kang harena mimiti ba e takel wei de paneng ba sei e tok uwa mi iy.” (Kisah 2:32-35; Ibarani 10:12, 13) Yesus de leng yeng he harosa te Yehuwa de hatang fahung ba de Lei?

23. (a) Yani te Yesus dong Lei ba Kerajaan Allah woparentah? (b) Pasal hewohaluol nala he pi wai wosakolah?

²³ Tung-tung ba dara tung 1914 pei we na, ama Kristen ba homi rofi kabei de hiyeng ba tung hedi mu tung ba kul penting, hedosama Surah Rieling dong wofani. Nal ba ruli taha midaleki dewotiyeng diy ba tung 1914 hehalek mu rofi. Tung hedimia Yesus dong Lei ba Parentah hopuna. (Mazmur 110:2) Wosiki Iblis mi buku opi tuwat ba yala ”he leng la kabei”. (Penyingkapan 12:12) Pasal hewohaluol pi he bukti hehalal ba pong leng kabei wala hu mibirang. Pi hadou wosakolah ba Kerajaan Allah de Allah hedomaha sei buku opi tau paneng.​—Hehalal Catatan Hewosik 22.