Toupatou oliwon latè-a, politik ka annékòz divizyon anpanmi moun. Pew Research Center sé yon òganizayon ki ka fè wichach. An lanné 2022, yo té palé épi gwanmoun an diznèf (19) diféwan péyi. Yo di, “65% an sé gwanmoun sala di, swé la ni gwo dézagwéman ében dézagwéman ki byen mové an péyi yo ant moun ki ka sipòté diféwan patizan politik.”

 Ki mannyè i yé an péyiʼw? Ès la ni pli dézagwéman anpanmi moun lèʼy vini pou zafè politik? Pouki ou kwè sa ka fèt? Ès pyèsonn ében pyès gouvèdman sa wanjé sa? Annou gadé sa Bib-la di.

 Bib-la di, an tan nou, sa vlé di, an “dènyé tan-an,” an chay moun té kay ni vyé atitid. Èk sé atitid sala té kay fèʼy byen difisil pou moun viv an lilyon épi yonn a lòt.

•   An 2 Timòfi 3:1-3, Bib-la di: “La kay ni lè ki kay difisil asou dènyé tan-an. Nonm kay adowé kò yo an chay, . . . yo pa kay sa konpòté kò yo byen.”

 Magwé an pil gouvèdman ja fè fòs kò yo pou fè bagay pli mèyè, sa pʼòkò fèt. Pouki? Ében sé paski chak moun ni an diféwan wipinyon, èk sa ka fèʼy difisil, jis enposib, pou yo mété tèt yo ansanm pou wanjé sé pwoblenm-lan ki ka ègzisté. Sitiwasyon sala ka konfimé menm sa Bib-la té di dépi lontan.

•   Pou ègzanp, an Ékléziyastis 8:9 i té di: ‘Moun ka donminé lòt moun pou fè yo soufè.ʼ

 Kanmenm, Bib-la ka di nou ki gouvèdman ki sa wanjé pwoblenm sala.

 Silon Labib, sèl kondwitè-a ki sa wanjé tout sé pwoblenm-lan ki ka ègzisté an latè-a sé Jézi Kwi. Jézi ni pouvwa-a, lotowité-a, èk dézi-a pou édé tout moun pou viv an lapé èk an lilyon.

•   Anfen, an Sam 72:7 Bib-la di: ‘Padan kondwit li, moun ki dwèt kay fléwi, èk lapé kay débondé.ʼ

•   Èk Sam 72:11 di: ‘Tout sé nasyon-an kay sèviʼy.ʼ

 Jézi sé pli bon kondwitè-a paski i mélé épi moun èk i vwéman vlé édé yo, sitou moun lézòt ka maché asou.

•   Mi sé sa Sam 72:12-14 ka di konsèné‘y: ‘I kay délivwé moun ki pòv ki ka kwiyé pou soukou. Osi, i kay délivwé maléwé-a épi népòt moun ki pa ni pyèsonn pou édé yo. I kay ni pityé pou lé maléwé èk moun ki pòv. Èk i kay sové lavi moun ki pòv. I kay délivwé yo anba enjistis èk vyolans.ʼ

 Ou sa apwann pli konsèné Wéyòm Bondyé, yon gouvèdman ki an syèl ki ni Jézi kon kondwitè. Ou sa osi apwann mannyè ou sa sipòté wéyòm sala èk enjwi sé bennéfis-la i kay mennen. Pou édéʼw fè sa ou sa:

•   gadé vidiyo-a Kisa Wéyòm Bondyé Yé?

•   li atik-la “Godʼs Kingdom—A Government With No Corruption.”