Jézi pa té kon pyès lòt moun. I té ka viv an syèl kon an lèspwi avan I fèt asou latè. (Jan 8:23) Jézi sété pwèmyé kwiyasyon Bondyé, èk I édé Bondyé kwéyé tout lòt bagay. Sé li sèlman Jéhova kwéyé diwèktiman èk an wézon di sa yo kwiyé Jézi “sèl Gason” Bondyé fè. (Jan 1:14) Bondyé sèvi Jézi pou pòté pawòl li, alò yo kwiyé Jézi “Pawòl-la.”​—Li Provèb 8:22, 23, 30; Kòlòsé 1:15, 16.

Bondyé voyé Gason’y asou latè lè’y mété lavi Jézi an matwis Mari, an tifi Jwif ki sété an vyèj toujou. Kon sa Jézi pa té ni an nonm pou papa’y. (Louk 1:​30-35) Jézi vini asou latè-a (1) pou enstwi lavéwité-a konsèné Bondyé, (2) pou kité an ègzanp ban nou asou mannyè pou fè volonté Bondyé menm si nou ka èspéyansé an chay difikilté, èk (3) pou bay lavi pawfé’y kon “an lanmann.”​—Li Mafyou 20:28.

An lanmann sé an pwi ou ka péyé pou libéwé yon moun ki ja kondanné pou lanmò. (Ègzodòs 21:29, 30) Bondyé pa té janmen ni antansyon pou lézòm vini vyé épi pou yo mò. Ki mannyè nou sav sa? Bondyé té di Adanm, pwèmyé nonm-lan, si I fè sa Bib-la kwiyé “péché,” I té kay mò. Kon sa si Adanm pa té péché, I pa té kay janmen mò. (Jennésis 2:16, 17; 5:5) Bib-la di sé Adanm ki annékòz lanmò “antwé” an latè-a. Alò, Adanm pasé péché épi péyiman péché —lanmò—asou tout désandan’y. Nou bizwen an lanmann pou libéwé nou anba pinisyon sala.​—Li Ronm 5:12; 6:23.

Ki moun ki sa péyé lanmann-an pou libéwé nou anba lanmò? Lè nou mò, nou ka péyé pou péché nou. Moun ki pa pawfé pa sa péyé pou péché lézòt moun.​—Li Sam 49:7-9.

Jézi pa té kon nou, I té pawfé. Kon sa I pa té ni pou mò pou péché’y paski I pa janmen péché. Pito sa, Jézi mò pou péché lézòt moun. Bondyé moutwé lanmityé ki èstòdinè bay lézòm lè I voyé Gason’y mò ban nou. Jézi osi moutwé lanmityé ban nou lè I obéyi Papa’y èk I bay lavi’y pou péché nou.​—Li Jan 3:16; Ronm 5:18, 19.

Gadé vidéyo-a Pou ki Wézon Jézi Mò?

Lè Jézi té asou latè, I djéwi moun ki té malad, I wésisité moun ki té mò, èk I soulajé moun ki té ka soufè. An mannyè sala I moutwé sa I kay fè an tan pwochen bay tout moun ki obéyisan. (Mafyou 15:30, 31; Jan 5:28) Apwé Jézi mò, Bondyé viwé ba li lavi kon an lèspwi. (1 Pita 3:18) Apwé sa Jézi èspéwé asou lanmen dwèt Bondyé jis tan Jéhova ba li pouvwa pou kondwi kon Wa anho tout latè-a. (Hibrou 10:12, 13) Apwézan Jézi ka kondwi kon Wa an syèl, èk sé disip li-a ka annonsé bon nouvèl sala owon latè-a.​—Li Dannyèl 7:13, 14; Mafyou 24:14.

Touswit, Jézi kay sèvi pouvwa’y kon Wa pou tiwé tout soufwans èk sé moun-an ki ka annékòz soufwans-lan. Tout moun ki mété lafwa an Jézi èk obéyi’y, kay jwi lavi an pawadi asou latè.​—Li Sam 37:9-11.