CHAPIT 35

Ki Mannyè Mwen Sa Fè Jan Épi Bondyé?

Jeremy té ni yon èspéwéyans ki édé’y pou konpwann mannyè i enpòtan pou ni an bon wilasyon épi Bondyé. I di: “Lè mwen té douz (12) lanné, papa mwen kité nou. Yon swè, paditan mwen té ka pwédyé, mwen sipliyé Jéhova pou’y fè papa mwen viwé jwenn nou.”

Diwan tan-an Jeremy té an gwo lapenn sala, i koumansé li Bib-la. Lè’y li Sam 10:14, lévanjil sala touché tjè’y anpil. Konsèné Jéhova, vèwsé sala ka di: ‘Mé asiwé ou ka wè pwòblènm épi soufwans. Ou ka gadé, èk ou ka pwan sitiwasyon-an an lanmen. Sé oti’w moun ki ka soufè ka vini. Sé ou ki ka édé manmay ki pa ni papa.’ Apwé Jeremy li sa, i di: “Mwen santi Jéhova té ka palé ban mwen èk i té ka fè mwen konnèt, sé li ki té ka édé mwen, sé li ki Papa mwen. Sa sé pli mèyè papa-a mwen sa janmen ni!”

KI OU adan on sitiwasyon menm kon Jeremy opa, Bib-la ka moutwé, Jéhova vlé’w vini jan’y. Anfen, Bib-la ka di: “Vini pwé Bondyé èk i menm kay vini pwéʼw.” (Jémz 4:8) Sa vlé di, menm si ou pa sa wè Bondyé, èvèk la pa ni pyès dout ki, Bondyé sé pa kanmawad ou an pyès kalité mannyè, i ka envité’w pou vini jan’y!

Mé, pou’w vini jan Bondyé, ou kay ni pou fè éfò. Sé menm kon si’w planté an ti plan. Ou sav ti plan-an pa kay pwofité pa kò’y. Pou’y lévé èk gwandi, ou ni pou toujou wouzé’y èk ou ni pou mété’y adan an bon plas. An menm mannyè-a, si’w vlé fè jan épi Bondyé, la ni sèten bagay ou ni pou fè. Alò, kisa ou sa fè pou’w vansé pli pwé Bondyé?

I Enpòtan Pou’w Étidyé Bib-la

Si dé (2) moun vlé ni on bon wilasyon, yo ni pou konminiké épi yonn a lòt byen. Sa vlé di yo ni pou fè tan pou palé èk kouté yonn a lòt. Ében si’w vlé fè jan épi Bondyé, ou ni pou fè menm bagay-la. Wi, ou ni pou palé épi Bondyé, èk ou ni pou kouté’y. Mé, ki mannyè ou sa kouté Bondyé? Ében, Bib-la sé Pawòl Bondyé. Konsa, lè’w pwan tan pou li ében kouté Bib-la èk étidyé’y, ou ka kouté Bondyé.​—Sam 1:​2, 3.

Mé la ni an chay jenn moun ki pa kontan étidyé. Yo simyé gadé télévizyon, jwé gémz, ében pasé tan épi jan yo. Konsa si’w pa kontan étidyé sa pa anyen ki dwòl. Mé, i enposib pou’w fè jan épi Bondyé si’w pa ka kouté sa’y ka di’w an Pawòl li. Konsa, si’w vlé kiltivé on bon wilasyon épi Bondyé, ou oblijé étidyé Bib-la.

Èk, sé pa pou’w kwè ou kay santi annwi lè’w ka étidyé Bib-la. Anfen, menm si ou pa kontan étidyé, ou sa enjwi étidyé Pawòl Bondyé. Pwèmyé bagay-la ou ni pou fè, sé mété on ti tan asou koté pou’w étidyé Bib-la. Mé ki koté ou kay jwenn tan? Ében ou sa fè menm kon yon jenn fi yo ka kwiyé Lais. Fi sala di: “Mwen fè on plan pou mwen li Bib-la. Toulé bonmaten, pwèmyé bagay-la mwen ka fè, sé li yon chapit an Bib-la.” Èk on jenn fi kenz (15) lanné yo ka kwiyé Maria, ni on diféwan plan pou’y li Bib-la. I di: “Toulé swè avan mwen alé dòmi, mwen ka li tizing an Bib-la.”

