LISON 9
Ki Mannyè Fanmiʼw Sa Ni Lakontantman?
1. Pou ki sa mawiyaj enpòtan pou an fanmi ni lakontantman?
Jéhova, Dyé-a ki ni lakontantman, ni bon nouvèl pou tout fanmi. I vlé yo tout ni lakontantman. (1 Timòfi 1:11) Sé li ki koumansé mawiyaj. Mawiyaj o lwa enpòtan an chay pou lakontantman fanmi-an paski I ka potjiwé an kondisyon ki sòv pou lévé manmay. Kwityen sipozé wèspèkté lwa péyi yo lè I vini pou wéjistwé mawiyaj yo.—Li Louk 2:1, 4, 5.
Ki mannyè Jéhova ka konsidiwé mawiyaj? I vlé an nonm èk an fanm ni an lilyon ki kay diwé pou tout tan. Jéhova vlé mawi épi madanm wèsté fidèl pou yonn a lòt. (Hibrou 13:4) I hayi’y lè moun dévosé. (Malakay 2:16) Mé I ka pèwmité Kwityen pou dévosé èk viwé mayé si moun-an yo mayé épi-a fè adiltè.—Li Mafyou 19:3-6, 9.
2. Ki mannyè an mawi épi an madanm sipozé twété yonn a lòt?
Jéhova kwéyé nonm épi fanm pou édé yonn a lòt an mawiyaj-la. (Jennésis 2:18) Kon tèt fanmi-an, an mawi sipozé pwan wèskonsabilité-a pou potjiwé bay fanmi’y èk pou enstwi yo konsèné Bondyé. I sipozé pawé pou fè sakwifis bay madanm li pou moutwé I enmen’y. Mawi èk madanm sipozé moutwé lanmityé épi wèspé pou yonn a lòt. La pa ni pyès mawi épi madanm ki pawfé, alò I enpòtan pou yo apwann pawdonnen yonn a lòt pou yo ni lakontantman an mawiyaj yo.—Li Èfésòs 4:31, 32; 5:22-25, 33; 1 Pita 3:7.
3. Ès ou sipozé tounen do’w asou an mawiyaj ki pa ni lakontantman?
Si ou ka èspéyansé difikilté an mawiyaj ou, zòt toulé dé sipozé fè éfò pou twété yonn a lòt épi lanmityé. (1 Kòrint 13:4, 5) Pawòl Bondyé pa ka ankouwajé sépawasyon kon an mannyè pou kowijé népòt ti pwòblenm adan an mawiyaj.—Li 1 Kòrint 7:10-13.
4. Manmay, ki sa Bondyé vlé bay zòt?
Jéhova vlé zòt ni lakontantman. I ka bay zòt pli mèyè konsèy ki ni asou mannyè pou jwi jennès zòt. I vlé zòt jwenn bennéfis an lasajès pawan zòt épi an èspéyans yo. (Kòlòsé 3:20) Jéhova osi vlé zòt èspéyansé lajwa-a ki ka vini lè zòt fè bagay bay Kwéyatè zòt èk bay Gason’y.—Li Ékléziyastis 11:9–12:1; Mafyou 19:13-15; 21:15, 16.
5. Pawan, ki mannyè manmay zòt sa jwenn lakontantman?
Zòt sipozé twavay wèd pou potjiwé manmay zòt épi manjé, had, èk an koté pou wèsté. (1 Timòfi 5:8) Mé pou manmay zòt sa jwenn lakontantman, zòt osi ni pou édé yo enmen Bondyé èk apwann anba’y. (Èfésòs 6:4) Mannyè zòt ka moutwé lanmityé bay Bondyé sa touché manmay zòt ofon tjè yo. Lè konsèy zòt sòti an Pawòl Bondyé, I sa fè manmay zòt katjilé adan an mannyè ki pozitif.—Li Ditonronnonmi 6:4-7; Provèb 22:6.
Manmay ka fè byen lè ou ankouwajé yo èk ou aplodi yo. Ou osi ni pou kowijé yo. Sa kay pwotéjé yo kont kondwit ki sa anpéché yo jwenn lakontantman. (Provèb 22:15) Mé, ou pa janmen sipozé kowijé yo adan an mannyè ki bwital.—Li Kòlòsé 3:21.
Témwen Jéhova ja pibliyé plizyè liv ki ékwi èspwèsman pou édé pawan èk manmay. Sé liv sala établi asou Bib-la.—Li Sam 19:7, 11.
