1-3. Ama mona hei hetatangar nala he ama faring de midatangar, ya agama faring de lateiur wohawai?

SURAH RIELING dewopidapakang ba heminukumia ti ”mong tanitang dong walna”. (Penyingkapan 21:4) Pi pasal 5 mi wosakolah diy ba tebusan mu de paneng pi birang mihalor kang. Haba yala ama dar mong. (Pengkhotbah 9:5) Hare pi tatangar lea nuku hadoa ba pi mitatangar, pi mong nala he midalek?

² Ama ba pi mihiyena moni hetatangar-hetatangar ba eyala wei hewohawai mu kulkang ba po hiyeng te. Ko pi mitatangar, ’Nala he de hadatareu? De pi halal kang rena? De pomong kang rena? Pokari wai mitiyeng kang rena?’

³ Agama-agama ba ruli taha mia hetatangar ba eyala wei de wohawai mu tara-tara. Mani dewotadasakolah ama ba kang de surga ya, haba ama ba tahupang de aralefing mi hiyer. Mani ama wai wofang e mong e simoi wuda ba e ameya ba deicu moni wei rokari robirang. Ya wai afena dewofang ong moni wai e hasalah tahai ya wai mi tau amang, nati wai e isi afena puna ba mi awai birang ba ama afena wuda, nati binatang wuda.

4. Ama mona hei nal dosama nala he agama faring dewotadasakolah?

⁴ Agama-agama ba ruli taha mia dewotadasakolah mu tara-tara. Haba mifaring dotafuda nal hamo nuku ba ladosama he de puna wotadasakolah. Dewotadasakolah nahani ba amakang dong moni he isi aroi dar ya ma birang. Na hei rofi?

5, 6. Pi mong nala he midalek?

⁵ Pi mong nala he midalek Yehuwa de hiyeng, ya dewopokafang leng ba amakang dong moni hebirang bay ngwosiki. Mong tanitang mihawai mu birang. Hare ama nuku de mong he tanut ya nala he de dar birang ba de hadatareu bay walna. * Pi mong pong halal beka, pong mahiy beka, pong wai nal wal wotanut na.

⁶ Lei Salomo de wobileng ba ”ama mona de nal wal hiyeng na”. Ama mona dewai wal mitiyena ya tekilikil na, ya ”e yera ba e miyai, awang, tanut, pengetahuan, tanut daliela bay walna”. (Mihalal Pengkhotbah 9:5, 6, 10.) Ya Mazmur 146:4, Surah Rieling dewopokafang ba ama nuku ngmoni ”hetanut” bay moni.

7. Ama mona hei Yesus de lateiur he falaka wofang?

⁷ Yesus hemokeni kang Lazarus moni de demurid wei wohokafang, ”Lazarus pi mokeni tade.” Haba Yesus dewobesar mu wal Lazarus kul dotade hei he dewobesar na. Hewohaluol Yesus dewofang, ”Lazarus ngmoni.” (Yohanes 11:11-14) Hare mong ya tade hei Yesus de do iy. Dewal wofang ba Lazarus surga mia na, namati henang henaha ba deicu moni wei dokari wai dei toluol na. Ya dewal wofang ba Lazarus de aralefing minatea ba ara heiwai na, namati wai mi tau hamang ba ama afena hedi namati binatang nuku wuda. Walna, Lazarus la dotade dafana. Ayat-ayat afena bay dewofang ama ba mong mu hedosama de la dotade. Surah Rieling dewofang heimia  Stefanus ama hei faheng, de ”tade haba mona”. (Kisah 7:60) Rasul Paulus bay dewobileni ba ama Kristen kabei ”ngmona haba dotade wuda nahani”.​—1 Korintus 15:6.

8. Pi lateiur hiyeng ba Allah de amakang paneni mu wal domong na?

⁸ Adam ya Hawa na Allah de hei paneni ba abeta domong nahani? Walna! Yehuwa de hei paneni ba birang mihalor kang, ya dewal harik hafiy na. Yehuwa de amakang paneni de paneng ba domaha amakang de birang mihalor kang. (Pengkhotbah 3:11) Hedosama fikang dewal domaha ba dewil fingketa diy ba mong, Yehuwa he  tanut bay piy wuda. Haba Allah de piy Paneni ba birang mihalor, nalawuhe yala pi mong?