Ès ou ni on plan pou’w li Bib-la? Pou’w koumansé, gadé enfòmasyon-an ki an bwèt-la ki ni tit-la,  Fouyé Pli Fon An Bib Ou. Apwé, désidé ki lè ou kwè ou kay sa pasé apipwé twant (30) minit ka étidyé Bib-la, èk ékwi lè-a isi-a.

․․․․․

Bon, lé’w chwazi lè-a ou kay étidyé Bib-la, sa sé sèlman koumansman-an. Lé’w koumansé étidyé, ou kay wéyalizé i pa toujou alèz pou li Bib-la. Pitèt ou kay jis dakò épi sa on ti gason wonz (11) lanné di. Non’y sé Jezreel èk i di: “Pou’w konpwann sèten pa an Bib-la, ou ni pou fiksé tout antansyon’w asou’y lè ou ka li’y.” Si sé kon sa ou ka santi, pa dékouwajé. Chonjé, chak fwa ou étidyé Bib-la, sa sé yon òpòtyounité pou’w kouté Dyé Jéhova, pli mèyè jan-an ou sa janmen ni. Èk vwéman, pli éfò ou fè pou’w étidyé Bib-la, sé pli ou kay enjwi’y.

Lapwiyè Enpòtan

Lè nou ka pwédyé nou ka palé épi Bondyé. Sa sé on bèl kado Bondyé ban nou! Annèk katjilé asou sa: Ou sa pwédyé a népòt lè lajouné kon lannwit, épi Bondyé toujou pawé pou kouté’w. An plis di sa, Bondyé vlé sav sa ki an tjè’w. Sé pou wézon sala Bib-la ka di’w: “An tout lapwiyèʼw, mandé Bondyé sa ou bizwen-an, épi toujou wimèsyéʼy lè ou ka pwédyé.”​—Filipay 4:6.

Silon sa nou li an Filipay 4:6, lè’w ka pwédyé ou sa palé épi Jéhova konsèné an chay bagay. Pou ègzanp, ou sa palé épi’y konsèné pwòblènm ou, èk lòt bagay ki ka twakasé lidé’w. Osi, i bon pou’w toujou wimèsyé Bondyé an lapwiyè’w. Katjilé asou sa: Lè jan’w fè bon bagay ba’w, ès ou pa ka wimèsyé yo? Ében, sé Jéhova ki ja fè pli bagay ba’w. Anfen, i ja fè otan pli pasé pyès lòt jan sa janmen fè ba’w. Konsa, ou sipozé wimèsyé’y.​—Sam 106:1.

Katjilé asou adan sé bagay-la ou vlé wimèsyé Jéhova pou, èk ékwi yo isi-a.

․․․․․

San dout, tanzantan la ni bagay ki ka twakasé lidé’w. Kisa ou sa fè? Sam 55:22 di: ‘Ladjé tout twaka’w asou Jéhova, èvèk i kay sipòté’w. I pa kay janmen kité moun-nan ki dwèt-la tonbé.’

Ès la ni bagay ki ka twakasé lidé’w ou vlé mansyonnen an lapwiyè’w? Ékwi yo isi-a.

