Buku opi homi mia ong faring wosakolah, tebirang hadokang ba Surah Rieling homi mia hekang faring miy Edi ya, E tofa homi mia mihadasama. Yehuwa domaha rikang hamol homi mia. De rida pakang he ibadat he riydeicura, ”nal afena dewai hadou miridasama”. (Matius 6:33) De kul domaha ri he mokeni-kang. Hekang leng kopang empaneng ba, Yehuwa rilia miridap. Hei opi nalkang lea nuku wuda ba, mi ama nunuku mihadasama.—Matius 22:37, 38.

NALA HE SURAH RIELING DEWOFANG: ”’Yehuwa dewofang’, ne rima kang riy wei ri ne wil.” (2 Korintus 6:18) Allah dekul domaha, E he mokeni-kang. Lateiur, doa he puna. Yehuwa de iyena bey ba ’doa E miharang na’. (1 Tesalonika 5:17) Nala he E tanut mia ya, E wofuna Yehuwa homi E datoka. (Filipi 4:6) E tofa homi mia rokari doa, hedi mia ri hiyeng Yehuwa mu kul hadoa.

Wai afena, pi Allah hadabesar pidi bay pi hei womahia te. Lateiur Allah hamau buka wotahai ya, Surah Rieling mihalal. (Mazmur 1:1, 2) Nala he E wosakolah, E wotanut te. (Mazmur 77:11, 12) Wai afena mu, teitoluol Kristen etok hemayasing te.—Mazmur 122:1-4.

Yehuwa rinaisena do rumai temati, Yehuwa hana E miy ama afena wohadabesar te. Hei he E paneng, Yehuwa rokari rinaisena de rumai.—Matius 28:19, 20.

E MIPANENG KANG:

• Doa ya, Surah Rieling mihalal mu hei opi leng kopang empaneng te

• Tofa homi mia awang rohani he deicura tehu, wai afena paneng

NALA HE SURAH RIELING DEWOFANG: ”E Yehuwa mihadap, dei bay deng adap.” (Yakobus 4:8) Tofa homi mia he ibadat E leng nuku iy te, ya empaneng iti. (Kejadian 18:19) Haba, wala hedi mani na. Ri birang leng kopang Yehuwa de homi mia te. Ri tofa homi mia derumai, Yehuwa hei ri wobesar iti ”e tofa mimiti, e lela haluol, e tade, e nasey, Allah hamau buka wofang iti te”. (Ulangan 6:6, 7) Pomaha Yosua hei pi woreya dewofang, ”Nedi ya ne tofa homi mia numaha Yehuwa hei milak minatea.”—Yosua 24:15.

E MIPANENG KANG:

• Nala he hiyeng ya tafok ba tofa homi midalek, leng kopang ibadat tofa homi mi wobesar te