Samz 33:1-22
33 Sé pou zòt tout ki dwèt fè tjè zòt kontan,épi glowifyé Bondyé Senyè-a pou sa i ja fè.
I bon pou zòt tout ki ka obéyiʼy lévé nonʼy.
2 Jwé hap-la bay Bondyé Senyè-a pou diʼy mèsi.Chanté ba li èk mizik kòd-la.
3 Chanté an chanté nèf ba li,jwé hap-la byen,èk hélé fò afòs zòt kontan!
4 Pawòl Bondyé Senyè-a vwé,èk ou sa mété tout konfyans ou an sa i fè.
5 Bondyé Senyè-a enmen sa ki dwèt èk i pa ni pwéféwans.
Toupatou an latè-a moun ka wè mannyè i toujou enmen yo.
6 Bondyé Senyè-a palé, èk syèl-la vini fèt,i souflé, èk sé étwal-la ki an syèl-la vini fèt.
7 I sanblé tout lanmè-a adan an sèl plas.I mété an bòn bay lanmè-a pouʼy pa janbé.
8 Sé pou tout moun ki an latè-a ni wèspé pou Bondyé Senyè-a!
Sé pou moun tout plas onnowéʼy!
9 Lè i palé, latè-a té fèt.Èk lè i konmandé, tout bagay pawèt.
10 Bondyé Senyè-a ka kwazé plan sé nasyon-an,èk i ka anpéché yo fè sa yo ni lidé fè-a.
11 Mé plan Bondyé Senyè-a ka doubout pou tout tan.Sa i ni lidé fè-a ka toujou fèt.
12 Pa dé bon i bon pou nasyon-an ki ni Bondyé Senyè-a pou Bondyéʼy-la.Pa dé bon i bon pou sé moun-an i ja chwazi pou wisivwè sa i pwonmèt-la!
13 Bondyé Senyè-a wèsté an syèl-la,i gadé anba èk i wè tout lézòm.
14 Koté i asid ka kondwi-a,i gadé tout moun ki ka viv an latè-a.
15 Sé li ki ba yo sèvèl-la yo ni an tèt yo-aèk i sav tout sa yo ka fè.
16 Sé pa an gwan kantité sòlda ki ka fè an wa genyen ladjè-a.Sé pa an pil kouway ki ka fè an sòlda bat lèlmiʼy.
17 Pa kwè an chouval ladjè kay fèʼw genyen batay-la.Tout kouway-la i ni-an pa kay chapé sòlda-a ki anlèʼy-la.
18 Mé zyé Bondyé Senyè-a asou sé moun-an ki ni wèspé pou li-a,sé moun-an ki ka èspéyé èk tout konfyans yo an lanmityé-a i toujou ni pou yo-a.
19 I ka délivwé yo hòd lanmò,èk i ka tjenn yo vivan lè péyi-a ni lafen.
20 Nou ka èspéyé èk konfyans pou sa Bondyé Senyè-a ja pwonmèt nou-an.
Sé li ki ka pwotèkté nou,sé li ki ka édé nou.
21 Nou ni tjè kontan pou sa i ja fè ban nou.Nou ja mété tout konfyans nou an li paski sé li yonn ki Bondyé.
22 Bondyé Senyè, kité lanmityéʼw toujou wèsté épi nou,menm kon nou ka èspéyé asouʼw èk konfyans.