․․․․․

Èspéwéyans Pèsonnèl Ou

Lè’y vini pou wilasyon’w épi Bondyé, la ni an lòt bagay ou pa dwé obliyé. An yonn sé Samz-la David ékwi-a i té di: “Gouté, èk zòt kay wè mannyè Bondyé Senyè-a bon.” (Sam 34:8) David té ékwi Sam sala touswit apwé i té èspéyansé an bagay ki té fè’y pè an chay. Sa ki té fèt sé sa, Wa Sòl té ka gadé toupatou pou David pou’y sa tjwé’y, konsa David té ka kouwi pou lavi’y. Sa sété on mové sitiwasyon toubonnman. Mé an plis di sa, David té ni pou séwé anpanmi sé Filistin-lan, èk sé Filistin-lan sété lèlmi’y. Adan sitiwasyon sala, David té wè lanmò an zyé’y, konsa i koumansé fè menm kon an nonm fou. Èk sé kon sa i chapé.​—1 Sanmyèl 21:10-15.

Mé, David pa té kwè i té chapé paski i té savan, èk i té konnèt sa pou fè. I té sav sé Jéhova ki té fè’y chapé, èk i bay Jéhova lonnè-a pou sa. Pli bonnè an menm Sam-lan i té di: “Mwen kwiyé asou Bondyé Senyè-a èk i tann mwen. Èk i délivwé mwen anba tout sa ki té ka fè mwen pè-a.” (Sam 34:4) Konsa, David té ja èspéyansé bonté Jéhova. Sé pou wézon sala i té sa di lézòt, “gouté, èk zòt kay wè mannyè Bondyé Senyè-a bon.” a

Ès ou ka chonjé yon èspéyans an lavi’w ki ba’w pwèv ki, Jéhova té ka otjipé’w? I pa oblijé anyen ki té èstòdinè. Ou sa katjilé asou yonn an sé bennédiksyon-an ou ka wisouvwè chak jou, pitèt on bagay ou ka kwè ki pa tèlman enpòtan. Ékwi èspéyans-lan isi-a.

․․․․․

Si pawan’w ja étidyé Bib-la épi’w, sa sé on bennédiksyon. Mé, ou ni pou fè éfò pou’w dévlopé on wilasyon pèsonnèl épi Bondyé. Si’w p’òkò fè sa, ou sa sèvi enfòmasyon nou diskité an chapit sala pou édé’w koumansé. Èvèk ou sa asiwé Jéhova kay benni èfò’w, paskè Bib-la di: ‘Kontiné mandé Bondyé pou sa ou bizwen, èk i kay ba ou’y. Kontiné chaché èk ou kay twapé.’—Mafyou 7:7 NWT.

[Footnote]

CHONJÉ LÉVANJIL SALA

‘Moun ki wéyalizé yo bizwen djid Bondyé ni tjè kontan.’—Mafyou 5:3.

ON TI PWEN

Si’w li kat (4) paj an Bib-la chak jou, an apipwé yon lanné ou sa fini li Bib-la.

ÈS OU TÉ SAV . . .?

Bib-la sé Pawòl Bondyé. Alò, kon’w ka étidyé’y ou ka jwenn bon konsèy, èk ou ka obéyi sé konsèy sala an lavi’w. Sa sé pwèv ki, Jéhova antéwésé an ou, èk i vlé fè jan épi’w.​—Jan 6:​44.

SA MWEN KAY FÈ!

● Pou mwen sa twapé pli bennéfis hòd létid pèsonnèl mwen, mwen kay ․․․․․

● Pou mwen sa pwédyé pli wéglé, mwen kay ․․․․․

● Sa mwen vlé mandé pawan mwen konsèné sijé sala sé ․․․․․

KI MANNYÈ OU TÉ KAY WÉPONN?

● Kisa’w sa fè pou’w sa enjwi létid pèsonnèl ou pli?

● Pouki Jéhova vlé kouté lapwiyè nou, magwé nou pa pawfé?

● Ki mannyè ou sa fè lapwiyè’w pli mèyè?

