LISON 3
Ès Sé Bondyé Ki Vwéman Bay Bon Nouvèl-la?
1. Ki Moun ki Mèt Bib-la?
Bon nouvèl-la ki moun kay viv pou tout tan asou latè ékwi an Bib-la. (Sam 37:29) Bib-la ni 66 ti liv andidan’y. Bondyé sèvi apipwé 40 nonm fidèl pou ékwi Bib-la. Moziz ékwi pwèmyé senk liv-la apipwé 3,500 lanné ki pasé. Zapòt Jan ékwi dènyé liv-la anho 1,900 lanné ki pasé. Pawòl ki moun yo ékwi an Bib-la? Bondyé sèvi lisentèspwi’y pou konminiké épi sé moun-an ki ékwi Bib-la. (2 Sanmyèl 23:2) Yo ékwi katjil Bondyé, pa katjil yo menm. Alò, Jéhova sé Mèt Bib-la.—Li 2 Timòfi 3:16; 2 Pita 1:20, 21.
Gadé vidéyo-a Pawòl Ki Moun Ki An Bib-la?
2. Ki mannyè nou sa fè asiwé sa ki an Bib-la sé lavéwité?
Nou sav Bib-la sé Pawòl Bondyé paski I ka di nou ègzaktiman sa ki kay fèt an tan pwochen. Pyès nonm pa sa fè sa. (Jòchwa 23:14) Sé Bondyé Toupisan-an sèlman ki sa di ègzaktiman sa ki kay wivé lézòm an tan pwochen.—Li Izaya 42:9; 46:10.
I té kay fè sans ki si Bondyé ban nou an liv, I pa té kay ni pawèy. Liv sala sé Bib-la. Moun ja wisivwè plizyè bilyon Bib an plizyè san langaj. Menm si Bib-la té ékwi an tan lontan, I an ling épi siyans. Magwé 40 nonm ékwi Bib-la, la pa té ni pyès kontwadiksyon an sa yo ékwi. * Osi, Bib-la ka moutwé lanmityé Bondyé a klè, èk apa di sa, Bib-la ni pouvwa pou chanjé lavi moun pou fè yo vini pli mèyè. Lavéwité sala ka bay plizyè milyon moun asiwans-lan ki Bib-la sé Pawòl Bondyé.—Li 1 Tèsalonnika 2:13.
Gadé vidéyo-a Ki Mannyè Nou Sa Fè Asiwé Sa Ki An Bib-la Vwé?
3. Ki enfòmasyon ki an Bib-la?
Bib-la ka fiksé asou bon nouvèl-la ki Bondyé enmen nou an chay èk I ni bon antansyon pou lézòm. Bib-la èspliké mannyè lézòm pèd pwivilaj-la pou viv an pawadi asou latè dépi an koumansman listwa yo èk mannyè latè-a kay vini an pawadi ankò.—Li Wévélasyon 21:4, 5.
Pawòl Bondyé osi ni lwa, pwensip, èk konsèy. Apa di sa, Bib-la wakonté listwa-a konsèné mannyè Bondyé té ka aji épi lézòm. Listwa sala ka wévélé kawaktè Bondyé. Alò, Bib-la sa édé’w konnèt Bondyé. I ka èspliké mannyè ou sa fè jan épi’y.—Li Sam 19:7, 11; Jémz 2:23; 4:8.
4. Ki mannyè ou sa konpwann Bib-la?
Ti liv sala kay édé’w konpwann Bib-la paski I ka sèvi menm mòdel-la Jézi sèvi-a. Jézi sèvi pasaj an Bib-la yonn apwé lòt èk I fè moun konpwann “sa Lévanjil vlé di.”—Li Louk 24:27, 45.
La pa ni djè bagay ki otan entéwésan kon bon nouvèl-la Bondyé bay-la. Mé, la ni moun ki pa entéwésé an bon nouvèl-la, èk I ka jis annèwvé adan moun. Pa kité sa dékouwajé’w. Èspwa’w pou jwenn lavi étonnèl ka dépan asou éfò’w pou vini konnèt Bondyé.—Li Jan 17:3.
^ par. 3 Gadé ti liv-la A Book for All People.
