LISON 8
Pou Ki Sa Bondyé Ka Pèwmité Movèzté Èk Soufwans?
1. Ki mannyè movèzté koumansé?
Bondyé ja pèwmité nonm pou kondwi asé lontan pou moutwé yo pa sa kowijé pwòblenm lézòm
Movèzté koumansé asou latè lè Satan di pwèmyé mansonj-lan. An koumansman-an, Satan sété an nanj pawfé, mé “I pa té doubout fò an lavéwité-a.” (Jan 8:44) I té vlé moun adowé’y, magwé sé Bondyé sèlman ki méwité adowasyon nou. Satan manti bay Èv, pwèmyé fanm-lan, èk I pousé’y pou obéyi li menm Satan pito I obéyi Bondyé. Adanm swiv Èv épi yo dé-a dézobéyi Bondyé. Disizyon Adanm annékòz soufwans èk lanmò.—Li Jennésis 3:1-6, 19.
Lè Satan ankouwajé Èv pou dézobéyi Bondyé, I koumansé an wévòt kont sivwennèté Bondyé, ében pozisyon’y kon Mèt. Majòwité lézòm ja swiv Satan èk yo widjèkté Bondyé kon Kondwitè yo. Alò, Satan ja vini “kondwitè latè-a.”—Li Jan 14:30; 1 Jan 5:19.
2. Ès kwiyasyon Bondyé té ni défo?
Tout twavay Bondyé pawfé. Sé moun-an épi sé nanj-lan Bondyé kwéyé-a té ni kapasité-a pou yo obéyi’y konplètman. (Ditonronnonmi 32:4, 5) Bondyé kwéyé nou épi léchanlib-la pou chwazi si nou vlé fè sa ki bon ében sa ki mové. Léchanlib sala ka ouvè chimen pou nou sa moutwé lanmityé nou pou Bondyé.—Li Jémz 1:13-15; 1 Jan 5:3.
3. Pou ki sa Bondyé ja pèwmité soufwans pou jis apwézan?
Jéhova ka pèwmité wévòt kont sivwennèté’y pou an tan. Pou ki wézon? Pou moutwé ki pyès éfò nonm fè pou kondwi kò yo pa kay janmen ni bennéfis. (Ékléziyastis 7:29; 8:9) Magwé 6,000 lanné ja pasé dépi lézòm ka ègzisté, I a klè ki kondwit lézòm pa sa tiwé ladjè, kwim, pasdwa, ében maladi.—Li Jérémaya 10:23; Ronm 9:17.
Kondwit Bondyé épi kondwit lézòm diféwan konplètman, paski kondwit Bondyé ka mennen bennéfis bay moun ki aksèpté’y. (Izaya 48:17, 18) Touswit, Jéhova kay mété an bout pou tout gouvèdman lézòm. Sé sèlman moun ki chwazi pou kité Bondyé kondwi yo ki kay éwityé latè-a.—Izaya 11:9. Li Dannyèl 2:44.
Gadé vidéyo-a Pouki Bondyé Ka Kité Moun Soufé Kon Sa?
4. Ki sa pasyans Bondyé ka pèwmité nou pou fè?
Satan éklanmé ki pyèsonn pa kay adowé Bondyé si I pa an bennéfis yo. Ès ou té kay kontan pou moutwé sa sé an mansonj? Ou sa fè sa! Pasyans Bondyé ka pèwmité nou tout pou moutwé si nou simyé kondwit Bondyé ében kondwit lézòm. Mannyè-a nou ka viv-la ka moutwé ki chwa nou fè.—Li Jòb 1:8-12; Provèb 27:11.
5. Ki mannyè nou ka chwazi Bondyé kon Kondwitè nou?
Sé chwa-a nou fè-a ka wévélé si nou vlé Bondyé pou Kondwitè nou
Lè nou chaché pou adowasyon ki établi asou Bib-la èk nou mété’y an pwatik nou ka chwazi Bondyé kon Kondwitè nou. (Jan 4:23) Lè nou pa mélé kò nou an politik èk ladjè, nou ka widjèkté Satan kon kondwitè nou, menm kon Jézi té fè.—Li Jan 17:14
Satan ka sèvi pouvwa’y pou ankouwajé moun pou viv vyé lavi ki ka fè moun ditò. Lè nou widjèkté sé vyé pwatik sala, adan jan nou épi fanmi nou pé sèvi nou wizib ében òpozé nou. (1 Pita 4:3, 4) Alò nou ni pou fè an chwa. Ès nou kay fè jan épi moun ki enmen Bondyé? Ès nou kay obéyi lwa’y ki ka moutwé lasajès li èk lanmityé’y pou nou? Si nou fè sa, nou ka moutwé ki Satan sé an mantè lè I éklanmé ki nou pa kay obéyi Bondyé lè nou anba twibilasyon.—Li 1 Kòrint 6:9, 10; 15:33.
Lanmityé Bondyé pou lézòm ka bay asiwans-lan ki movèzté èk soufwans kay bout. Moun ki moutwé yo kwè sa kay jwi lavi asou latè pou tout tan.—Li Jan 3:16.