[Blurb]

Lè mwen té pli jenn, mwen té ka di menm bagay-la chak fwa mwen té ka pwédyé. Mé apwézan, lè mwen ka pwédyé, mwen ka éséyé pou palé épi Jéhova konsèné tout sa ki fèt diwan jounen-an—ni sa ki té bon, ni sa ki té mové. Èk chak jou diféwan bagay ka fèt, konsa mwen pa ka wépété kò mwen lè mwen ka pwédyé.’’—Eve

[Box/​Picture]

 Fouyé Pli Fon An Bib Ou

1. Chwazi on wakont an Bib-la ou vlé li. Pwédyé èk mandé Jéhova pou ba’w lasajès-la ou bizwen pou édé’w konpwann enfòmasyon-an ou kay li-a.

2. Pa li twò vit. Lè’w ka li, pwan tan’w èk éséyé pou imajiné sa ki ka fèt an wakont-lan. Pou ègzanp, ou sa imajiné ou ka wè sa ki ka fèt, ou ka tann vwa sé moun-lan ki ka palé an wakont-lan, ou ka pwan lòdè lézè-a, ében ou ka pwan gou manjé-a. Si’w fè sa lè’w ka li Bib-la, sa’w ka li-a kay fè pli sans.

3. Katjilé asou sa’w ka li. Kon’w ka li, mandé kò’w kwèstyon tèl kon:

● Pou ki wézon Jéhova mété wakont sala an Bib-la?

● Ki moun an wakont sala mwen sipozé imité, èk ki moun mwen pa sipozé imité?

● Ki bèl lison mwen apwann an wakont sala?

● Kisa mwen apwann an wakont sala konsèné Jéhova, èk konsèné mannyè-a Jéhova ka fè bagay?

4. Di on ti lapwiyè. Di Jéhova kisa’w apwann an sèksyon Bib-la ou fini li-a, èk di’y ki mannyè ou kay sèvi sa’w apwann-lan an lavi’w. Osi, toujou chonjé pou wimèsyé Jéhova pou bèl kado sala i ba’w-la—Pawòl li, Bib-la!

[Picture]

‘Pawòl ou sé yon lanp pou pyé mwen, èvèk yon klèté pou chimen mwen.’​—Sam 119:105.

[Box/​Picture]

Fè Sé Bagay-la Ki Pli Enpòtan-an Pwèmyé

Ès ou ka santi ou twò anbawasé pou’w pwédyé, ében ou pa ni tan pou’w étidyé Bib-la? Si’w ògannizé zafè’w diféwan, ou kay twapé ou ni asé tan pou sé bagay enpòtan sala.

Éséyé pou fè sa: Pwan on bokit, èk mété yonndé gwo wòch adan’y. Apwé sa, fini plen bokit-la épi sab. Fè asiwé ou byen plen bokit-la. Apwézan, ou ni on bokit ki plen wòch épi sab.

Bon, vidé tout sab-la èk sé wòch-la ki an bokit-la atè. Lè’w fini, éséyé pou mété yo viwé an bokit-la, mé mété sab-la pwèmyé. Ou kay wéyalizé, kou sala, bokit-la pa ni lè pou pwan tout sé wòch-la paskè ou mété sab-la avan ou mété sé wòch-la.

Ki lison ou sa apwann an ilistwasyon sala? Ében Bib-la ka di nou: “Toujou chwazi sa ki pli bon.” (Filipay 1:​10) Konsa si’w chwazi pou fè bagay ki pa enpòtan tèl kon anmizman pwèmyé, ou pa kay ni asé tan pou fè sé bagay-la ki pli enpòtan an lavi’w. Mé si’w swiv konsèy-la Bib-la ban nou an Filipay 1:10, ou kay ni asé tan pou fè sé bagay-la ou bizwen fè pou’w fòtifyé wilasyon’w épi Jéhova, èk ou kay ni tan pou anmizman osi. Sé ou ki ni pou désidé kisa ou kay mété pwèmyé an bokit ou!

[Picture]

Si’w vlé wilasyon’w épi Bondyé vini pli fò, ou ni pou otjipé’y menm kon’w ka otjipé on ti plan pou’y pwofité