Jéhova bay nonm épi fanm latè-a. Sa sé kay nou. Alò, Bondyé pa té kwéyé pwèmyé nonm-lan épi fanm-lan, Adanm épi Èv, pou pléplé syèl-la​—Bondyé té ja kwéyé nanj pou viv an syèl. (Jòb 38:4, 7) Pito sa, Bondyé pwan pwèmyé nonm-lan èk I mété’y adan an bèl pawadi yo ka kwiyé jaden Édenn. (Jennésis 2:15-17) Jéhova té bay Adanm épi désandan’y èspwa-a pou jwi lavi san bout asou latè.​—Li Sam 37:29; 115:16.

An koumansman-an, sé jaden Édenn sèlman ki sété an pawadi. Pwèmyé nonm-lan épi fanm-lan té ni pou pléplé latè-a épi désandan yo. Apwé an tan, yo té sipozé ni tout latè-a anba lotowité yo èk fè’y vini an pawadi. (Jennésis 1:28) Latè-a pa kay janmen détwi. I kay toujou wèsté kon kay lézòm.​—Li Sam 104:5.

Gadé vidéyo-a Pouki Bondyé Kwéyé Latè?

Adanm épi Èv dézobéyi Bondyé, kon sa Jéhova mété yo dèwò jaden-an. Yo pèd pawadi-a, èk pyès nonm p’òkò sa mennen’y viwé. Bib-la di: “Yo ja livwé latè-a an lanmen moun ki méchan.”—Jòb 9:24.​—Li Jennésis 3:23, 24.

Ès Jéhova abandonnen antansyon-an I té ni an koumansman-an pou lézòm? Non! Sé li ki Bondyé toupisan. I pa sa janmen pa éwisi. (Izaya 45:18) I kay fè lézòm viwé menm kon I té vlé an koumansman-an.​—Li Sam 37:11, 34.

Latè-a kay vini an Pawadi ankò diwan tan-an Jézi kay kondwi kon Wa-a Bondyé chwazi-a. Adan an ladjè yo ka kwiyé Anmagèdonn, Jézi kay diwèkté nanj Bondyé pou yo  détwi tout moun ki ka òpozé Bondyé. Apwé sa Jézi kay mété Satan an pwizon pou 1,000 lanné. Yo pa kay détwi pèp Bondyé an ladjè sala paski Jézi kay djidé yo èk pwotéjé yo. Yo kay jwi lavi étonnèl an Pawadi asou latè.​—Li Wévélasyon 20:1-3; 21:3, 4.

Ki tan Bondyé kay mennen an bout pou movèzté asou latè? Jézi té bay yon “sin” pou moutwé ki lè bout tan-an té kay tou pwé. Kondisyon latè-a atjwèlman ka mété lavi lézòm an danjé èk I ka moutwé ki nou ka viv an “bout sistèm-lan.”​—Li Mafyou 24:3, 7-14, 21, 22.

Diwan 1,000 lanné-a Jézi kay kondwi latè-a padan I an syèl, I kay mennen an bout pou tout soufwans. (Izaya 9:6, 7; 11:9) Apa di kondwit li kon Wa, Jézi osi kay twavay kon an Gwan Pwèt èk I kay éfasi péché moun ki enmen Bondyé. Kon sa, Bondyé kay sèvi Jézi pou tiwé maladi, vyéyès, èk lanmò.​—Li Izaya 25:8; 33:24.

Moun ki obéyi Bondyé kay viv an Pawadi. (1 Jan 2:17) Jézi voyé sé disip li-a pou chaché moun ki dous an tjè pou enstwi yo mannyè pou fè kò yo aksèptab pou Bondyé. An tan jòdi, Jéhova ka pwépawé plizyè milyon moun pou viv an Pawadi asou latè. (Zèfinaya 2:3) An Kingdonm Hòl Témwen Jéhova, moun ka apwann mannyè pou vini pli mèyè mawi èk papa èk mannyè pou vini pli mèyè madanm èk manman. Manmay épi pawan ka adowé Bondyé ansanm èk yo ka apwann mannyè pou jwenn bennéfis an bon nouvèl-la.​—Li Mayka 4:1-4.