LISON 7
Ki Sa Wéyòm Bondyé Yé?
1. Ki Sa Wéyòm Bondyé Yé?
Pou ki sa Jézi sé pli mèyè Wa-a?—MAK 1:40-42.
Wéyòm Bondyé sé an gouvèdman ki an syèl. I kay wiplasé tout lòt gouvèdman èk I kay annékòz volonté Bondyé pou fèt an syèl èk asou latè. Nouvèl-la konsèné Wéyòm Bondyé sé bon nouvèl. Lézòm bizwen an bon gouvèdman èk talè Wéyòm Bondyé kay satisfè labizwen sala. I kay mennen tout moun ki ka viv asou latè an lilyon.—Li Dannyèl 2:44; Mafyou 6:9, 10; 24:14.
An wéyòm oblijé ni an wa. Jéhova apwenté Gason’y, Jézi Kwi, pou vini Wa an Wéyòm Li.—Li Wévélasyon 11:15.
Gadé vidéyo-a Ki Sa Wéyòm Bondyé Yé?
2. Pou ki sa Jézi sé pli mèyè Wa-a?
Gason Bondyé sé pli mèyè Wa-a paski I janti èk I ka doubout pou sa ki dwèt. (Jan 1:14) Osi, I ni asé pouvwa pou édé moun paski I kay wèsté an syèl èk kondwi latè-a. Apwé I wésisité, I mouté an syèl èk I asiz asou lanmen dwèt Bondyé pou èspéwé. (Hibrou 10:12, 13) Alafen, Bondyé ba li pouvwa pou’y koumansé kondwi.—Li Dannyèl 7:13, 14.
3. Ki konpanni moun ki kay kondwi épi Jézi?
An gwoup moun yo ka kwiyé “sé moun sen-an” kay kondwi épi Jézi an syèl. (Dannyèl 7:27) Sé zapòt fidèl Jézi-a sété pwèmyé anpami sé moun sen-an Bondyé chwazi-a. Jéhova ja kontiné chwazi nonm èk fanm fidèl kon moun ki sen pou jis apwézan. Menm kon Jézi, Bondyé ka wésisité yo kon lèspwi.—Li Jan 14:1-3; 1 Kòrint 15:42-44.
Ki kantité moun ki ka alé an syèl? Jézi kwiyé yo an “ti twipo.” (Louk 12:32) La kay ni 144,000 moun an tout. Yo kay kondwi latè-a épi Jézi.—Li Wévélasyon 14:1.
4. Ki sa ki fèt lè Jézi koumansé kondwi?
Wéyòm Bondyé koumansé kondwi an lanné 1914. * Pwèmyé aksyon Jézi pwan kon Wa sété pou jété Satan èk sé vyé lèspwi’y-la désann asou latè-a. Satan vini anwajé èk I koumansé annékòz twaka toupatou an latè-a. (Wévélasyon 12:7-10, 12) Dépi tan sala, pwòblenm lézòm ja vini pli mové. Ladjè, lafen, mové maladi, èk twanblanntè sé an pa an “sin-an” ki touswit Wéyòm-lan kay kondwi tout latè-a.—Li Louk 21:7, 10, 11, 31.
5. Ki sa Wéyòm Bondyé ka akonpli?
Gwan twavay pwèchman-an ka moutwé ki Wéyòm Bondyé ja koumansé asanblé an gwan latilyé moun ki sòti an tout nasyon. Plizyè milyon moun ki dous an tjè ka vini anba kondwit Jézi. Lè Wéyòm Bondyé détwi sistèm méchan sala asou latè, I kay pwotéjé yo. Kon sa tout moun ki vlé jwenn bennéfis Wéyòm Bondyé ni pou apwann mannyè pou obéyi Jézi.—Li Wévélasyon 7:9, 14, 16, 17.
Diwan 1,000 lanné, Wéyòm-lan kay akonpli antansyon-an Bondyé té ni bay lézòm dépi an koumansman-an. Tout latè-a kay vini an pawadi. Alafen, Jézi kay livwé Wéyòm-lan an lanmen Papa’y. (1 Kòrint 15:24-26) Ès ou konnèt an moun ou té kay kontan pou palé épi konsèné Wéyòm Bondyé?—Li Sam 37:10, 11, 29.
^ par. 6 Pou pli détay asou mannyè pwofèsi ki an Bib-la té ja palé asou lanné 1914, gadé paj 215-218 an liv-la What Does the Bible Really Teach?