9. Nalawuhe Yehuwa he parentah mu Adam ya Hawa dekul heluk te?

⁹ Taman Eden mia Yehuwa de Adam wohokafang, ”Bata ba opi mia wei dotafuda he buka e ne kang. Haba bata ba pengetahuan kang ya beka heimu he buka e ne na, e ne leng hedi mia bay e mong.” (Kejadian 2:9, 16, 17) Parentah opi mu haluol wal beka na, ya nala he kang ya nala he beka ba miy Adam ya Hawa mihadasama mu Yehuwa he hak hopa ba hotau. De Yehuwa heluk nahani dewotiyeng diy ba de Yehuwa he wewenang heluk wuhe. Heibay dewotiyeng diy ba nala he Yehuwa de her nahani de hekang wofang te.

10, 11. (a) Iblis de lateiur Adam ya Hawa homi hol? (b) Nala ba Adam ya Hawa de paneni nalawuhe he hasalah wotafang beka?

¹⁰ Haba de miahiy ba wal Yehuwa heluk na. Iblis de Hawa wohokafang, ”Na Allah dekul-kul worokafani ba bata opi taman mia wei he buka ri ne na?” Hawa de wohawai, ”Bata buka opi wei dotafuda ni ne kang haba bata buka ba taman tena minatea Allah dewofang: ’Ri ne na, hopaniy bay dodoma ba ri mong na.’”​—Kejadian 3:1-3.

¹¹ Hewohaluol Iblis dewofang, ”Ri kul wal mong na. Allah de hiyeng heimia ri ne riyeng dong taber ba rong Allah wuda nal kang ya nal beka rong hiyeng.” (Kejadian 3:4-6) Iblis domaha nala he kang ya nala he beka ba Hawa mihadasama he deinal woheinuk miy kang. Leng hedi mia Hawa dewal Allah heluk nala he ko midaleki Iblis de hei ayeri. Iblis de Hawa wohokafang ba dewal mong na, hare bata buka hei de nei ya he ameya dewai ya de neng heri diy. Adam ya Hawa de hiyeng Yehuwa dong  wofang ba bata buka hedi mu doma ne na. Hare bata buka hedi de ne de miahiy ba parentah ba falaka ya labui ya tomi misei dewal heluk na. De ne nahani de wotiyeng diy ba dong wal Dema surga mia ba mihiyena heluk na. Nala he de paneng he hasalah wotafang beka!

12. Adam ya Hawa dewal Allah heluk na, nalawuhe hedi mu wal kang na?

¹² Nala he pi fingketa ahola de paneng dewotiyeng diy ba dewal ama ba hei Paneni heluk na, ya hedi mu homi habek! E tukai awang ba e wil hado lea haba hewohaluol dewai midawai beka miadasama ya nala he e hafang ba de mipaneng dewal mipaneng na, omi lateiwuda? Na hei de paneng kul-kul omi hado harik?

13. Yehuwa dewofang ”e anai hare e wai awai anai misei” he arti mu nala?

¹³ Hedimia Adam ya Hawa dong wal Allah heluk na he leng ba birang mihalor mu hopa nawi. Yehuwa de Adam wohokafang, ”E anai hare wai awai anai misei.” (Mihalal Kejadian 3:19.) Heimu he arti Adam dewai dawai anai misei ahola ba dar hadoa na wuda. (Kejadian 2:7) Hewohaluol Adam de hasalah mihayei wuhe de mong ya dong walna.

14. Nalawuhe pi mong?

¹⁴ Hare asing Adam ya Hawa de Yehuwa heluk, yala bay ko de dar birang teni. Haba mie dong wal Allah heluk na de hasalah mihayei ya mie hehamohawena de mong nahani. Hasalah mu tarik lea ba wal mikakang  na nuku wuda ba pi ketafala ahola dedopiiti. Potafuda hasalah hareng tamani wuhe pi mong. (Roma 5:12) Haba hedi mu wal Allah hedomaha ba mi amakang mihadasama na. Allah mu dewal domaha ba amakang mong, ya Surah Rieling dewofang ba mong mu amakang he ”takel”.​—1 Korintus 15:26.

