Neng mol, wil hadoa homi mikang mihamol haba, hopa mi beka diy. Leng faring ya herumai hebaharing dotafuda puna wil meka wofikang, hedi opi dara he tanut mia na. Heya hema tifa leng ba tade wal hadoa na, dotafuda damohawai. Hei opi depaneng dilia la de kikilikil. Hare, rilia la rihahaluol mu ri kul paneng ba rimiy riypung dewoupi ya, wil meka wofikang. Wong ba, Surah Rieling homi mia delateiur romong?

NALA HE SURAH RIELING DEWOFANG: ”Kasih mu kul tei hoaring ya, homi kang.” Wai, kasih mu ”wal piy he mihaler na ya, dewal tei paneng ba kilikil na.” (1 Korintus 13:4, 5) Hedi mia te ong heya, leng hedi yala, wil he E tanut mia. Haba, E neng dewotanut ong wala hehalal na. Hare, wo afani he, E neng bay E hehalal te. Eihoaring ya, kang do opa, paneng ba dedi bay dewil hat ya habut.

”Neng wei . . . ri hiyeng mihalor ba ropa, ri puna rimol rokari birang.” (1 Petrus 3:7) E mol he rumai baharing mu, mifaring mi riwil mihadasama. Hare, E hiyeng te hei opi mu awang tifa nuku ba de stres, hewaka womoling, ya hapong kabei mi bebeka diy. Mani, de ehalal demidoding. Haba, E larama, ”ama ba dei hoaring hopa, hedosama neng rumai baharing wuda”. (Amsal 16:32) Do maha mati, E wohiyeng diy ya wohamingtau.—Amsal 14:29.

E MIPANENG KANG:

• Amaneng: Akuni bay, emol homong wil habut ya hathawel te. Leng ba nal afena hei emihosei ba leng faring E mi, emol ya ewil mihadasama

• Amamol: Neng dewofang ba, de omong wil habut ya hat hei haluol. De paneng omi hoyai na mati, mihosesei na, haba eiy hoaring ya kang hamol he, E wohiyeng diy

NALA HE SURAH RIELING DEWOFANG: ”Ri isi lanuku nahani.” (Kejadian 2:24) Yala ama tifa nuku wai tofa mia, rilia hiyeng ”ri isi lanuku”. Paneng ba rinaisena de rumai te.

Ama molmu, eneng de omong mati E hekang wofang te. Heluk mu, E wohiyeng diy hedi mu ’daweng wuda’, hedosama, nala tifa wuda. Hare rilia ribirang hado rumai diy. (Amsal 12:18) Ama nengmu, emol wohokafang E tukai mi hiyena ya, heluk. Hare awang lea ba de paneng mi tofa homi mi hadasama, E hekang wofang te.—Amsal 31:10, 28.

”Wala tara-tara teihu mihaler na. Haba, afena bay deicura te.” (1 Korintus 10:24) Neng mol tara-tara kang hamol paneng mi miridasama te. Neng mol ri leng hiring puna ridabesar, miripieta rikang rihamol wofang te. Ya, miriywomahia te. Rotade roiti hei rilia miritokang ba worohapuna na. Neng mol nala he ri hiyeng, heimu tara-tara. Surah Rieling dewofang, ”Ri isi hei miripieta roheaiy diy he. Haba, rilia worobesari ba romaha diyce.” (1 Korintus 7:3-5) Hare, hei opi rilia he falaka wofang te. Riy hoaring ya, ro hiyeng rohareng ba rinaisena mia hey dekul rumai.

E MIPANENG KANG:

• Leng ba rilia ronakala hei worifani he

• Nal kiding-kiding mi paneng mi neng mol miridasama, hedosama neng mol ri dara miriyena wuda. Bunga tabot ya, kartu tabot

NALA HE SURAH RIELING DEWOFANG: ”Dara o meka bileng rieling ong hiyeng de eiy paneng, tanut daliela ba birang hei dong opa.” (2 Timotius 3:15) Riwotanut rilateiur riwil kiding opi hadasokolah. Wil meka dara heya hatok mia, he tanut sakolah bay hadoa. Dara heya hatok mia, dong deya dema hamau mahiy heya hema he tanut bay dong hiyeng. Dara meka buku mihalal mi wohokafang te. De dara nal wala hiyeng na. Maice dong lea, dong domaha buku karikarnuku mihalal.

Ri Allah hana puna wil wohadasakolah, doma ri wotanut wil dara kira hekiding. Wil hiyenabey rokari doa, mi Yehuwa mihadasama. (Ulangan 11:19) Wil rokari aluwong ya, Allah hatang pakang puna wil wohadabesar. (Mazmur 78:3, 4) Kang rimiy Yehuwa mihadasama, riwil dong lea dei bay dekang hamol mi Allah mihadasama kang.

E MIPANENG KANG:

• E doa hapong puna E fang, E lateiur ewil meka wohadasakolah

• Dara dokiding loring ba he isi hadoa, E awa he yera nuku puna ewil wohadabesar