Bondyé té ògannizé désandan Abrahanm pou vini an gwan nasyon èk I bay yo an chay lwa. I kwiyé nasyon-an “Izwayèl” épi I mété yo wèskonsab pou adowasyon ki vwé èk pou pawòl li. (Sam 147:19, 20) Kon sa moun an tout nasyon té sa twapé bennéfis an nasyon Izwayèl.​—Li Jennésis 22:18.

Bondyé té chwazi jan Izwayèl pou sèvi’y témwen. Listwa nasyon-an an tan pasé ka moutwé mannyè moun ka jwenn bennéfis lè yo obéyi lwa Bondyé. (Ditonronnonmi 4:6) Alò, lòt moun té sa vini konnèt Jéhova si yo té swiv sé jan Izwayèl-la.​—Li Izaya 43:​10, 12.

Apwé an tan, Izwayèl pèd favè Bondyé, èk Jéhova wiplasé nasyon-an épi kongwigasyon Kwityen-an. (Mafyou 21:43; 23:37, 38) Apwézan, Kwityen ki vwé pwan plas Izwayèl kon témwen Jéhova.​—Li Twavay 15:14, 17.

Jézi ògannizé sé disip li-a pou pwéché èk pou fè disip an tout nasyon. (Mafyou 10:7, 11; 24:14; 28:19, 20) Apwézan, an bout sistèm-lan, twavay sala ka avansé pou wivé finisman’y. Pou pwèmyé fwa an listwa lézòm, Jéhova ja mennen plizyè milyon moun ki sòti an tout nasyon ansanm pou adowé’y an lavéwité. (Wévélasyon 7:9, 10) Kwityen ki vwé ògannizé pou ankouwajé épi pou édé yonn a lòt. Owon latè-a, yo tout ka apwann menm lésisyon-an an mitin yo—lésisyon ki sòti an Bib-la.​—Li Hibrou 10:24, 25.

An sé lanné 1870-lan an ti gwoup étidyan Bib-la koumansé viwé dékouvè lavéwité ki an Bib-la. Yo sav Jézi té ògannizé kongwigasyon Kwityen-an pou pwéché, kon sa yo koumansé pwéché Wéyòm-lan owon latè-a. An lanné 1931 yo adòpté non-an Témwen Jéhova.​—Li Twavay 1:8; 2:1, 4; 5:42.

An pwèmyé syèk-la, sé kongwigasyon Kwityen-an an plizyè péyi té ka jwenn bennéfis anba diwèksyon an pwensipal konmité. Konmité sala té aksèpté Jézi kon Mèt kongwigasyon-an. (Twavay 16:4, 5) Menm mannyè an tan jòdi, Témwen Jéhova owon latè-a ka jwenn bennéfis anba diwèksyon an Pwensipal Konmité. Konmité sala fèt épi ansyen ki ni èspéyans. Yo ka gadé apwé òfis bwanch Témwen Jéhova ki ka twadwi, ki ka enpwimé, èk ki ka bay moun piblikasyon ki ka édé yo étidyé Bib-la. Ou sa jwenn sé piblikasyon sala an pli pasé 600 langaj. Alò, Pwensipal Konmité-a sa sèvi Bib-la pou bay pli pasé 100,000 kongwigasyon owon latè-a ankouwajman èk diwèksyon. An chak kongwigasyon, nonm ki kwòlifyé ka wann sèvis kon ansyen, ében sivéyan. Sé nonm sala ka otjipé twipo Bondyé épi lanmityé.​—Li 1 Pita 5:2, 3.

Témwen Jéhova ògannizé pou pwéché bon nouvèl-la èk pou fè disip. Menm kon sé zapòt-la, nou ka pwéché kay an kay. (Twavay 20:20) Nou osi ka ofè moun ki enmen lavéwité-a épi tout tjè yo pou étidyé Bib-la épi nou. Mé Témwen Jéhova sé pa sèlman an ògannizasyon. Nou sé an fanmi ki ni an Papa ki enmen nou. Nou sé fwè èk sè ki konsèné épi yonn a lòt. (2 Tèsalonnika 1:3) Paski pèp Jéhova ògannizé pou plè Bondyé èk pou édé lézòt, yo sé fanmi-an ki ni pli lakontantman asou latè.​—Li Sam 33:12; Twavay 20:35.