15. Nal hiyeng rofi ba ama mona hei de lateiur pomong ba pi hiring amoni kang?

¹⁵ Nal faring ba ama wotadasakolah mu wal rofi na, haba nal hiyeng rofi ba ama mona hei de tadoa hiring amoni diy. Surah Rieling dewopidasakolah ba ama mona mu dewal midomahia ba hafiy, namati homi wosei dewal hiyeng na. Pi hadabesar beka ya dedi wei bay de pi dabesar beka. Ama mona pi homong beka dei bay de pomong beka. Dewal tol na hare hiyena funa na. Wai afena, agama faring dewotadasakolah ba ama mona mu dewai ya afena mibirang ya pi homong kang, haba pi seng miy agama he pemimpin her nati ama ba tomomok wei her te. Haba nal hiyeng rofi ba ama mona hei pi hiyeng, nala ba ama ayer pi wal haluol na.

16. Ama mona hei agama faring de lateiur tei ayer?

¹⁶ Iblis de agama ba wal hiyeng rofi na puna ba tei ayer, ya de paneng ba pi wotanut ama mona mu kul dar birang. Hedosama agama faring dewotadasakolah ba pi mong pi isi aroi dar ya afena mi birang. Na e agama hei he dewoadasakolah, re nala he Surah Rieling dewofang he dewoadasakolah? Iblis de ayer puna paneng ba ama faring dewal Yehuwa hei haluol na.

17. Nalawuhe ama wofang ba ama mona mi aralefing mihiyer mu Yehuwa hana habek?

¹⁷ Nala he agama faring dewotadasakolah de paneng  ba pi farot kang. Hedosama agama mani dewotadasakolah ba ama tahupang mu aralefing mihiyer mihalor. Heimu ayer ba Yehuwa hana habek. Allah dewal domaha ba ama aralefing mihatani na, heimu Allah kang wuhe! (Mihalal 1 Yohanes 4:8.) Ama nuku dewil hatang de aralefing tau hiyer omi lateiwuda? Ko e wotanut ama hedi kul tahupang. Ama hedi ong ko oaiy hada tiyeng hiyena na. Heihe Iblis dekul domaha ba pomi heiur miy Yehuwa mihadasama!

18. Nalawuhe pi wal ama mona hiyena funa na?

¹⁸ Agama mani dewotadasakolah leng ba ama mong, de midamohawai ba de simoi wuda. Wotadasakolah hedi de paneng pong simoi heluk namati pomi wofuna, heimu de te mokeni ba rumai nati pi takel ba pi wofuna kang. Ayer hedi mi faring ama worumai. De ama mona hiyena funa hare de holuk nahani, wal Yehuwa he de holuk na. Pi hiyeng ama mona mu he tanut ya homi bay mona hare pi kira he, hei wotanut na. Yehuwa he piy Paneni. He Allah hiyeng rofi, heiwuhe he donakala pi holuk te.​—Penyingkapan 4:11.

19. Nal hiyeng rofi ba ama mona hei de lateiur pomong?

¹⁹ Nal hiyeng rofi ba ama mona hei pi hiyeng agama he ayer po hiring amoni. Ya nal hiyeng rofi opi de pomong ba pakang kang ba Yehuwa de paneng miy pi birang hei ya ariy falaka ba kang hamol hei pi hiyeng kang.

20. Pasal hewohaluol nala hei pi wai hehalal?

²⁰ Asing mia neng nuku ba rofi hapuna hana he Ayub de midatangar, ”Amakang de mong ko dewai midabirang kang rena?” (Ayub 14:14) Ama mona ko dewai midabirang kang rena? Hewohawai ba Allah dewopokafang ba Surah Rieling homi mia kul-kul tomi mihakang. Pasal hewohaluol te pi wai hehalal.