LISON 10
Ki Mannyè Ou Sa Konnèt Kilès Wilizyon Ki Vwé?
1. Ès la ni yon sèl wilizyon ki vwé?
“Tjenn asou gad pou fo pwofèt.”—MAFYOU 7:15.
Jézi enstwi sé disip li-a konsèné yon sèl wilizyon, wilizyon-an ki vwé. I menm kon an chimen ki ka mennen’w pou jwenn lavi étonnèl. Jézi di: “Byen pé moun ki ka jwenn” chimen sala. (Mafyou 7:14) Bondyé ka aksèpté adowasyon ki wasiné an Pawòl li sèlman. Tout adowatè ki vwé ka sèvi Bondyé an lilyon paski yo ni yon sèl lafwa.—Li Jan 4:23, 24; 14:6; Èfésòs 4:4, 5.
Gadé vidéyo-a Ès Tout Wilizyon Dwèt An Zyé Bondyé?
2. Ki sa Jézi di konsèné fo Kwityen?
“Yo ka di yo konnèt Bondyé, mé mannyè-a yo ka viv-la ka moutwé yo pa konnèt Bondyé pyès.”—TITÒS 1:16.
Jézi té ja di fo pwofèt té kay gaté wilizyon Kwityen. Yo pé sanm moun ki ka adowé Bondyé pou vwé èk légliz yo ka éklanmé ki yo sé Kwityen. Mé ou sa wè yo pou sa yo vwéman yé. Ki mannyè? Sé sèlman wilizyon-an ki vwé-a ki ka pwodwi Kwityen ki vwé ki ni bon kawaktè.—Li Mafyou 7:13-23.
3. Ki mannyè ou sa idantifyé adowatè ki vwé?
Konsidiwé senk bagay ki kay édé’w idantifyé yo:
-
Adowatè ki vwé ka wèspèkté Bib-la kon Pawòl Bondyé. Yo ka fè fòs kò yo pou swiv pwensip li. Kon sa wilizyon-an ki vwé-a diféwan épi wilizyon ki établi asou pwensip nonm. (Mafyou 15:7-9) Adowatè ki vwé pa ka pwéché yon bagay èk fè an lòt bagay.—Li Jan 17:17; 2 Timòfi 3:16, 17.
-
Bon disip Jézi ka onnowé non Bondyé, Jéhova. Jézi onnowé non Bondyé lè I fè moun konnèt non sala. I édé moun konnèt Bondyé èk I enstwi yo pou pwédyé pou Bondyé sanngtifyé non’y. (Mafyou 6:9) Koté ou ka wèsté-a, ki wilizyon ki ka fè moun konnèt non Bondyé?—Li Jan 17:26; Ronm 10:13, 14.
-
Kwityen ki vwé ka pwéché konsèné Wéyòm Bondyé. Bondyé voyé Jézi pou pwéché bon nouvèl-la konsèné Wéyòm-lan. Wéyòm Bondyé sé sèl èspwa lézòm ni. Jézi kontiné palé konsèné Wéyòm sala pou jis jou lanmò’y. (Louk 4:43; 8:1; 23:42, 43) I di sé disip li-a té kay kontiné pwéché konsèné Wéyòm sala. Si an moun apwoché’w pou palé konsèné Wéyòm Bondyé, an ki wilizyon ou té kay di I yé?—Li Mafyou 24:14.
-
Disip Jézi pa ni pyès pa an latè méchan sala. Ou sa idantifyé yo paski yo pa ka pwan pyès pa an politik ében an chikann latè-a. (Jan 17:16; 18:36) Osi, yo pa ka imité mové labitid èk atitid jan latè.—Li Jémz 4:4.
-
Kwityen ki vwé ni lanmityé ki èstòdinè pou yonn a lòt. Pawòl Bondyé ka enstwi yo mannyè pou wèspèkté moun ki sòti an tout was èk nasyon. Magwé fo wilizyon ja bay gwan sipò pou ladjè sé nasyon-an, adowatè ki vwé wifizé fè sa. (Mayka 4:1-3) Pito sa, Kwityen ki vwé byen kontan pou sèvi tan yo èk pozèsyon yo pou édé èk pou ankouwajé lézòt.—Li Jan 13:34, 35; 1 Jan 4:20.
4. Ès ou sa idantifyé wilizyon-an ki vwé-a?
Kilès wilizyon ki ni tout lésisyon’y wasiné an Pawòl Bondyé, ki ka onnowé non Bondyé, èk ki ka pwoklanmé Wéyòm Bondyé kon sèl èspwa pou lézòm? Ki gwoup ki ka moutwé lanmityé èk ki wifizé patisipé an ladjè? Ki sa ou kwè?—Li 1 Jan 3:10-12.
