Sé kondwitè latè-a èvèk ògannizasyon entònasyonnal p’òkò éwisi mennen lapé asou latè. Okontwè, jòdi jou la ni pli mové dézagwéman an latè-a pasé pyès lòt tan dépi dézyenm gwo ladjè-a. Yon ka an pòpilasyon latè-a, sa vlé di apipwé dé (2) bilyon moun, ka viv an plas ki ni sé mové dézagwéman sala.

 Poutji lézòm pa sa éwisi mennen lapé asou latè-a? Kisa Bib-la ka di asou sa?

1.  1. Bib-la té di, diwan dènyé tan-an, sa vlé di diwan tan-an nou ka viv apwézan, moun té “kay adowé kò yo an chay, yo [té] kay enmen lajan, yo [té] kay bava, yo [té] kay kwè yo enpòtan, . . . [yo pa té kay fidèl], . . . yo pa [té] kay pawdonnen lézòt, . . . yo pa [té] kay sa konpòté kò yo byen, yo [té] kay bwital, . . . yo [té] kay fè ében di népòt bagay san katjilé, yo [té] kay ni an chay lògèy.” Sé vyé atitid sala ka anpéché moun fè éfò pou viv an lapé épi yonn a lòt, èvèk sa sé yonn sé wézon-an pouki lézòm pa sa éwisi mennen lapé asou latè-a. ​—2 Timòfi 3:2-4.

2.  2. Bib-la ka di a klè: ‘Sé pa lézòm ki sipozé chwazi chimen’y.’ Èk i di ankò: ‘Sé pa dwa an nonm pou désidé ki koté pou mété pyé’y.’ Alò, ki sé yon moun ki ka twavay pa kò’y, ében on gwoup moun ki ka twavay ansanm, lézòm pa ni abilité-a pou wanjé pwoblenm yo, san èd Dyé Jéhova, a Kwéyatè nou.​—Jérémaya 10:23.

3.  3. Latè-a anba kondwit Satan Denmou-an, èvèk Satan sé on kondwitè ki méchan, i ni an chay pouvwa, èk i “ka kwennen sé moun latè-a.” (Wévélasyon 12:9) Konsa, tout tan “latè-a anba pouvwa Denmou-an,” asiwé la kay ni ladjè èk tout kalité dézagwéman.​—1 Jan 5:19.

 Bib-la ka ban nou asiwans-lan ki, sé Bondyé ki kay mennen lapé asou latè-a, pa lézòm.

•   ‘Jéhova di: “Mwen konnèt sa mwen ni an lidé mwen pou mwen fè bay zòt. Sé pa kalamité mwen vlé mennen asou zòt. Mé mwen vlé bay zòt lapé épi èspwa pou denmen.’”​—Jérémaya 29:11.

 Mé, ki mannyè Bondyé kay akonpli pwonmèt sala? Mi sé sa Bib-la ka di: ‘Bondyé-a ki ka bay lapé kay kwazé Satan toutalè.’ (Ronm 16:20 NWT) Wi, Bondyé kay sèvi on gouvèdman ki an syèl, pou mennen lapé oliwon latè-a. Bib-la ka kwiyé gouvèdman sala ‘Wéyòm Bondyé.’ (Louk 4:43 NWT) Èk sé Jézi Kwi ki Wa an Wéyòm sala. Lè Jézi ka gouvèné latè-a, moun kay apwann mannyè pou viv an lapé épi yonn a lòt.​—Izaya 9:6, 7.

•   Pou apwann pli, li atik-la ki ni tit-la “What Will God’s Kingdom Accomplish?”